Messaj Nathan dhe Davydh

1Pan esa myghtern Davydh trigys yn y ji, ev a leveris dhe Nathan an profoes, ‘Otta, yth esov trigys yn chi a brenn keder, mes yma argh kevambos an Arloedh yn-dann groglennow tylda.’ 2Yn-medh Nathan dhe Davydh, ‘Gwra pynag usi y'th vrys, rag yma Duw genes.’

3Mes y'n keth nos na ger Duw a dheuth dhe Nathan, ow leverel: 4Ke ha lavar dhe'm gwas Davydh: Yndellma y lever an Arloedh: Nyns yw ty neb a dhrehav ragov chi dhe driga ynni. 5Rag ny drigis yn chi a-dhia'n jydh may tres Ysrael yn-bann bys y'n jydh ma, mes my res eth a dylda dhe dylda hag a gampva dhe gampva. 6Yn oll tylleryow may kerdhis a-dro gans oll Ysrael, a gewsis vy ger orth onan a vreusysi Ysrael, a erghis dhe vugelya ow fobel, ow leverel, ‘Prag na'm drehevsowgh chi a brenn keder?’ 7Lemmyn ytho, ty a lever dhe'm gwas Davydh: Yndellma y lever Arloedh an luyow: My a'th kemmeras dhiworth an beurva, dhiworth holya an deves, dhe vos pennsevik war ow fobel Ysrael; 8ha my re beu genes plepynag yth ythys, ha my re droghas dhe-ves oll dha eskerens a-dheragos; ha my a wra ragos hanow meur kepar ha hanow tus veur an norvys. 9Ha my a apoynt tyller rag ow fobel Ysrael, ha my a wra aga flansa ena, may yllons triga yn aga thyller aga honan, ha ny vydhons ankresys namoy; ha ny wra mebyon sherewneth aga flagya namoy, kepar ha kyns, 10hag a-dhia'n termyn may settis breusysi war ow fobel Ysrael; ha my a feth oll dha eskerens.

Mes my a dhiskler dhis, an Arloedh dhe dhrehevel chi ragos. 11Pan vydh kollenwys dha dhydhyow rag ty dhe vos gans dha dasow, my a dhrehav dha has war dha lergh, neb a vydh onan a'th vebyon, ha my a fast y vyghterneth. 12Ev a dhrehav chi ragov, ha my a fast y thron bys vykken. 13My a vydh tas dhodho, hag ev a vydh mab dhymm. Ny gemmerav ow thregeredh dhiworto, kepar dell y's kemmeris dhiworth dha ragresegydh, 14mes my a'n sett y'm chi hag y'm gwlaskor bys vykken ha'y dron a vydh fastys bynitha. 15Herwydh oll an geryow ma, ha herwydh oll an welesigeth ma, Nathan a gewsis dhe Davydh.

Pysadow Grasyans Davydh

16Ena myghtern Davydh eth a-ji hag esedha dherag an Arloedh ha leverel, ‘Piw ov vy, A Arloedh Duw, ha pandr'yw ow chi, ma'm dresys bys omma? 17Tra vyghan o y'th wolok, A Dhuw; ty re gewsis ynwedh a ji dha was rag termyn hir dhe dhos. Ty a wra vri ahanav avel den a dhegre ughel, A Arloedh Duw! 18Pandr'a yll Davydh leverel moy dhis rag ty dhe enora dha was? Rag ty a aswonn dha was. 19A Arloedh, a-barth dha was, ha war-lergh dha vodh dha honan, ty re wrug oll an dra vras ma, ow tisklerya oll an traow bras a dheu. 20A Arloedh, nyns eus, nagonan avelos, ha nyns eus Duw marnas ty, war-lergh pup-tra a glewsyn gans agan diwskovarn. 21Py kenedhel arall war an nor yw haval dhe'th pobel Ysrael, mayth eth Duw dh'aga dasprena dhe vos y bobel, ow kul ragos hanow rag gwriansow bras hag euthyk, ow fesya kenedhlow a-dherag dha bobel a dhasprensys mes a Ejyp? 22Ty a wrug dha bobel Ysrael dha bobel dha honan bys vykken, ha ty, A Arloedh, a dheuth ha bos aga Duw.

23‘Ha lemmyn, A ARLOEDH, bedhes fastys bys vykken an ger re gewssys a-dro dhe'th was hag a-dro dh'y ji, ha gwra kepar dell gewssys. 24Yndellma dha hanow a vydh fastys ha meurhes bys vykken, ha tus a lever, “Arloedh an luyow, Duw Ysrael, yw Duw Ysrael”. Ha chi dha was Davydh a vydh fastys dheragos. 25Rag ty, ow Duw, re dhiskwedhas dhe'th was ty dhe dhrehevel chi ragdho; ytho dha was re gavas kolonn dhe bysi a-ragos. 26Ha lemmyn, A Arloedh ty yw Duw, ha ty re ambosas an dra da ma dhe'th was. 27Bedhes plegadow dhis lemmyn benniga chi dha was, may pessyo a-dheragos bys vykken; rag an pyth re vennigsys A Arloedh, yw benniges bys vykken.’