Tavosow ha Profoesansow

1Siwyewgh kerensa, mes yeunewgh yn ter an rohow spyrysel, yn arbennik may profoessowgh. 2Rag ev neb usi ow kewsel yn taves ny gews orth tus, mes orth Duw; rag ny'n konvedh denvyth, mes ev a gews kevrinyow y'n Spyrys; 3mes neb eus ow profoesa a gews orth tus rag aga drehevyans, aga hennerth ha'ga honfort. 4Neb usi ow kewsel yn taves a dhrehav y honan; mes neb usi ow profoesa a dhrehav an eglos. 5My a vynn orthowgh hwi oll kewsel yn tavosow, mes moy es henna, profoesa; neb a brofoes yw brassa ages neb a gews yn tavosow, marnas nebonan a styr, may fo an eglos drehevys.

6Lemmyn, breder, mar tov vy dhywgh ow kewsel yn tavosow, fatell vydhav dhe les dhywgh marnas my a gews orthowgh yn diskwedhyans, po yn godhvos, po yn profoesans, po yn dyskas? 7Ha taklow heb bewnans ow seni, po pib po telynn, mar ny wrons sonyow diblans, fatell wodhor an pyth yw pibys po an pyth yw telynnys? 8Rag hirgorn mar tyllo son nag yw diblans, piw a wra ombareusi rag an gas? 9Y'n keth vaner ma, marnas yn taves hwi a re lavar diblans, fatell wodhor an pyth yw leverys? Rag ow kewsel y'n ayr y fydhowgh. 10Heb mar, lies yeth dhihaval yma y'n bys, ha nagonan heb styr: 11byttegyns mar ny wonn styr an yeth, barbarus dhe'n kowser vydhav, ha'n kowser barbarus vydh dhymmo vy. 12Yndella hwi ynwedh; a-ban owgh hwi ter rag rohow an Spyrys, hwilewgh may fo dhywgh pals anedha, rag drehevyans an eglos.

13Rakhenna, y koedh dhe neb a gews yn taves pysi rag galloes dhe styrya. 14Rag mar pysav yn taves, ow spyrys a bys, mes ow brys nyns yw heb frut. 15Pandr'a wrav vy, ytho? Pysi gans an spyrys my a wra, ha pysi gans an brys ynwedh; kana gans an spyrys my a wra, ha kana gans an brys ynwedh. 16Poken mar pennigydh y'n spyrys, fatell yll nebonan usi ynter an re heb dyskans leverel ‘Amen’ dhe'th grasyans, pan na woer an pyth a leverydh? 17Rag yth es'ta ow kodhvos gras yn ta lowr, mes nyns yw an den arall drehevys. 18Dhe Dhuw y hwonn gras my dhe gewsel yn tavosow moy agesowgh hwi oll; 19byttegyns, y'n eglos gwell via genev leverel pymp ger gans ow brys, may tysken re erell, ages deg mil er yn taves.

20Breder, na vedhewgh fleghes yn agas tybyans, mes bedhewgh babanes yn droktra, hag yn tybyans bedhewgh adhves. 21Y'n lagha skrifys yw,

‘Dre boblow a davosow ankoth

ha dre weusyow estrenyon

kewsel a wrav orth an bobel ma,

ha na hwath ny wrons i goslowes orthiv’,

yn-medh an Arloedh. 22Yndella tavosow nyns yw tokyn rag kryjygyon mes rag diskryjygyon, ha nyns yw profoesans rag diskryjygyon mes rag kryjygyon. 23Rakhenna, ha'n eglos kowal kuntellys war-barth ha peub oll ow kewsel yn tavosow, mar teu a-ji re heb dyskans, po diskryjygyon, a ny wrons i leverel agas bos gorboellek? 24Mes mars usi peub oll ow profoesa, hag y teu a-ji diskryjyk po den heb dyskans, keredhys yw gans peub, ha breusys gans peub, 25kevrinyow y golonn diskudhys yw; rakhenna, koedhys dhe'n dor, gordhya Duw a wra ev hag avowa bos Duw yntredhowgh yn tevri.

Pup-tra dhe Vos Gwrys yn Fordh Gempenn

26Ytho, pandr'a wrewgh hwi, ow breder? Pan omguntellowgh, pub huni a'n jeves hymna, po dyskans, po diskwedhyans, po taves, po styryans. Pup-tra bedhes gwrys rag drehevyans. 27Mar kews tus yn taves, ny res bos saw dew, po tri dhe'n moyha, ha peub war y dorn, hag onan styryes; 28mes mar nyns eus denvyth dhe styrya, tewes pub huni y'n eglos, ha kewses orto y honan hag orth Duw. 29Dew po tri frofoes kewsens; ha'n re erell, breusens; 30mes mars yw neppyth diskwedhys dhe nebonan usi owth esedha ena, tewes an kynsa. 31Rag hwi oll a yll profoesa, onan hag onan, may fo pubonan dyskys ha pubonan kennerthys; 32ha spyrysyon profoesi yw rewlys gans profoesi. 33Rag Duw nyns yw Duw a dheray mes a gres. Kepar hag yn oll eglosyow an syns, 34y koedh dhe'n benynes tewel y'n eglosyow: rag ny's teves kummyas a gewsel, mes bedhens gostydh, par dell lever ynwedh an lagha. 35Mars yw neppyth hag a vynnons y wodhvos, govynnens orth aga gwer yn chi; rag divlas yw dhe venyn kewsel y'n eglos. 36A wrug ger Duw dalleth genowgh hwi, po a ny dheuth saw dhywgh hwi?

37Mar tyb nebonan y vos profoes, po spyrysel, y koedh dhodho avowa bos an pyth a skrifav dhywgh arghadow an Arloedh. 38Mar ny aswonn hemma, na vedhes ev aswonnys. 39Ytho, ow breder, bedhewgh ter dhe brofoesa, ha na dhifennewgh kewsel yn tavosow; 40mes pup-tra bedhes gwrys dell dhelledh hag yn fordh gempenn.