An Rannow Breselek

1Homm yw rol an Ysraelysi, pennow teyluyow, kaptenyon milyow ha kansow ha'ga soedhogyon a servya an myghtern yn pup-tra ow tochya dhe'n rannow a dho a-ji hag e yn-mes mis wosa mis dre der oll misyow an vlydhen. Pub rann a's tevo peswar mil wour warn ugens.

2Yashobeam mab Zabdiel a'n jevo charj a'n kynsa rann y'n kynsa mis; yth esa peswar mil warn ugens yn y rann. 3Ev o diyskynnyas Peres ha penn oll kaslewydhyon an lu rag an kynsa mis. 4Doday an Aghoghyas a'n jevo charj a'n rann rag an nessa mis; Mikloth o ledyer y rann; yn y rann yth esa peswar mil warn ugens. 5An tressa kaslewydh, rag an tressa mis, o Benaya, mab Yehoyada an arghoferyas; ev o an ledyer, hag yn y rann yth esa peswar mil warn ugens. 6Hemm yw an Benaya neb o kasor yn mysk an deg warn ugens ha dres an deg warn ugens; Ammizabad y vab a'n jevo charj a'y rann. 7An peswora, rag an peswora mis, o Asahel broder Yoab, ha'y vab Zebadia war y lergh; yn y rann yth esa peswar mil warn ugens. 8An pympes, rag an pympes mis, o an kaslewydh Shamhuth, an Yzraghyas; hag yn y rann yth esa peswar mil warn ugens. 9An hweghves, rag an hweghves mis, o Ira mab Ikkesh an Tekoyas; yn y rann yth esa peswar mil warn ugens. 10An seythves, rag an seythves mis, o Heles an Pelonyas, a vebyon Efraym; yn y rann yth esa peswar mil warn ugens. 11An ethves, rag an ethves mis, o Sibbekay an Hushathyas, a deylu Zeragh; yn y rann yth esa peswar mil warn ugens. 12An nawves, rag an nawves mis, o Abiezer an Anathothyas, a'n Benyaminysi; yn y rann yth esa peswar mil warn ugens. 13An degves, rag an degves mis, o Maharay an Netofathyas a deylu Zeragh; yn y rann yth esa peswar mil warn ugens. 14An unnegves, rag an unnegves mis, o Benaya an Pirathyas, a vebyon Efraym; yn y rann yth esa peswar mil warn ugens. 15An dewdhegves. rag an dewdhegves mis, o Helday an Netofathyas, a deylu Othniel; yn y rann yth esa peswar mil warn ugens.

Pennsevigyon an Loethow

16Dres loethow Ysrael, an pennsevik rag an Rewbenysi o Eliezer mab Zikri; rag an Simeonysi, Shefatia mab Maaka; 17rag Levi, Hashabia mab Kemuel; rag Aron, Sadok; 18rag Yuda, Elihu, onan a vreder Davydh; rag Yssakar, Omri mab Mighal; 19rag Zebulun, Yshmaia mab Obadia; rag Naftali, Yeremoth mab Azriel; 20rag Efraym, Hoshea mab Azazia; rag hanter-loeth Manasse, Yoel mab Pedaya; 21rag hanter-loeth Manasse yn Gilead, Iddo mab Zekaria; rag Benyamin, Yaasiel mab Abner; 22rag Dan, Azarel mab Yeroham. An re ma o pennsevigyon loethow Ysrael. 23Mes ny niveras Davydh an re yn-dann ugens bloedh, rag an Arloedh re ambossa gul Ysrael mar bals avel ster an nevow. 24Yoab mab Seruya a dhallathas nivera mes ny worfennas; sorr a goedhas war Ysrael ragdho, ha ny veu an niver gorrys yn Kroniklys myghtern Davydh.

Soedhogyon Tresorva an Myghtern

25War dresorvaow an myghtern yth esa Azmaveth mab Adiel; ha war dresorvaow y'n powdir, y'n sitys, y'n trevow hag y'n touryow yth esa Yonathan mab Uzzia; 26war an re esa ow konis an dor yth esa Ezri mab Kelub; 27war an gwinlannow yth esa Shimei an Ramathyas; ha war askorr an gwinlannow rag dorgellow an gwin yth esa Zabdi an Shifmyas. 28War an olewbrennyer ha'n sykaminwydh y'n Shefela yth esa Baal-hanan an Gederyas; war withvaow an oyl yth esa Yoash. 29War an greow a beuri yn Sharon yth esa Shitray an Sharonyas; ha war an greow y'n nansow yth esa Shafat, mab Adlay. 30War an kowrvergh yth esa Obil an Yshmaelyas; war an kasegi-asen yth esa Yeghdeya an Meronothyas; 31war an flokkys yth esa Yaziz an Hagryas. Oll an re ma a'n jevo charj a bythow myghtern Davydh.

32Yonathan, ewnter Davydh, o kusulyer, gour fur, ha skriba; hag yth esa Yehiel mab Hakmoni gans mebyon an myghtern. 33Ahithofel o kusulyer an myghtern, ha Hushay an Arkyas o koweth an myghtern. 34War-lergh Ahithofel, Yehoyada mab Benaya, hag Abiathar o kusulyoryon an myghtern. Yoab o kaslewydh lu an myghtern.