An Argh yw Dres dhe Yerusalem

1Ev a dhrehevis chiow ragdho y honan yn sita Davydh, hag ev a dharbaris tyller dhe argh Duw ha lesa tylda rygdhi. 2Ena Davydh a leveris, ‘Ny yll nagonan doen argh Duw marnas an Levysi, rag an Arloedh a's dewisas dhe dhoen argh an Arloedh ha dhe venystra dhodho bys vykken.’ 3Davydh a guntellas oll Ysrael yn Yerusalem dhe dhoen argh an Arloedh yn-bann dh'y thyller re dharbarsa ev dhedhi. 4Davydh a guntellas war-barth mebyon Aron ha'n Levysi: 5a vebyon Kohath, Uriel an pennsevik, ha'y vreder kans hag ugens; 6a vebyon Merari, Asaya an pennsevik, ha'y vreder dew kans hag ugens; 7a vebyon Gershom, Yoel an pennsevik, ha'y vreder kans ha deg warn ugens; 8a vebyon Elisafan, Shemaia an pennsevik ha'y vreder dew kans; 9a vebyon Hebron, Eliel an pennsevik, ha'y vreder peswar ugens; 10a vebyon Uzziel, Amminadab an pennsevik, ha'y vreder kans ha dewdhek.

11Davydh a elwis an oferysi Sadok hag Abiathar, ha'n Levysi Uriel, Asaya, Yoel, Shemaia, Eliel, hag Amminadab, 12ha leverel dhedha, ‘Hwi yw pennow teyluyow an Levysi; sakrewgh agas honan, hwi ha'gas breder, may tryllowgh yn-bann argh an Arloedh, Duw Ysrael, dhe'n tyller re dharbaris vy dhedhi. 13Drefenn na's dugowgh hwi an kynsa prys, an Arloedh agan Duw a dardhas warnan, drefenn na hwilsyn dhiworto y'n vaner ordenys.’ 14Ytho an oferysi ha'n Levysi a sakras aga honan rag dri yn-bann argh an Arloedh, Duw Ysrael. 15Ha'n Levysi a dhug argh Duw war aga diwskoedh gans an gwelynni, dell arghsa Moyses war-lergh ger an Arloedh.

16Davydh a erghis dhe ledyoryon an Levysi apoyntya aga breder avel kanoryon gans daffar menestrouthi, telynnow, sowtris ha symbalys, ow trehevel son lowena. 17Ytho an Levysi a apoyntyas Heman mab Yoel; ha dhiworth y vreder, Asaf mab Berekia; hag a vebyon Merari aga breder, Ethan mab Kushaya; 18ha gansa aga breder a'n nessa ordyr, Zekaria, Ben, Yaaziel, Shemiramoth, Yehiel, Unni, Eliab, Benaya, Maaseya, Mattithia, Elifelehu ha Mikneya, ha'n borthoryon Obed-edom ha Yeiel. 19An ganoryon, Heman, Asaf hag Ethan a vedha ow seni gans symbalys a vrons; 20Zekaria, Aziel, Shemiramoth, Yehiel, Unni, Eliab, Maaseya ha Benaya ow seni telynnow war-lergh Alamoth; 21ha Mattithia, Elifelehu, Mikneya, Obed-edom, Yeiel hag Azaria ow seni sowtris war-lergh Sheminith. 22Kenania, pennkenyas an Levysi, a veu yn charj a'n kana, rag ev dhe vos skentel. 23Berekia hag Elkana a vedha porthoryon rag an argh. 24Shebania, Yoshafat, Nethanel, Amasay, Zekaria, Benaya, hag Eliezer, an oferysi, a vedha ow hwytha an hirgern a-dherag argh Duw. Obed-edom ha Yehia ynwedh a vedha porthoryon rag an argh.

25Ena Davydh ha henavogyon Ysrael, ha kaptenyon an milyow, eth dhe dhri yn-bann argh kevambos an Arloedh dhiworth chi Obed-edom gans lowena. 26Rag Duw dhe weres an Levysi neb a dhug argh kevambos an Arloedh, i a sakrifias seyth tarow ha seyth hordh. 27Davydh a veu gwiskys yn goen a sendal, dell o ynwedh oll an Levysi neb a dhug an argh, ha'n ganoryon, ha'n pennkenyas Kenania a'n jevo charj a'n ganoryon. Davydh ynwedh a wiskas efod lien. 28Oll Ysrael a dhros yn-bann argh kevambos an Arloedh gans garmow, gans son korn, hirgern ha symbalys, ha son telynnow ha sowtris. 29Pan dheuth argh kevambos an Arloedh a-ji dhe sita Davydh, Mikal myrgh Sowl a viras der an fenester, ha gweles myghtern Davydh ow tonsya hag ow lowenhe; ha hi a'n dispresyas yn hy holonn.