Rohow Spyrysel

1Lemmyn, a-dro dhe daklow spyrysel, breder, ny vynnav orthowgh bos heb godhvos. 2Dell wodhowgh, pan ewgh hwi paganys, dynys vewgh, ledys yn stray dhe idolys avlavar, yn py fordh pynag y fewgh ledys. 3Rakhenna my a afydh dhywgh na lever denvyth ‘Milliges12:3 Milliges: Greka Anathema. re bo Yesu’ hag ev ow kewsel dre Spyrys Duw, keffrys na yll denvyth leverel ‘Yesu yw an Arloedh’ marnas der an Spyrys Sans.

4Lemmyn rohow a lies eghenn yma, mes an keth Spyrys; 5ha soedhow a lies eghenn yma, mes an keth Arloedh; 6hag oberyansow a lies eghenn yma, mes an keth Duw yw a ober pup-tra yn tus oll. 7Mes dhe bub huni yw res diskwedhyans an Spyrys rag an les kemmyn. 8Rag dhe onan yw res der an Spyrys lavar a skentoleth, dhe onan arall lavar a wodhvos herwydh an keth Spyrys, 9dhe onan arall fydh der an keth Spyrys, ha dhe onan arall rohow a yaghheans der an keth12:9 keth: War-lergh re a'n dornskrifow unn. Spyrys, 10dhe onan arall galloes dhe oberi merklys, dhe onan arall profoesans, dhe onan arall godhvos dhe dhissernya yntra spyrysyon, dhe onan arall divers tavosow, ha dhe onan arall styr tavosow; 11hag oberys yw oll an traow ma gans an unn ha'n keth Spyrys, neb a re, dell vynn ev, dhe gettep penn y rann y honan.

Unn Korf gans Lies Esel

12Rag kepar dell yw an korf onan, ha ganso lies esel, (mes eseli an korf, kynth yns lies, yw unn korf), yndella ynwedh yw Krist. 13Rag der unn Spyrys ni oll a veu besydhys yn unn korf, Yedhewon po Grekys, kethyon po tus rydh, ha dhyn ni oll y feu gwrys dhe eva yn unn Spyrys.

14Rag devri, an korf nyns yw a unn esel, mes a lies. 15Mar lavarra an troes, ‘Drefenn nag ov leuv, nyns ov rann a'n korf’, ny via byttele rann a'n korf. 16Ha mar lavarra an skovarn, ‘Drefenn nag ov lagas, nyns ov rann a'n korf’, ny via byttele rann a'n korf. 17Mar pe oll an korf lagas, ple fia an skovarn? Mar pe oll an korf klewes, ple fia tastya? 18Ytho, lemmyn Duw a worras an eseli, kettep onan, y'n korf par dell vynnas. 19Mar pe i oll unn esel, ple fia an korf? 20Lemmyn lies esel yma, mes unn korf. 21An lagas ny yll leverel dhe'n leuv, ‘Nyns eus dhymm edhomm ahanas’, na'n penn dhe'n treys, ‘Nyns eus dhymm edhomm ahanowgh’; 22mes moy es henna, rannow an korf hag a hevel bos gwanna yw anhepkorradow, 23ha rannow an korf hag yw le enorys, dell dybyn, yn kyrghynn an re ma ni a sett enor brassa, ha'gan rannow anonest yw dyghtys gans bern brassa, 24ma nag eus edhomm anodho dh'agan rannow onest. Mes Duw re gesunyas an korf y'n for' ma, ow ri enor brassa dhe'n rann may fyll enor dhedhi, 25ma na vo fols vyth y'n korf, mes may kemmerro an eseli an keth bern an eyl a'y gila. 26Mar kodhev unn esel, an eseli oll a wodhev ganso; mars yw enorys unn esel, an eseli oll a lowenha war-barth.

27Lemmyn, hwi yw korf Krist, hag eseli anodho kettep penn. 28Ha Duw re ordenas y'n eglos, kynsa abesteli, nessa profoesi, tressa dyskadoryon, ena galloes dhe oberi merklys, ena rohow a yaghheans, a ri sokor, a venystra, a dhivers tavosow. 29Yw peub oll abesteli? Yw peub oll profoesi? Yw peub oll dyskadoryon? A ober peub oll merklys? 30Yw dhe beub oll galloes dhe yaghhe? A gews peub oll yn tavosow? A yll peub oll ri styryow? 31Mes yeunewgh yn ter an rohow ughella. Ha my a wra diskwedhes dhywgh fordh hwath bryntinna.