Dasserghyans Krist

1Lemmyn my a dhre dh'agas kov, breder, an aweyl hag a bregewthis dhywgh, hag a dhegemmersowgh, keffrys may sevowgh ynni, 2keffrys mayth owgh selwys dredhi, mar synsowgh yn fast an ger a bregewthis dhywgh, marnas yn euver y kryssowgh.

3Rag my a ystynnas dhywgh yn kynsa an pyth a dhegemmeris vy ynwedh, Krist dhe verwel rag agan peghosow herwydh an skryptors, 4ha bos ynkleudhys, ha dasserghys dhe'n tressa dydh, herwydh an skryptors; 5hag yth omdhiskwedhas dhe Kefas, ena dhe'n dewdhek. 6Wosa henna ev a omdhiskwedhas dhe voy es pymp kans broder oll war-barth, mayth yw an moyha rann anedha hwath yn few, kyn koskas re. 7Wosa henna ev a omdhiskwedhas dhe Jamys, ena dhe'n abesteli oll. 8Gordhiwedh, avel dhe onan genys kyns y dermyn, ev a omdhiskwedhas dhymmo vy ynwedh. 9Rag an lyha a'n abesteli yth ov, anwiw dhe vos gelwys abostol, drefenn my dhe helghya eglos Duw; 10mes dre ras Duw yth ov vy an pyth hag yth ov, ha nyns o euver y ras orthiv. Yn kontrari, my a lavuryas yn kreffa agessa oll, kyn nag o my, mes gras Duw usi genev. 11Byttegyns, po my po i, yndella ni a bregoth hag yndella hwi a grysis.

Dasserghyans an Re Varow

12Lemmyn, mars yw Krist pregewthys avel onan re beu drehevys dhiworth an re varow, fatell yll rann ahanowgh leverel nag eus dasserghyans a'n re varow? 13Mes mar nyns eus dasserghyans a'n re varow, ena Krist ny veu drehevys; 14ha mar ny veu Krist drehevys, euver yw agan pregoth, hag euver yw agas fydh. 15Keffrys kevys on ni fals dhustunioryon a Dhuw, rag ni dhe dhustunia a Dhuw ev dhe dhrehevel Krist, neb na wrug ev y dhrehevel mars yw gwir nag yw drehevys an re varow. 16Rag mar nyns yw drehevys an re varow, na hwath ny veu Krist drehevys; 17ha mar ny veu drehevys Krist, euver yw agas fydh, hag yth esowgh hwi hwath yn agas peghosow. 18Keffrys an re neb re goskas yn Krist, dhe goll galsons. 19Mar ny'gan beus govenek yn Krist saw y'n bewnans ma, moy truedhek on ni ages tus oll.

20Mes Krist yn hwir re beu drehevys dhiworth an re varow, kynsa frut an re a goskas. 21Rag dell dheuth ankow der unn den, der unn den ynwedh y teuth dasserghyans an re varow. 22Rag dell verow oll yn Adam, yndella ynwedh yn Krist oll a vydh gwrys yn few. 23Mes peub yn y dorn y honan: Krist an kynsa frut: wosa henna, orth y dhevones, an re yw dhe Grist. 24Ena y teu an diwedh, pan dhaskorr ev an wlaskor dhe Dhuw an Tas, wosa distrui pub prynsipata ha pub potestas ha pub maystri. 25Rag res yw dhodho reynya bys pan worro oll y eskerens yn-dann y dreys. 26An eskar diwettha dhe vos distruys yw ankow; 27rag ‘ev re worras pup-tra yn-dann y dreys.’ Mes pan leverir ‘pup-tra dhe vos gorrys yn-danno’, diblans, nag yw reknys yn hemma ev neb re worras pup-tra yn-danno. 28Pan yw pup-tra gorrys yn-danno, ena an Mab y honan a vydh gostydh dhe neb re worras pup-tra yn-danno, may fo Duw oll yn oll.

29Poken pyth a wrons i neb yw besydhys a-barth an re varow? Mar nyns yw drehevys mann an re varow, prag yth yns i besydhys a-barth dhedha?

30Ha prag yth eson ni ow peryllya pub eur? 31Pub dydh y farwav – my a'n avow, breder, dre ow bostyans a-dro dhywgh hag a'm beus yn Krist Yesu agan Arloedh. 32Mar omledhis vy orth goedhviles yn Efesus rag skilys nag o saw a dhensys,15:32 a dhensys: Po war-lergh gis mab-den py les yw dhymm? Mar nyns yw drehevys an re varow,

‘Gwren dybri hag eva,

rag a-vorow y ferwyn.’

33Na vedhewgh toellys:

‘Drok-keskowethyans a shynd norter da.’

34Dewgh dhe skians sad hag ewn, ha na beghewgh namoy. Rag tus yma, na aswonnons Duw; hemma my a lever dh'agas meth.

Korf an Dasserghyans

35Mes nebonan a wra govynn, ‘Fatell yw an re varow drehevys? Gans py par korf y tons i?’ 36Ty wokki! An pyth a hesydh ny wra bewa marnas ev a verow; 37ha'n pyth a hesydh nyns yw an korf a vydh wosa hemma, mes greunenn noeth, martesen a waneth po a neb ys arall; 38mes Duw a re dhodho korf dell dhewisas, ha dhe bub sort a has y gorf y honan. 39Rag nyns yw kehaval kig oll, mes unn sort rag tus yma, onan arall rag bestes, onan arall rag ydhyn hag onan arall rag puskes. 40Yma korfow a nev ha korfow a nor; mes golewder an korf a nev yw unn dra, ha golewder an korf a nor yw tra arall. 41Yma unn golewder a'n howl, ha golewder arall a'n loer, ha golewder arall a'n ster; rag an eyl sterenn yw dihaval dhe sterenn arall yn golewder.

42Yndella yw dasserghyans an re varow. An pyth yw hesys yn podredhes, dastrehevys yw yn anpodredhes. 43Yn disenor yth yw hesys, yn golewder yth yw dastrehevys; yn gwannder yth yw hesys, yn nerth yth yw dastrehevys; 44korf a'n bys ma yth yw hesys, korf spyrysel yth yw drehevys. Mars eus korf a'n bys ma, korf spyrysel yma ynwedh. 45Yndella skrifys yw, ‘An kynsa den Adam a dheuth ha bos enev bew’; an Adam diwettha a dheuth ha bos spyrys a re bewnans. 46Mes nyns yw an korf spyrysel hag yw an kynsa, mes korf a'n bys ma, ha wosa henna an korf spyrysel. 47A'n dor yth o an kynsa den, den a dhoust; a nev yth yw an nessa den. 48Par dell o an den a dhoust, yndella yw an re neb yw a dhoust; ha par dell yw an den a nev, yndella yw an re neb yw a nev. 49Par dell dhugon ni hevelep an den a dhoust, ni a wra doen ynwedh hevelep an den a nev.

50Hemma my a lever, breder: kig ha goes ny yllons erita gwlaskor Duw, na podredhes ny erit anpodredhes. 51Otta, my a lever kevrin dhywgh. Ny wren ni oll koska, mes ni oll a vydh chanjys, 52yn pols, war blynch lagas, orth an hirgorn diwettha. Rag an hirgorn a wra seni, ha'n re varow a vydh drehevys heb podredhes bynitha, ha chanjys vydhyn ni. 53Rag res yw dhe'n korf ma a beder gwiska anpodredhes, ha dhe'n korf marwel gwiska anvarwoleth. 54Ha pan wra an dra bodradow ma omwiska yn anpodredhes, ha'n dra varwel ma omwiska yn anvarwoleth, ena y hwyrvydh an ger yw skrifys,

‘Ankow yw kollenkys yn trygh.’

55‘A ankow, ple'ma dha drygh?

A ankow, ple'ma dha vros?’

56Bros ankow yw peghadow, ha nerth peghadow yw an lagha; 57Mes re bo grasow dhe Dhuw, neb a re dhyn an trygh der agan Arloedh Yesu Krist.

58Rakhenna, ow breder meurgerys, bedhewgh len, fyrv, pup-prys ow palshe yn gonis an Arloedh, ow kodhvos nag yw euver agas lavur y'n Arloedh.