Bagasow Porthoryon

1Ottomma rannow an borthoryon: a'n Koraghysi: Meshelemia mab Kore, a vebyon Asaf. 2Mebyon Meshelemia: Zekaria an kynsa-genys, Yediael an nessa, Zebadia an tressa, Yathniel, an peswora, 3Elam an pympes, Yehohanan an hweghves, Eliehoenay an seythves. 4Mebyon Obed-edom: Shemaia an kynsa-genys, Yehozabad an nessa, Yoagh an tressa, Sakar an peswora, Nethanel an pympes, 5Ammiel an hweghves, Yssakar an seythves, Peullethay an ethves; rag Duw re'n bennigsa. 6Dh'y vab Shemaia y feu dineythys mebyon, o rewloryon yn chi aga thasow, rag i dhe vos gwer a alloes bras. 7Mebyon Shemaia: Othni, Refael, Obed, hag Elzabad, ha'y vreder Elihu ha Semakia o gwer a alloes bras. 8Oll an re ma o mebyon Obed-edom gans aga mebyon ha'ga breder, gwer a alloes bras, hag abel rag an servis, dew ha tri-ugens dhe Obed-edom. 9Meshelemia a'n jevo mebyon ha breder, gwer a alloes bras, etek. 10Hosa, a vebyon Merari, a'n jevo mebyon: Shimri an penn (kyn nag o ev an kynsa-genys, y das a'n gwrug an penn), 11Hilkia an nessa, Tebalia an tressa, Zekaria an peswora: oll mebyon ha neskerens Hosa o trydhek.

12An rannow ma a'n borthoryon, henwys war-lergh aga fennow, a's tevo deverow, kepar dell wrug aga breder, ow menystra yn chi an Arloedh. 13I a dewlis prenn rag pub teylu, byghan po bras kyn fe, rag pub yet. 14An prenn rag an howldrevel a goedhas dhe Shelemia. I a dewlis prenn ynwedh rag y vab Zekaria, kusulyer doeth, ha'y brenn a dheuth yn-mes rag an gledhbarth. 15Prenn Obed-edom a dheuth yn-mes rag an dhyghowbarth, ha dh'y vebyon rag an withva. 16Rag Shuppim ha Hosa ev a dheuth yn-mes rag yet an howlsedhes war-barth gans yet Shalleketh, war an fordh yn-bann.

Yth esa gwithyas ryb gwithyas. 17Pub dydh yth esa hwegh Levyas y'n howldrevel, peswar y'n gledhbarth, peswar war an dhyghowbarth, keffrys ha dew orth pub gwithva; 18Ogas dhe'n portal a'n howlsedhes yth esa peswar ryb an fordh ha dew orth an portal hi honan. 19An re ma o rannow an borthoryon yn mysk mebyon Koragh ha mebyon Merari.

Porthoryon yw Apoyntys rag Tresorva an Tempel

20A'n Levysi, Ahiya a'n jevo charj a dresorvaow chi Duw ha tresorvaow an rohow sakrys. 21Mebyon Ladan, diyskynnys dhiworth Gershon dre Ladan hag o pennow teyluyow Ladan an Gershonyas: Yehieli. 22Mebyon Yehieli: Zetham ha Yoel y vroder, gans charj war dresorvaow chi an Arloedh. 23A'n Amramysi, an Ysharysi, an Hebronysi, ha'n Uzzielysi: 24Shebuel mab Gershom, mab Moyses, o pennsoedhek gans charj war an tresorvaow. 25Y vreder dre Eliezer: y vab Rehabia, y vab Yeshaia, y vab Yoram, y vab Zikri, ha'y vab Shelomoth. 26Shelomoth ha'y vreder o charjys gans oll tresorvaow an rohow sakrys re bia sakrys gans Davydh an myghtern ha gans pennow teyluyowow o kaptenyon milyow ha kansow, ha gans kaslewydhyon erell an lu. 27Dhiworth an preydh re bia gwaynys yn batelyow i a sakras rohow rag mentons chi an Arloedh. 28Ha pup-tra sakrys gans Samuel an gwelesydh, gans Sowl mab Kish, gans Abner mab Ner, ha gans Yoab mab Seruya – yth esa pub ro sakrys yn gwith Shelomoth ha'y vreder.

29A'n Ysharysi: Kenania ha'y vebyon a veu apoyntys dhe dheverow tu a-ves rag Ysrael, avel soedhogyon ha breusysi. 30A'n Hebronysi: Hashabia ha'y vreder, mil ha seyth kans gour a alloes, apoyntys rag menystrans Ysrael a'n howlsedhes dhe'n Yordan, rag oll ober an Arloedh ha rag servis an myghtern. 31A'n Hebronysi: Yeriya o penn an Hebronysi war-lergh kovadhow aghskrif aga theyluyow. Y'n dew-ugensves blydhen a reyn Davydh hwithrans a veu gwrys ynna, ha gwer abel yn aga mysk a veu kevys yn Yazer yn Gilead. 32Myghtern Davydh a'n apoyntyas ev ha'y vreder, dew vil seyth kans gour a alloes, pennow teyluyow, dhe worweles an Rewbenysi, an Gadysi ha hanter-loeth Manasse rag pup-tra ow pertaynya dhe Dhuw ha ha'n myghtern.