Salusyans ha Grasyans

1Powl, gelwys dre volonjedh Duw dhe vos abostol a Grist Yesu, ha'gan broder Sosthenes,

2Dhe eglos Duw usi yn Korinth, dhe'n re sanshes yn Krist Yesu, gelwys may fens i syns, gans oll an re na, yn pub tyller, a gri war hanow agan Arloedh Yesu Krist, Arloedh keffrys dhedha i ha dhyn ni: 3Gras dhywgh hwi ha kres dhiworth Duw agan Tas ha'n Arloedh Yesu Krist.

4Dhe Dhuw y grassav pup-prys ragowgh, drefenn bos gras Duw res dhywgh yn Krist Yesu, 5rag yn pub fordh hwi re beu gwrys kevoethek ynno ev, yn kows ha skentoleth a bub eghenn – 6kepar dell veu dustuni Krist krevhes ynnowgh – 7ma na fyllowgh hwi a ro spyrysel vyth, ha hwi ow kwaytya gans mall diskwedhyans agan Arloedh Yesu Krist. 8Ynwedh ev a wra agas krevhe bys y'n diwedh, may fowgh hwi divlam yn dydh agan Arloedh Yesu Krist. 9Lel yw Duw; ganso ev hwi a veu gelwys a-bervedh yn kowethyans y Vab ev, Yesu Krist agan Arloedh.

Folsyow y'n Eglos

10My a'gas pys, breder, dre hanow agan Arloedh Yesu Krist, may leverrowgh an keth tra, na vo folsyow vyth yn agas mysk, mes may fowgh hwi kesunys y'n keth brys hag y'n keth kowses. 11Rag y feu derivys dhymm gans tus Kloe, bos strifow yntredhowgh, ow breder. 12An pyth a vynnav dhe styrya yw hemma: pub huni ahanowgh a lever ‘Dhe Powl yth ov evy’, po ‘Dhe Apollos yth ov evy’, po ‘Dhe Kefas yth ov evy’, po ‘Dhe Grist yth ov evy.’ 13Yw Krist rynnys? A veu Powl krowsys ragowgh? Po a vewgh hwi besydhys yn hanow Powl? 14Dhe Dhuw y hwonn gras na vesydhis nagonan ahanowgh marnas Krispus ha Gayus, 15ma na alla denvyth leverel y fewgh besydhys y'm hanow vy. 16(Mayni Stefanas a vesydhis ynwedh; dres henna, ny wonn mar pesydhis ken onan vyth.) 17Rag Krist ny'm dannvonas rag besydhya mes rag aweyla, – ha henna heb skentoleth freth, ma na vo krows Krist gwakhes a'y nerth.

Krist, an Galloes ha'n Furneth a Dhuw

18Rag an ger a-dro dhe'n grows yw follneth dhe'n re usi ow mos dhe goll, mes dhyn nyni usi ow pos selwys, nerth Duw yth ywa. 19Rag skrifys yw,

‘My a wra distrui skentoleth an dus skentel,

ha skians an dus fur my a wra y lettya.’

20Ple'ma'n den fur? Ple'ma'n den konnyk y'n lagha? Ple'ma'n dadhlor a'n oes ma? A ny wrug Duw dhe skentoleth an bys bos foll? 21Rag yn skentoleth Duw, a-ban na wrug an bys aswonn Duw dre skentoleth, Duw a veu plesys, dre follneth an pyth a veu pregewthys, dhe selwel an re a grys. 22Rag Yedhewon a wovynn toknys ha Grekys a hwila skentoleth, 23mes ni a bregoth Krist krowsys, sklander dhe Yedhewon ha follneth dhe Jentilys, 24mes dhe'n re neb yw selwys, keffrys Yedhewon ha Grekys, Krist nerth Duw ha skentoleth Duw. 25Rag follneth Duw yw moy skentel ages skentoleth mab-den, ha gwannder Duw yw kreffa ages krevder mab-den.

26Prederewgh a'gas galow agas honan, breder: nyns o nameur ahanowgh skentel war-lergh savonow mab-den, nyns o nameur galloesek, nyns o nameur genys a'n goes ughel, 27mes Duw a dhewisas an traow yw foll y'n bys rag tyli moethow war an dus skentel; Duw a dhewisas an traow yw gwann y'n bys rag gul bismer dhe'n re grev; 28Duw a dhewisas an traow isel ha dispresys y'n bys, an re nag yw travyth, may tefentya taklow hag yw neppyth, 29ma na vostya denvyth dherag Duw. 30Anodho ev yth esowgh hwi yn Krist Yesu, neb a dheuth ha bos ragon ni skentoleth dhiworth Duw, hag ewnder ha sansheans ha daspren. 31Rakhenna, dell yw skrifys, ‘Neb a vostyo, bostyes y'n Arloedh.’