Rwyt yn fy adnabod: Salm 139.1–24 (7 Tachwedd 2020)

Gweddi

Arglwydd, agor fy nghlustiau i glywed yr hyn sydd gen ti i’w ddweud wrthyf; agor fy nghalon i garu dy air, ac agor fy meddwl i ddeall dy wirionedd.

Darllen

2 Brenhinoedd 21 Hebreaid 3 Hosea 14 Salm 139

Myfyrdod Dyddiol: Salm 139.1–24

Nesaf at Salm 23, mae’r gerdd hon yn un o’r salmau mwyaf poblogaidd yn y Beibl. Mae’n emyn hyfryd o ganmoliaeth i Dduw am ei adnabyddiaeth drylwyr ohonom a’i ofal amdanom. Mynegir yma lawer o’r hyn a gredwn am werth pennaf bywyd dynol unigol. Nid ydym yn werthfawr yn unig oherwydd yr hyn yr ydym yn ei gynhyrchu neu’n ei ddefnyddio. Nid ydym chwaith yn arwyddocaol yn unig oherwydd ein statws neu safle mewn bywyd, neu oherwydd ein bod yn aelodau o deulu neu lwyth penodol. Mae hyd yn oed y lleiaf a’r isaf ohonom yn cael ei greu gan Dduw allan o gariad pur, wedi ein hadnabod a’n trysori ganddo. Pan fyddwn yn teimlo’n unig, wedi ein gorlethu neu ein tanbrisio, mae’r salm hon yn ffynhonnell hyder anhygoel: gallwn ddal ein pennau i fyny’n uchel beth bynnag a wynebwn.

Felly mae adnodau 19-22 yn wirioneddol rhygnu ‘O Dduw, pam wnei di ddim lladd y rhai drwg… Dw i'n eu casáu nhw â chas perffaith’.

Nid ymyrraeth ar hap yn unig ydynt, serch hynny; rydym i fod i’w gweld yng nghyd-destun yr hyn rydym newydd ei ddarllen. Felly’r ‘drwg’ yma yw’r rhai sy’n gormesu neu’n dilorni’r rhai sy’n cael eu hadnabod a’u caru mor rhyfeddol gan Dduw. Wrth ymosod ar rai a grëwyd gan Dduw, maent yn ymosod ar y Creawdwr ei hun. Felly nid troseddau yn erbyn pobl yn unig yw trais, bwlio, anghyfiawnder, cam-drin ac esgeulustod: maent yn troseddu yn erbyn Duw, yr hwn a’n gwnaeth ni ac sy’n ein hadnabod mor ddwfn.

Gweddi

‘Petawn i'n mynd i fyny i'r nefoedd, rwyt ti yno; petawn i'n gorwedd i lawr yn Annwn, dyna ti eto!’(adnod 8). Duw, diolch am fy nghreu a fy ngharu i yn union fel rydw i.