Tryghow Davydh

1Wosa hemma, Davydh a weskis an Filistysi ha'ga iselhe, hag ev a gemmeras Gath ha'y threvow yn-mes a vaystri an Filistysi.

2Ev a fethas Moab, ha'n Moabysi a dheuth ha bos gostydh dhe Davydh, ow tri trubyt dhodho.

3Davydh a weskis Hadadezer myghtern Soba Hamath, pan esa ow mos dhe fastya y vaystri18:3 dhe fastya y vaystri: Po dhe dhrehevel y beul kov. ryb an avon Ewfrates. 4Davydh a gemmeras dhiworto mil jarett, seyth mil varghek hag ugens mil droesek. Davydh a evredhis oll mergh an charettow, mes ev a asas lowr anedha rag kans charett. 5Pan dheuth Aram Damaskus dhe weres Hadadezer myghtern Soba, Davydh a weskis Aram, ha ladha dew vil wour warn ugens. 6Ena Davydh a settyas savleow-gwithysi18:6 savleow-gwithysi: Ow siwya an Septuagint ha 2Sa 8:6. Nyns usi an geryow y'n tekst ebrow. yn Aram Damaskus; hag Aram eth ha bos gostydh dhe Davydh, ow tri trubyt. Yth esa an Arloedh ow ri trygh dhe Davydh plepynag yth e. 7Davydh a gemmeras an skoesow a owr degys gans gwesyon Hadadezer, ha'ga dri dhe Yerusalem. 8Dhiworth Tibhath ha dhiworth Kun, sitys Hadadezer, Davydh a gemmeras shour a vrons; may hwrug myghtern Solomon gansa an mor a vrons, an kolovenyow ha'n lestri a vrons.

9Pan glewas Tou18:9 Tou: Leverys To-u. myghtern Hamath Davydh dhe fetha oll lu Hadadezer myghtern Soba, 10ev a dhannvonas y vab Hadoram dhe vyghtern Davydh, dh'y salusi ha dh'y geslowenhe drefenn ev dhe omladh erbynn Hadadezer ha'y fetha; rag Hadadezer re bia yn fenowgh ow preseli gans Tou. Hadoram a dhros pub eghenn lestri a owr, a arghans, hag a vrons. 11An re ma ynwedh myghtern Davydh a sakras dhe'n Arloedh, war-barth gans an arghans ha'n owr re dhegsa dhiworth oll an kenedhlow ma: dhiworth Edom, Moab, an Ammonysi, an Filistysi hag Amalek.

12Abishay mab Seruya, a ladhas etek mil Edomyas yn nans an Hoelan. 13Ev a settyas savleow-gwithysi yn Edom; hag oll an Edomysi a dheuth ha bos gostydh dhe Davydh. Ha'n Arloedh a ros trygh dhe Davydh plepynag yth e.

Menystrans Davydh

14Davydh a reynyas war oll Ysrael; hag ev a wrug gwirvreus hag ewnder rag oll y bobel. 15Yoab mab Seruya o kaslewydh an lu, ha Yehoshafat mab Ahilud o kovadhor; 16Sadok mab Ahitub hag Ahimelek mab Abiathar, o oferysi; Shavsha o skrifennyas; 17Benaya mab Yehoyada a'n jevo charj a'n Kerethysi ha'n Pelethysi; mebyon Davydh o penn-soedhogyon yn servis an myghtern.