Davydh a Worr an Argh yn Tylda

1I a dhros argh Duw, ha'y settya a-ji dhe'n tylda re dhrehavsa Davydh rygdhi; hag i a offrynnas offrynnow leskys hag offrynnow kres dherag Duw. 2Wosa Davydh dhe worfenna offrynna an offrynnow leskys ha'n offrynnow kres, ev a vennigas an bobel yn hanow an Arloedh; 3hag ev a lesrannas dhe oll Ysrael, dhe bub gour ha benyn, torth-vara, rann a gig ha tesenn-rappys.

4Ev a apoyntyas re a'n Levysi dhe venystra a-rag argh an Arloedh, dhe govhe, dhe rassa ha dhe wormel an Arloedh, Duw Ysrael. 5Asaf o an ledyer, ha nessa dhodho Zekaria; ena Yeiel, Shemiramoth, Yehiel, Mattithia, Eliab, Benaya, Obed-edom, ha Yeiel, gans telynnow ha gans sowtris; Asaf a sonas an symbalys, 6ha Benaya ha Yaaziel an oferysi a hwythas hirgern heb hedhi a-rag argh kevambos Duw.

Salm Grasyans Davydh

7Y'n jydh na Davydh a ordenas rag an kynsa gweyth grasyans dhe vos kenys dhe'n Arloedh gans Asaf ha'y vreder.

8Grassewgh dhe'n Arloedh, gelwewgh war y hanow,

derivewgh y wriansow yn mysk an poblow.

9Kenewgh dhodho, kenewgh gormola dhodho,

kewsewgh a'y varthusyon oll.

10Bostyewgh yn y hanow sans;

lowenhes kolonn an re a hwila an Arloedh.

11Hwilewgh an Arloedh ha'y nerth,

hwilewgh y fas pup-prys.

12Perthewgh kov a'y varthusyon re wrug,

y anethow ha breusow y anow,

13A has Ysrael y was,

hwi vebyon Yakob, y bobel dewisys.

14Ev yw an Arloedh agan Duw;

yma y vreusow yn oll an nor.

15Perthewgh kov a'y gevambos bynitha,

an ger a worhemmynnis dhe vil henedh,

16an kevambos a wrug gans Abraham,

ha'n ti a dos dhe Ysak;

17ev a'n ros dhe Yakob avel ordenans,

ha dhe Ysrael avel kevambos bys vykken,

18ow leverel, ‘Dhiso jy y rov pow Kanan

avel kevrenn dha ertach.’

19Pan ens i hwath boghes aga niver,

pur voghes, hag alyons y'n tir,

20ha pan ethons a unn genedhel dhe genedhel arall,

a unn wlaskor dhe bobel arall,

21ny asas ev denvyth dhe wul kamm dhedha;

yn tevri ev a geredhis myghternedh ragdha,

22ow leverel, ‘Na dochyewgh an re untys genev,

ha na bystigewgh ow frofoesi.’

23Kenewgh dhe'n Arloedh, oll an nor.

Derivewgh y selwyans a dhydh dhe dhydh.

24Derivewgh y wolewder yn mysk an kenedhlow,

y wriansow marthys yn mysk oll an poblow.

25Rag meur yw an Arloedh, ha pur wiw yw y wormel;

res yw perthi own anodho dres oll duwow.

26Rag oll duwow an bobel yw idolys,

mes an Arloedh a wrug an nevow.

27Yma enor ha meuredh a-dheragdho;

yma nerth ha lowena yn y sentri.

28Rewgh dhe'n ARLOEDH, hwi deyluyow a'n poblow,

rewgh dhe'n Arloedh gordhyans ha nerth.

29Rewgh dhe'n Arloedh an gordhyans a dhegoedh dh'y hanow;

drewgh offrynn, ha dewgh a-dheragdho.

Gordhyewgh an Arloedh yn tekter sansoleth;

30kren a-dheragdho, oll an norvys;

an bys ynwedh a vydh fast, nevra ny vydh gwayys.

31Bedhes an nevow heudhik ha lowenhes an norvys,

ha leverens yn mysk an kenedhlow, ‘An Arloedh a reyn!’

32Tarennes an mor, ha myns eus ynno,

lowenhes an gwel, ha pup-tra eus ynno.

33Ena gwydh an koes a gan gans lowena a-rag an Arloedh,

rag ev a dheu dhe vreusi an norvys.

34Grassewgh dhe'n Arloedh, rag da yw,

rag y dregeredh a dhur bys vykken.

35Leverewgh: ‘Salw ni, A Dhuw agan selwyans,

ha kuntell ni war-barth ha delirv ni yn-mes a'n kenedhlow,

may hwodhven gras dhe'th hanow sans,

ha bostya y'th wormola.

36Benniges re bo an Arloedh, Duw Ysrael,

trank heb worfenn.’

Hag oll an bobel a leveris, ‘Amen’ ha gormel an Arloedh.

An Levysi Apoyntys rag an Tempel

37Davydh a asas Asaf ha'y vreder ena a-rag argh kevambos an Arloedh dhe venystra heb hedhi a-rag an argh, herwydh edhomm pub dydh. 38Ev a asas Obed-edom mab Yeduthun ha Hosa avel porthoryon. Obed-edom gans y vreder o eth ha tri-ugens. 39Ev a asas Sadok an oferyas ha'y vreder an oferysi a-rag tabernakel an Arloedh y'n tyller ughel yn Gibeon, 40dhe offra offrynnow leskys dhe'n Arloedh war an alter a offrynn leskys heb hedhi myttin ha gorthugher, war-lergh pup-tra yw skrifys yn lagha an Arloedh a erghis ev dhe Ysrael. 41Gansa yth esa Heman ha Yeduthun ha remenant an re a veu dewisys ha henwys yn tiblans dhe rassa dhe'n Arloedh, rag y dregeredh dhe dhur bys vykken. 42Heman, ha Yeduthun a'n jevo hirgern ha symbalys rag an menestrouthi ha daffar rag kanow sans. Ha mebyon Yeduthun o desedhys orth an porth.

43Ena oll an bobel a dhibarthas peub dh'y ji, ha Davydh eth tre dhe salusi y vayni.