Rannow an Oferysi

1Hemm yw rannow mebyon Aron: Mebyon Aron o Nadab, Abihu, Eleazar, hag Ithamar. 2Nadab hag Abihu a verwis kyns aga thas, ha ny's tevo mebyon, ytho Eleazar hag Ithamar a servyas avel oferysi. 3Gans gweres Sadok a vebyon Eleazar hag Ahimelek a vebyon Ithamar, Davydh a's ordenas yn rannow herwydh deverow aga servis. 4Niver an ledyoryon yn mysk mebyon Eleazar o brassa es an re yn mysk mebyon Ithamar, ytho rynnys vons yndella: hwetek penn teylu a vebyon Eleazar, hag eth penn teylu a vebyon Ithamar. 5I a's kevrennas ow tewlel prenn, heb faverans, rag yth esa soedhogyon an sentri ha soedhogyon Duw yn mysk mebyon Eleazar ha keffrys yn mysk mebyon Ithamar. 6An skriba Shemaia mab Nethanel, Levyas, a's kovadhas a-rag an myghtern, an bennsevigyon, Sadok an oferyas, Ahimelek mab Abiathar, ha pennow teyluyow an oferysi ha'n Levysi; unn teylu a veu dewisys rag Eleazar hag onan dewisys rag Ithamar.

7An kynsa prenn a goedhas dhe Yehoyarib, an nessa dhe Yedaya, 8an tressa dhe Harim, an peswora dhe Seorim, 9an pympes dhe Malkia, an hweghves dhe Miyamin, 10an seythves dhe Hakkos, an ethves dhe Abia, 11an nawves dhe Yeshua, an degves dhe Shekania, 12an unnegves dhe Elyashib, an dewdhegves dhe Yakim, 13an trydhegves dhe Huppa, an peswardhegves dhe Yeshebeab, 14an pymthegves dhe Bilga, an hwetegves dhe Immer, 15an seytegves dhe Hezir, an etegves dhe Happisses, 16an nownsegves dhe Pethahia, an ugensves dhe Yehezkel 17an kynsa warn ugens dhe Yakin, an nessa warn ugens dhe Gamul, 18an tressa warn ugens dhe Delaya, an peswora warn ugens dhe Maazia. 19An re ma o restri aga servis pan dhens yn ji an Arloedh war-lergh an rewlys res dhedha gans Aron aga thas, dell arghsa an Arloedh, Duw Ysrael, dhodho.

Levysi Erell

20Mebyon erell Levi: a vebyon Amram, Shubael; mebyon Shubael: Yehdeya. 21A Rehabia: mebyon Rehabia, Ysshia an penn. 22A'n Ysharysi: Shelomoth; a vebyon Shelomoth, Yahath. 23Mebyon Hebron: Yeria an penn, Amaria an nessa, Yahaziel an tressa, Yekameam an peswora. 24Mebyon Uzziel, Mika; Mebyon Mika: Shamir. 25Broder Mika: Ysshia; a vebyon Ysshia, Zekaria. 26Mebyon Merari: Mahli ha Mushi, ynwedh Yaazia y vab.24:26 ynwedh Yaazia y vab: Amendys. 27Mebyon Merari, a Yaazia: Beno, Shoham, Zakkur, hag Ibri. 28A Mahli: Eleazar, na'n jevo mebyon. 29A Kish, mab Kish: Yerahmeel. 30Mebyon Mushi: Mahli, Eder ha Yerimoth. An re ma o mebyon an Levysi herwydh chi aga thasow. 31An re ma ynwedh a dewlis prenn, kepar dell wrug aga breder mebyon Aron a-rag Davydh an myghtern ha Sadok hag Ahimelek, ha pennow teyluyow an tasow a'n oferysi ha'n Levysi. Teylu broder kottha a veu dyghtys y'n keth vaner avel teylu broder yowynka.