Kasoryon Devedhys dhe Davydh yn Siklag

1An re ma yw an wer a dheuth dhe Davydh yn Siklag, pan veu stroethys drefenn Sowl mab Kish; kasoryon alloesek ens i, gweresoryon yn batel. 2Gwaregoryon ens, hag i a ylli tenna sethow ha tewlel meyn gans an leuv dhyghow po an leuv gledh; i o Benyaminysi, breder Sowl. 3An penn o Ahiezer, ha Yoash y vroder, mebyon Shemaa an Gibeathyas; Yeziel ha Pelet mebyon Azmaveth, Beraka, Yehu an Anathothyas. 4Yshmaia an Gibeonyas, kasor galloesek yn mysk an deg warn ugens ha hembrenkyas a'n deg warn ugens; Yeremia, Yahaziel, Yohanan, Yozabad an Gederathyas, 5Eluzay, Yerimoth, Bealia, Shemaria, Shefatia an Harufyas; 6Elkana, Ysshia, Azarel, Yoezer ha Yashobeam an Koraghysi; 7Yoela ha Zebadia mebyon Yeroham a Gedor.

8Rann an Gadysi a gildennas dhe Davydh y'n dinas y'n gwylvos. I o kasoryon alloesek ha dyskys yn batel, konnyk gans skoes ha guw. Aga fas o kepar ha fas lewyon hag i o mar skav avel gavrewiges war an menydhyow. 9Ezer an penn, Obadia an nessa, Eliab an tressa, 10Mishmanna an peswora, Yeremia an pympes, 11Attay an hweghves, Eliel an seythves, 12Yohanan an ethves, Elzabad an nawves, 13Yeremia an degves, Makbannay unnegves. 14An Gadysi ma o soedhogyon a'n lu, an lyha anedha o mar galloesek avel kans souder a'n eskar ha'n moyha galloesek o kehaval dhe vil. 15An re ma yw an wer a dreusis an Yordan y'n kynsa mis, pan esa ow fenna oll hy glannow, hag i a fesyas oll tus an nansow dhe'n howldrehevel ha dhe'n howlsedhes.

16Re a vebyon Benyamin ha Yuda a dheuth dhe'n dinas dhe Davydh. 17Davydh eth yn-mes dhe vetya gansa, hag yn-medh ev dhedha, ‘Mar teuvewgh dhymm yn spyrys kres dhe'm gweres, ow holonn a vydh onan genowgh; mes mar teuvewgh dhe'm trayta dhe'm eskerens kyn nag eus drogober y'm diwla, re'gas gwello Duw agan tasow ha'gas keredhi.’ 18Ena an Spyrys a dheuth war Amasay, penn an deg warn ugens, hag ev a leveris,

‘Ni yw dhis, A Davydh,

ni yw genes, A vab Yesse!

Kres, kres dhis,

ha kres dhe'th weresoryon,

rag dha Dhuw a'th weres.’

Ena Davydh a's degemmeras ha'ga gul pennow an bagasow.

19Re a loeth Manasse a gilfias dhe Davydh pan dheuth ev gans an Filistysi rag omladh erbynn Sowl. (Ny's gweresas ev, rag gwahalyethow an Filistysi a omgusulyas ha'y dhannvon dhe-ves ow leverel, ‘Orth peryll dh'agan penn vydh mar kilfi dh'y vester Sowl.’) 20Pan eth Davydh dhe Siklag an re ma a Manasse a gilfias dhodho: Adnagh, Yozabad, Yediael, Mighal, Yozabad arall, Elihu, ha Sillethay, pennow a vilyow yn Manasse. 21I a weresas Davydh erbynn bagasow a ravnoryon; rag i oll o kasoryon alloesek ha kaslewydhyon y'n lu. 22Ytho dydh wosa dydh yth esa gwer ow tos dhe Davydh dh'y weres, bys pan esa lu bras, avel lu Duw.

Kasoryon Junys dhe Davydh yn Hebron

23An re ma yw niverow an wer parys rag batel a dheuth dhe Davydh yn Hebron rag treylya myghterneth Sowl dhodho, war-lergh ger an Arloedh. 24Mebyon Yuda ow toen skoes ha guw o hwegh mil parys rag batel. 25A'n Simeonysi, kasoryon parys rag bresel, seyth mil unn kans. 26A'n Levysi, peswar mil ha hwegh kans. 27Yehoyada o hembrenkyas an Aronysi ha ganso tri mil ha seyth kans; 28Sadok, gour yowynk, kasor galloesek yn kolonnekter, dew gapten warn ugens a ji y das. 29A'n Benyaminysi, breder Sowl, tri mil, may pessa an rann vrassa anedha lel dhe ji Sowl. 30A'n Efraymysi, ugens mil hag eth kans, kasoryon gerys-da yn chi aga thasow. 31A'n hanter-loeth Manasse, etek mil, re bia henwys dhe dhos ha dhe wul Davydh myghtern. 32A vebyon Yssakar, gwer a gonvedhi an termynyow ha godhvos an pyth a dhalvia dhe Ysrael y wul, dew kans penn, hag oll aga breder yn-dann aga arghadow. 33A Zebulun, hanter kans mil souder prevys, parys rag batel gans oll arvow bresel, dhe weres a leun golonn. 34A Naftali, unn vil gapten ha gansa seytek mil warn ugens souder ervys gans skoes ha guw. 35A'n Danysi, eth warn ugens mil hwegh kans, parys rag vatel. 36A Asher, dew-ugens mil souder prevys, parys rag batel. 37A'n Rewbenysi ha'n Gadysi ha'n hanter-loeth Manasse war du arall an Yordan, unn kans ha dew-ugens mil ervys gans pub eghenn arvow bresel.

38Oll an gasoryon ma, arayys rag batel, a dheuth dhe Hebron a leun golonn dhe wul Davydh myghtern war oll Ysrael; keffrys oll remenant Ysrael o unnver dhe wul Davydh myghtern. 39I a spenas tri dydh ena gans Davydh, ow tybri hag owth eva, rag aga breder re dharbarsa dhedha. 40Ynwedh aga hentrevogyon mar bell dhe-ves avel Yssakar, Zebulun ha Naftali a dhros boes war asenes, war gowrvergh, war vulyon ha war oghen. Yth esa palster a vleus, tesennow a figys, tesennow a rappys ha gwin hag oyl, oghen ha deves, rag yth esa lowena yn Ysrael.