Gwarnyans erbynn Gordhyans Idolys

1Ny vynnav, breder, hwi dhe vos heb godhvos bos agan tasow oll yn-dann an gommolenn, hag i oll a dremenas der an mor, 2hag oll a veu besydhys yn Moyses, y'n gommolenn hag y'n mor, 3hag oll a dhybris an keth boes spyrysel, 4hag oll a evas an keth diwes spyrysel; rag i a evas a'n garrek spyrysel a'ga siwyas, ha'n garrek o Krist. 5Byttegyns, gans an brassa rann anedha Duw nyns o pes da; rag domhwelys vons y'n difeyth.

6Gwarnyansow dhyn ni yw an traow ma, ma na vo dhyn hwans a dhrog, par dell esa dhedha i. 7Na vewgh gordhyoryon idolys, kepar ha rann anedha, dell yw skrifys, ‘An bobel a wrug esedha rag dybri hag eva ha sevel rag gwari.’ 8Ny goedh dhyn omri dhe fornikasyon, par dell wrug rann anedha, hag yn unn jydh y ferwis tri mil warn ugens. 9Ny goedh dhyn previ Krist10:9 Krist: War-lergh re a'n dornskrifow an Arloedh. par dell wrug rann anedha, hag a vons distruys gans serf; 10ha na grodhvolewgh par dell wrug rann anedha, hag y fons ledhys gans an distruer. 11Lemmyn an traow ma a hwarva yn ensampel dhedha i, mes skrifys vons rag agan keski ni, may teuva keweras an oesow warnan. 12Rakhenna, neb eus ow tybi y sev ev, kemmeres with ma na goettho. 13Ny dheuva warnowgh temptasyon vyth nag yw kemmyn dhe vab-den. Lel yw Duw, ha ny wra ev agas gasa dhe vos temptys dres agas nerth, mes keffrys ha'n temptasyon ri fordh a dhiank a wra ev, rag may hyllowgh y berthi.

14Rakhenna, ow haradowyon, fiewgh dhiworth gordhyans idolys. 15My a gews orthowgh, tus fur dell owgh; gwrewgh hwyhwi breusi an pyth a lavarav. 16An hanaf a vennath hag a vennigyn, a nyns yw kevrenna yn goes Krist? An bara hag a derryn, a nyns yw kevrenna yn korf Krist? 17A-ban eus unn dorth-vara, ni neb yw lies unn korf yw, drefenn ni dhe gevrenna an keth bara. 18Mirewgh orth usadow Ysrael: a nyns yw an re a dheber an sakrifisow kevrennoryon a'n alter? 19Pandra, ytho, a lavarav? Bos offrynn dhe idol neppyth, po bos idol neppyth? 20Na, mes an pyth a sakrifions,10:20 a sakrifions: War-lergh re a'n dornskrifow a sakrifi an Jentilys. i a'n sakrifi dhe dhywolow, kammenn dhe Dhuw; ny vynnav orthowgh dos ha bos kevrennoryon gans dywolow. 21Ny yllowgh hwi eva hanaf an Arloedh ha hanaf dywolow; ny yllowgh hwi kevrenna a voes an Arloedh hag a voes dywolow. 22A wren ni gul dhe'n Arloedh perthi avi? On ni kreffa agesso ev?

Gwra Pup-tra dhe Wordhyans Duw

23‘Lafyl yw pup-tra’, mes nyns yw pup-tra dhe les; ‘lafyl yw pup-tra’, mes ny wra pup-tra drehevel. 24Na hwiles denvyth y dhader y honan, mes dader den arall. 25Dybrewgh pypynag yw gwerthys y'n varghas-kig heb hwithra travyth drefenn kowses; 26rag ‘dhe'n Arloedh yw an nor, ha pup-tra eus ynno.’ 27Onan a'n dhiskryjygyon mara'gas gelow dhe gevewi, ha mar mynnowgh mos, dybrewgh pup-tra yw settys a-ragowgh heb hwithra travyth drefenn kowses. 28Mes mar lever nebonan dhywgh, ‘Hemma re beu offrynnys yn sakrifis’, na'n dybrewgh, ow kul vri orth neb a leveris dhywgh hag drefenn kowses, 29y gowses ev, a-der agas kowses hwi. Prag y koedh ow rydhses vy bos breusys gans kowses den arall? 30Mar kemmerav dre ras, prag yth ov vy kablys rag an pyth a rassav.

31Ytho, po dybri po eva a wrewgh, po pypynag a wrewgh, pup-tra dhe wordhyans Duw gwrewgh. 32Na wrewgh offens vyth dhe Yedhewon, na dhe Grekys, na dhe eglos Duw, 33par dell blegyav evy dhe dus oll yn pup-tra a wrav, heb hwilas ow les ow honan, mes an les a lies, may fons selwys.