Popeth rwyf wedi’i orchymyn: Mathew 28.16–20 (17 Gorffennaf 2020)

Gweddi

Arglwydd, agor fy nghlustiau i glywed yr hyn sydd gennyt i’w ddweud wrthyf; agor fy nghalon i garu dy air, ac agor fy meddwl i ddeall dy wirionedd.

Darllen

Barnwyr 1 Actau 5 Jeremeia 14 Mathew 28

Myfyrdod Dyddiol: Mathew 28

Rydym wedi arfer â darllen adnodau olaf efengyl Mathew – adnodau 19 a 20 – fel y ‘Comisiwn Mawr’, gorchymyn Iesu i’w ddisgyblion fynd ‘at yr holl bobloedd ym mhobman a’u gwneud yn ddisgyblion imi’. Byddai’r mwyafrif o Gristnogion – yn enwedig y rhai yn y traddodiad efengylaidd – yn credu bod y gorchymyn hwn yn para heddiw. Mae’r gorchymyn wedi gyrru cenhadaeth tramor yn ei flaen am fwy na 200 mlynedd, ond am lawer o hanes yr Eglwys nid oedd ganddo’r un grym; roedd yn tueddu i gael ei ystyried yn dasg i’r Apostolion yn hytrach nag i gredinwyr diweddarach.

Yr hyn y gallem ei fethu, serch hynny, yw cynnwys gwirioneddol y genhadaeth hon. Dywed Iesu wrth yr Apostolion ‘Dysgwch nhw i wneud popeth dw i wedi'i ddweud wrthoch chi’ (adnod 20). Mae’r ‘popeth’ hwnnw’n feichus iawn – a chyn y gallwn ni ddysgu unrhyw beth, mae’n rhaid i ni fod yn barod i ddysgu. Mae’r Bregeth ar y Mynydd (Mathew 5-7) yn gosod safon uchel iawn. Fodd bynnag, nid ofn dylai effeithio ein hymddygiad ond cariad: ‘Os dych chi'n fy ngharu i, byddwch yn gwneud beth dw i'n ddweud’ (Ioan 14.15).

Efallai y gall canolbwyntio ar orchmynion Iesu wneud inni ymdrin ag efengylu ychydig yn wahanol. Efallai y bydd gorchmynion Iesu yn gwneud i ni ofyn at beth yr ydym yn ceisio troi pobl; gallai wneud inni feddwl tybed a yw twf eglwysig er ei fwyn ei hun yn nod teilwng. Gallai darllen trwy’r Efengylau gyda phensil a phapur mewn llaw, gan nodi popeth y mae Iesu’n ei ddweud wrthym ei wneud, fod yn ymarfer ysbrydol defnyddiol.

Gweddi

Duw, diolch am orchmynion Iesu, a roddodd i ni er ein lles. Helpa fi i’w dysgu ac i’w cadw, a bod yn ostyngedig ac yn edifeiriol pan fyddaf yn methu cadw atynt.