1Ena Davydh a leveris, ‘Hemma a vydh chi an Arloedh Duw ha hemma a vydh alter an offrynn leskys rag Ysrael.’

Davydh a Bareus rag Drehevyans an Tempel

2Davydh a erghis dhe'n alyons esa trigys yn pow Ysrael bos kuntellys war-barth, hag ev a settyas re anedha dhe vos treghoryon men dhe bareusi meyn rag drehevel chi Duw. 3Ev a brovias kals horn rag an kentrow rag darasow an yetow ha rag an bynsow, keffrys ha kals brons re vras dhe boesa, 4ynwedh prennyer keder na allsons bos niverys, rag tus Sidonysi ha Tyr a dhros shour a geder dhe Davydh. 5Davydh a leveris, ‘Solomon ow mab yw yowynk ha heb prevyans, ha'n chi a vydh drehevys rag an Arloedh a dal bos bras-oberys, gerys-da ha glorifiys der oll powyow; rakhenna my a wra darbar dhodho.’ Ytho Davydh a dharbaris yn hel kyns y vernans.

Charj Davydh dhe Solomon

6Ena ev a elwis Solomon y vab hag erghi dhodho drehevel chi rag an Arloedh, Duw Ysrael. 7Davydh a leveris dhe Solomon, ‘Ow mab, yth esa y'm brys drehevel chi rag hanow an Arloedh, ow Duw. 8Mes ger an Arloedh a dheuth dhymm, ow leverel, “Ty re skoellyas meur a woes ha goestla breselyow bras; ny dhrehevydh chi dhe'm hanow, drefenn ty dhe skoellya kemmys goes a-ragov war an dor. 9Awotta, mab a vydh genys dhis; ev a vydh gour a bowes ha my a re dhodho powes dhiworth oll y eskerens a-dhedro. Y hanow a vydh Solomon, ha my a re kres ha diogeledh dhe Ysrael yn y dhydhyow. 10Ev a dhrehav chi rag ow hanow; ev a vydh mab dhymm ha my a vydh tas dhodho; ha my a fast tron y vyghterneth war Ysrael bys vykken.” 11Lemmyn, ow mab, re bo an Arloedh genes, may sewenni ha drehevel chi an Arloedh dha Dhuw dell gewsis ev ahanas. 12Re wrontyo an Arloedh dhis furneth ha konvedhes may hwitthi lagha an Arloedh dha Dhuw pan re ev dhis charj war Ysrael. 13Ena ty a sewen mar kwaytydh gwitha an ordenansow ha'n breusow a erghis an Arloedh dhe Moyses rag Ysrael. Bydh krev, hag a golonn dha. Na borth own, na vydh digolonnek. 14Otta, dre ow ober kales, my re brovias rag chi an Arloedh kans mil dalent a owr, milvil dalent a arghans, ha myns a vrons ha horn na yllir aga foesa; prenn ha men ynwedh my re brovias. Res vydh dhis keworra dhe'n re ma. 15Ty a'th eus meur a oberwesyon: treghoryon men, seri men, seri prenn ha kreftoryon, skentel yn pub sort a greft 16yn owr, arghans, brons ha horn, na yllir aga nivera. Sav yn-bann ha dalleth an ober ha re bo an Arloedh genes.’

17Davydh ynwedh a erghis dhe oll hembrenkysi Ysrael gweres Solomon y vab, ow leverel, 18‘A nyns usi an Arloedh agas Duw genowgh? Hag ev re ros powes dhywgh a bub tenewen? Rag ev re dhelivras trigoryon an pow yn ow leuv, hag yma'n pow fethys a-rag an Arloedh ha'y bobel. 19Lemmyn settyewgh agas kolonn ha'gas enev dhe hwilas an Arloedh agas Duw. Sevewgh yn-bann ha drehevewgh sentri an Arloedh Duw, may fo dres argh kevambos an Arloedh ha lestri sans Duw a-berth y'n chi drehevys rag hanow an ARLOEDH.’