Teyluyow Levysi ha'ga Gweythresow

1Pan o myghtern Davydh koth ha leun a dhydhyow, ev a wrug Solomon y vab myghtern war Ysrael.

2Myghtern Davydh a guntellas war-barth oll hembrenkysi Ysrael, gans an oferysi ha'n Levysi. 3An Levysi, deg warn ugens bloedh ha moy a veu niverys, ha'n sommenn o etek mil wour warn ugens. 4‘Peswar mil warn ugens anedha a'n jevydh charj a'n ober yn chi an ARLOEDH, hwegh mil a vydh soedhogyon ha breusysi, 5peswar mil a vydh porthoryon ha peswar mil a wormel an Arloedh gans an daffar menestrouthi re wrug rag gormel.’ 6Davydh a's kevrennas yn bagasow herwydh kordhow mebyon Levi: Gershon, Kohath ha Merari.

7Mebyon Gershon: Ladan ha Shimei. 8Mebyon Ladan: Yehiel an penn, Zetham ha Yoel, tri. 9Mebyon Shimei: Shelomoth, Haziel, ha Haran, tri. An re ma o pennow teyluyow Ladan. 10Mebyon Shimei: Yahath, Zina, Yeush ha Beria. An peswar ma o mebyon Shimei. 11Yahath o an penn, ha Ziza an nessa; mes ny's tevo Yeush ha Beria lies mab, hag i a veu reknys avel unn kordh.

12Mebyon Kohath: Amram, Yshar, Hebron, hag Uzziel, peswar. 13Mebyon Amram: Aron ha Moyses. Aron a veu diberthys gans y vebyon bys vykken dhe sakra an taklow moyha sans, dhe leski offrynnow a-rag an Arloedh, dhe venystra dhodho ha dhe leverel bennathow yn y hanow bys vykken. 14Mes mebyon Moyses, gour Duw, a veu henwys yn mysk loeth Levi. 15Mebyon Moyses: Gershom hag Eliezer. 16Mebyon Gershom: Shebuel o an penn. 17Mebyon Eliezer: Rehabia an penn. Eliezer ny'n jevo mebyon arall mes mebyon Rehabia o fest lies. 18Mebyon Yshar: Shelomith an penn. 19Mebyon Hebron: Yeria an penn, Amaria an nessa, Yahaziel an tressa, ha Yekameam an peswora. 20Mebyon Uzziel: Mika an penn, hag Ysshia an nessa.

21Mebyon Merari: Mahli ha Mushi. Mebyon Mahli: Eleazar ha Kish. 22Eleazar a verwis ha ny'n jevo mebyon vyth, mes unnsel myrghes; ha'ga breder, mebyon Kish, a's demmedhis. 23Mebyon Mushi: Mahli, Eder ha Yeremoth, tri.

24An re ma o mebyon Levi war-lergh pennow aga theyluyow – pennow teyluyow dell vons kovskrifys war-lergh niver an henwyn a wer ugens bloedh ha moy. I a wre an ober rag servis chi an Arloedh. 25Rag Davydh a leveris, ‘An Arloedh, Duw Ysrael, re ros powes dh'y bobel; hag ev a drig yn Yerusalem bys vykken. 26Ytho nyns yw res na fella dhe'n Levysi doen an tabernakel na'n daffar rag y servis’ – 27rag war-lergh diwettha geryow Davydh, an Levysi a veu niverys a ugens bloedh ha moy.

28Aga dever o oberi ryb tenewen an oferysi, mebyon Aron, ha dhe weres yn servis chi an Arloedh, gans charj a'n klosow, an chambouryow, purheans oll an taklow sans, hag ober arall rag servis chi Duw; 29dhe weres ynwedh gans bara an wolok, an bleus fin rag an offrynn greun, tesennow tanow an bara heb goell, an offrynn pebys war veyn-pobas, an tesennow rond kemmyskys gans oyl, hag oll musuryow a vyns po a vraster. 30Pub myttin i a sev ow ri grasow ha gormel dhe'n Arloedh, ha keffrys yn gorthugher, 31ha peskweyth mayth yw offrynnys offrynnow leskys dhe'n Arloedh yn sabotys, yn loeryow nowydh hag yn dy'goelyow, herwydh an niver rekwirys anedha, heb hedhi a-dherag an Arloedh. 32I a's tevydh charj a dylda an kuntelles ha'n sentri, ha gweres aga breder, mebyon Aron, y'n servis chi an Arloedh.