Reyn Davydh (10:1 – 29:30)

1An Filistysi a omladhas erbynn Ysrael, ha gwer Ysrael a fias a-rag an Filistysi, hag a goedhas ledhys war venydh Gilboa. 2An Filistysi a jassyas war-lergh Sowl ha'y vebyon, ha'n Filistysi a ladhas Yonathan, Abinadab ha Malkishua, mebyon Sowl. 3An vatel a veu poes a-dro dhe Sowl; ha'n sethoryon a'n kavas, hag ev a veu goliys gans an sethoryon. 4Ena Sowl a leveris dhe dheger y arvow, ‘Tenn dha gledha ha gwan vy ganso, ma na dheffo an wer antrodreghys ma ha gul ges ahanav.’ Mes ny vynnas deger y arvow, drefenn ev dhe berthi own yn feur. Ytho Sowl a gemmeras y gledha y honan ha koedha warnodho. 5Pan welas deger y arvow bos Sowl marow, ev ynwedh a goedhas war y gledha, ha merwel. 6Yndella Sowl a verwis ha'y dri mab, hag oll y deylu a verwis war-barth. 7Pan glewas oll an Ysraelysi esa y'n nans y fisa an lu, ha Sowl ha'y vebyon dhe vos marow, i a asas aga sitys ha fia; ha'n Filistysi a dheuth ha triga ynna.

8Ternos an Filistysi a dheuth dhe bilya an re varow, hag i a gavas korf Sowl ha'y vebyon koedhys war venydh Gilboa. 9I a'n pilyas ha kemmeres y benn ha'y arvow; ha dannvon kannasow dre bow an Filistysi dhe dhoen an nowodhow da dh'aga idolys ha dhe'n bobel. 10I a worras y arvow yn chi aga duwow ha fastya y grogen dhe ji Dagon. 11Pan glewas oll Yabesh-gilead pup-tra re wrussa an Filistysi dhe Sowl, 12pub gour kolonnek a sevis, ha kemmeres dhe-ves korf Sowl ha korfow y vebyon ha'ga dri dhe Yabesh. I a ynkleudhyas aga eskern yn-dann an derebinthenn yn Yabesh, hag gul penys seyth dydh.

13Sowl a verwis drefenn y vos dislen dhe'n ARLOEDH. Ny withas ger an Arloedh hag ynwedh ev a hwilas kusul dhiworth nygromons, 14ha ny hwilas gidyans dhiworth an Arloedh. Rakhenna ev a'n ladhas, ha treylya an vyghterneth a-dro dhe Davydh mab Yesse.