Davydh Untys Myghtern

1Oll Ysrael a omguntellas hag a dheuth dhe Davydh yn Hebron ha leverel, ‘Ni yw dha askorn ha'th kig dha honan. 2Yn termyn passys, hwath pan o Sowl myghtern, yth o ty neb a ledyas Ysrael yn-mes yn batel ha'ga dri tre. An Arloedh dha Dhuw a leveris dhis, Ty a vydh bugel ow fobel Ysrael ha ty a vydh rewler war ow fobel Ysrael.’ 3Oll henavogyon Ysrael a dheuth dhe'n myghtern yn Hebron, ha Davydh a wrug kevambos gansa yn Hebron a-rag an Arloedh, hag i a untyas Davydh myghtern war Ysrael, war-lergh ger an Arloedh dre Samuel.

Davydh a Gemmer Yerusalem

4Davydh hag oll Ysrael eth dhe Yerusalem, henn yw Yebus, le mayth esa an Yebusysi, trigoryon an pow. 5Trigoryon Yebus a leveris dhe Davydh, ‘Ny entrydh omma.’ Byttegyns Davydh a gemmeras dinas Sion, honn yw, sita Davydh. 6Davydh a leveris, ‘Piwpynag a wysk an Yebusysi yn kynsa a vydh penn ha kaslewydh.’ Yoab mab Seruya eth yn-bann yn kynsa, ytho ev a dheuth ha bos penn. 7Yth esa Davydh trigys y'n dinas; rakhenna i a's henwis sita Davydh. 8Ev a dhrehevis an sita a-derdro, dhiworth an Millo11:8 Millo: Martesen an styr yw tirlanow, po terrasow. yn kylghenn dien; ha Yoab a ewnhas remenant an sita. 9Davydh a dheuth ha bos moy ha moy nerthek, rag yth esa Arloedh an luyow ganso.

Kasoryon Davydh ha'ga Gwriansow

10An re ma o pennow kasoryon Davydh, a ri dhodho skoedhyans krev yn y vyghterneth, war-barth hag oll Ysrael, dh'y wul myghtern war-lergh ger an Arloedh a-dro dhe Ysrael. 11Hemm yw rol kasoryon Davydh: Yashobeam an Hakmonyas, penn an tri; gans y wuw ev a ladhas tri hans yn unn prysweyth.

12Nessa dhodho o Eleazar mab Dodo an Aghoghyas. 13Ev a veu gans Davydh yn Pas-dammim pan veu an Filistysi kuntellys ena rag batel. Yth esa splatt dor leun a heydh, ha'n bobol a fias dhiworth an Filistysi. 14Mes i a synsis aga thir yn kres an splatt, ha'y dhefendya, ha gweskel an Filistysi; ha'n Arloedh a ros dhedha trygh bras an jydh na.

15Tri a'n deg penn warn ugens eth yn-nans dhe'n garrek dhe Davydh yn kav Adullam, pan veu lu an Filistysi ow kampya yn nans Refaim. 16Yth esa Davydh yn eur na y'n skons; hag yth esa savla-goelyadoryon an Filistysi yn Bethlehem. 17Davydh a leveris, yn-unn yeuni, ‘Piw a dhre dhymm dowr dhe eva dhiworth puth Bethlehem usi ryb an yet?’ 18Gans henna an tri gour galloesek a dorras dre gamp an Filistysi, ha tenna dowr yn-mes a buth Bethlehem esa ryb an yet, ha'y dhri dhe Davydh. Byttegyns ny vynnas Davydh y eva hag ev a'n dinewis yn-mes dhe'n Arloedh, 19ha leverel, ‘Duw difenn, my dhe wul hemma. A evav goes an wer ma? Rag peryll aga bewnans i a'n dros.’ Rakhenna ny vynnas Davydh y eva. Yndella y hwrug an tri hasor.

20Abishay broder Yoab o penn an deg warn ugens. Hag ev a dhrehevis y wuw erbynn tri hans den ha'ga ladha, ha gwaynya hanow yn mysk an tri. 21Ev o an moyha gerys-da a'n deg warn ugens hag ev a dheuth ha bos aga haslewydh; mes ny dheuth ha bos onan a'n tri.

22Benaya mab Yehoyada, gour kolonnek dhiworth Kabseel, a wrug lies gwrians bras; ev a ladhas dew gampyer a Moab. Ynwedh ev eth yn-nans ha ladha lew yn pytt yn dydh erghek. 23Ynwedh ev a ladhas Ejyptyan, gour pymp kevelin y ughelder. An Ejyptyan a'n jeva yn y leuv guw kepar ha gwelenn gwiader; mes Benaya a settyas warnodho gans fust, ha kibya an guw yn-mes a leuv an Ejyptyan, ha'y ladha gans y wuw y honan. 24Yndella o gwriansow Benaya mab Yehoyada, gerys-da yn-mysk an deg warn ugens. 25Ev o moy gerys-da es an deg warn ugens erell, mes ny dheuth ha bos onan a'n tri. Davydh a'n gwrug kapten y gorfwithysi.

26An wer alloesek o Asahel broder Yoab, Elhanan mab Dodo a Bethlehem, 27Shammoth an Harodyas, Heles an Pelonyas, 28Ira mab Ikkesh an Tekoyas, Abiezer an Anathothyas, 29Sibbekay an Hushathyas, Ilay an Aghoghyas, 30Maharay an Netofathyas, Heled mab Baana an Netofathyas, 31Ithay mab Ribay dhiworth Gibea a'n Benyaminysi, Benaya an Pirathonyas, 32Huray dhiworth nansow Gaash, Abiel an Arbathyas, 33Azmaveth an Baharumyas, Elyaghba an Shaalbonyas, 34Hashem an Gizonyas, Yonathan mab Shage an Hararyas, 35Ahiam mab Sakar an Hararyas, Elifal mab Ur, 36Hefer an Mekerathyas, Ahiya an Pelonyas 37Hesro an Karmelyas, Naaray mab Ezbay, 38Yoel broder Nathan, Mibhar mab Hagri, 39Selek an Ammonyas, Naharay an Beerothyas, deger arvow Yoab mab Seruya, 40Ira an Ithryas, Gareb an Ithryas, 41Uria an Hittyas, Zabad mab Aghlay, 42Adina mab Shiza an Rewbenyas, hembrenkyas a'n Rewbenysi ha deg gour warn ugens ganso, 43Hanan mab Maaka, ha Yoshafat an Mithnyas, 44Uzzia an Ashterathyas, Shama ha Yeiel mebyon Hotham an Aroeryas, 45Yediael mab Shimri, hag Yoha y vroder, an Tisyas, 46Eliel an Mahavyas, Yeribay ha Yoshavya, mebyon Elnaam, Ythma an Moabyas, 47Eliel, Obed, ha Yaasiel an Mesobayas.