Kudhlenna an Penn yn Gordhyans

1Gwrewgh war ow lergh, par dell wrav vy war-lergh Krist. 2My a'gas kommend drefenn hwi dhe berthi kov ahanav yn pup-tra, ha dhe synsi yn fast an hengovyow par dell y's res dhywgh. 3Mes my a vynn orthowgh godhvos bos Krist penn pub gour ha bos an gour penn benyn ha bos Duw penn Krist. 4Pub gour ow pysi po ow profoesa ha'y benn kudhlennys a dhisenor y benn, 5mes pub benyn ow pysi po ow profoesa ha'y fenn heb kudhlenn a dhisenor hy fenn, kepar ha pan ve hi bloghhes yth yw. 6Rag benyn mar nyns yw kudhlennys, bedhes knyvys; mes mars yw divlas dhe venyn bos knyvys po bloghhes, bedhes kudhlennys. 7Rag ny goedh dhe wour kudhlenna y benn, rag ev dhe vos imaj ha golewder Duw; mes benyn yw golewder gour. 8Rag gour nyns yw a venyn, mes benyn a wour; 9yn tevri, gour ny veu gwrys rag benyn, mes benyn rag gour. 10Rakhenna, y koedh dhe venyn gorra tokyn hy awtorita war hy fenn, a-barth an eledh. 11Byttegyns y'n Arloedh naneyl benyn ny sev heb gour, na gour heb benyn; 12rag benyn dell yw dhiworth gour, yndella yw gour dre venyn; mes pup-tra dhiworth Duw yw. 13Breusewgh yntredhowgh agas honan: a dhelledh dhe venyn heb kudhlenn pysi dhe Dhuw? 14Natur hy honan, a ny dhysk dhywgh bos disenor dhe wour ha ganso gols hir, 15mes bos golewder dhe venyn ha gensi gols hir? – drefenn bos res dhedhi an gols hir rag kudhlenn. 16Mars yw bodh nebonan dhe vos kavyllek, nyns eus usadow a'n par na dhyn ni na dhe eglosyow Duw.

Fara Anwiw orth Soper an Arloedh

17Mes y'n gorhemmynnow a siw ny'gas kommendyav, drefenn na omguntellowgh rag an gwell mes rag an gweth. 18Kynsa, pan omguntellowgh yn eglos, my a glew bos folsyow yntredhowgh hag yn rann my a'n krys. 19Rag y telledh bos eresys yntredhowgh may fons aswonnys an re yntredhowgh yw gwiryon. 20Pan omguntellowgh war-barth, nyns yw dhe dhybri soper an Arloedh; 21rag, dhe brys boes, pub huni a gemmer y goen heb gortos, ha rakhenna an eyl a'n jeves nown, y gila yw medhow. 22Dar! A nyns eus dhywgh chiow may hyllowgh dybri hag eva? Po a dhispresyowgh eglos Duw ha shamya an re na's teves travyth? Pandr'a allav vy dhe leverel dhywgh? A wrav vy agas kommendya? Y'n kas ma, ny'gas kommendyav.

Fondyans Soper an Arloedh

Mat 26:26-30; Mark 14:22-26; Luk 22:15-20

23Rag my a dhegemmeras dhiworth an Arloedh an pyth a res vy ynwedh dhywgh hwi: an Arloedh Yesu, y'n nos may feu traytys, a gemmeras bara, 24ha wosa ri gras, ev a'n torras ha leverel, ‘Hemm11:24 Hemm: War-lergh re a'n dornskrifow Tannewgh, dybrewgh, hemm. yw ow horf hag yw ragowgh;11:24 hag yw ragowgh: War-lergh re a'n dornskrifow hag yw terrys ragowgh. gwrewgh hemma yn kovadh ahanav vy.’ 25Keffrys y'n keth vaner an hanaf, wosa soper, ow leverel, ‘An hanaf ma yw an kevambos nowydh y'm goes vy; gwrewgh hemma, peskweyth ma'n yffowgh, yn kovadh ahanav vy.’ 26Rag peskweyth may typprowgh an bara ma hag eva an hanaf, mernans an Arloedh a dherivowgh erna dheffo.

Kevrenna Anwiw yn Soper an Arloedh

27Rakhenna, piwpynag a dheppro an bara po a effo hanaf an Arloedh yn fordh anwiw, kablus vydh a gorf hag a woes an Arloedh. 28Mes preves den y honan, hag ena dybres a'n bara hag eves a'n hanaf; 29rag piwpynag a dheppro hag eva heb aswonn an korf,11:29 hag eva heb aswonn an korf: War-lergh re a'n dornskrifow hag eva yn anwiw heb aswonn korf an Arloedh. a dheber hag eva breus warnodho y honan. 30Henn yw prag yth yw rann ahanowgh gwann ha klav hag y koskas rann. 31Mes mar preussen ni agan honan yn hwir, ny vien ni breusys; 32mes pan on ni breusys gans an Arloedh, keskys on ma na vyn ni dampnys war-barth ha'n bys.

33Ytho, ow breder, pan omguntellowgh rag dybri, gortewgh an eyl y gila. 34Mars eus nown dhe nebonan, dybres yn chi, ma na omguntellowgh dhe vreus. A-dro dhe'n traow erell, my a's orden pan dhov.