Mae Myfyrdodau Dyddiol Cymdeithas y Beibl yn dilyn cynllun darllen Beibl M'Cheyne, a ddyluniwyd ar gyfer y rhai sydd am ddarllen y Beibl cyfan mewn blwyddyn. Mae pob myfyrdod yn canolbwyntio ar un o'i bedair pennod ddyddiol. Darllenwch rhain yn Gymraeg.
Arglwydd, paratoa fi i dderbyn dy air. Cliria fy meddwl a chynhesa fy nghalon. Sicrha fi o’th fwriadau cariadus ar fy nghyfer, a siarad â mi heddiw.
Mae Pregethwr 5 yn mynd i gyfeiriad gwahanol i'r penodau blaenorol. Mae'n sôn am gymryd o ddifrif yr hyn rydym yn addo ei wneud dros Dduw. Ei brif neges yw pan fyddwch chi'n addunedu i Dduw, ‘paid oedi cyn ei chyflawni' (adnod 4). Efallai bod y darn hwn yn ymddangos allan o’i le, ond hyd yma mae Pregethwr wedi bod yn trafod oferedd byw heb berthynas â Duw, ac yn pwysleisio mai dim ond Duw all roi gwir gyflawniad. Os mai Duw yw'r un sy'n rhoi ystyr i'n bywydau yn y pen draw, yna mae defnyddio ein bywydau i anrhydeddu Duw yn fwyaf ystyrlon, a rhan o hynny yw cadw ein haddewidion iddo.
Mae yna lawer o enghreifftiau yn y Beibl o hyn. Addawodd Hannah y byddai’n magu ei phlentyn dros yr Arglwydd pe bai’n caniatáu iddi gael un (1 Samuel 1.10–11) a gwnaeth Jona addewid ar ôl iddo gael ei lyncu gan y pysgodyn (Jona 2.9). Rydym yn gwneud addunedau mewn sawl amgylchiad - yn ystod y seremoni briodas mae'r mwyafrif o gyplau yn addo gerbron Duw, ac fel tyst yn y llys rydym yn gwneud llwon gerbron Duw. Efallai eich bod hefyd wedi gwneud addewidion preifat i Dduw yn ystod eich taith ysbrydol.
Wrth gwrs, mae'n bwysig cofio gan mai llyfr o'r Hen Destament yw hwn. Efallai nad oedd yr awdur wedi deall cysyniad gras Duw fel yr ydym ni’n ei ddeall. Mae gras Duw, a ddangosir trwy aberth Iesu, yn ein gwarchod pan fyddwn yn gwneud camgymeriadau a Duw yw’r un sy’n adnabod ein calonnau a’n bwriadau.
Arglwydd, helpa fi i gadw fy addewidion i ti a dy anrhydeddu ym mhopeth a wnaf.
Ysgrifennwyd y myfyrdod hwn gan Hannah Stevens sy’n rhan o dîm cyhoeddi Cymdeithas y Beibl.