Davydh Fastys yn Yerusalem

1Hiram myghtern Tyr a dhannvonas kannasow dhe Davydh, ha prenn keder, gans seri men ha seri prenn ha karpentoryon dhe dhrehevel chi ragdho. 2Davydh a gonvedhas an Arloedh dh'y fastya avel myghtern war Ysrael, ha dhe ughelhe y vyghterneth a-barth y bobel Ysrael.

3Davydh a gemmeras moy gwragedh yn Yerusalem, ha Davydh a dhineythis moy mebyon ha moy myrghes. 4An re ma yw henwyn an fleghes a veu dineythys dhodho yn Yerusalem: Shammua, Shobab, Nathan, Solomon, 5Ybhar, Elishua, Elifelet, 6Noga, Nefeg, Yafia, 7Elishama, Beelyada, hag Elifelet.

Fethans an Filistysi

8Pan glewas an Filistysi Davydh dhe vos untys myghtern war oll Ysrael, oll an Filistysi eth yn-bann dhe hwilas Davydh; mes Davydh a glewas anodho ha mos yn-nans er aga fynn. 9Pan dheuth an Filistysi ha gul omsettyans yn nans Refaim, 10Davydh a wovynnas orth Duw, ‘A wrav vy mones yn-bann erbynn an Filistysi? A wredh aga re y'm leuv?’ An Arloedh a leveris dhodho, ‘Ke yn-bann, ha my a's re y'th leuv.’ 11Ytho i a dheuth yn-bann dhe Baal-perasim, ha Davydh a's fethas ena. Yn-medh ev, ‘An Arloedh re dardhas14:11 dardhas: Ebrow paras, paronomasia war an hanow Baal-perasim. der ow eskerens der ow leuv, kepar dell dardh dowrow.’ Rakhenna i a elwis an tyller na Baal-perasim. 12I a asas aga duwow ena, ha Davydh a ros arghadow hag i a veu leskys yn tan.

13Unnweyth arta an Filistysi a wrug omsettyans y'n nans. 14Pan wovynnas Davydh orth Duw arta, Duw a leveris dhodho, ‘Ny edh yn-bann war aga lergh; ke a-dro a-dryv dhedha ha deus warnedha a-dal an gwydh balsam. 15Pan glewydh son avel keskerdh yn penn an gwydh balsam, ena ke yn-mes dhe'n vatel; rag Duw res eth yn-mes a-dheragos dhe weskel lu an Filistysi.’ 16Davydh a wrug dell erghis Duw dhodho, hag i a weskis lu an Filistysi dhiworth Gibeon bys yn Gezer. 17Ger-da Davydh a lesas der oll an powyow ha'n Arloedh a dhros own anodho war oll an kenedhlow.