Kuntell an Rohow rag an Syns

1Lemmyn a-dro dhe guntell an rohow rag an syns: par dell erghis vy dhe'n eglosyow a Galatia, yndella gwrewgh hwi ynwedh. 2Dhe gynsa dydh pub seythun, pub huni ahanowgh gorres neppyth a-denewen ha'y witha, dell sewenno, ma na vo edhomm a guntell pan dhyffiv. 3Ha pan dhyffiv, my a wra dannvon piwpynag a gommentyowgh, ha gansa lytherow, may tokkons agas ro dhe Yerusalem, 4ha mar tesedh dhymm mos ynwedh, i a wra mos genev.

Towlow rag Vyajya

5My a wra dos dh'agas gweles wosa tremena dre Makedonia, rag tremena a wrav dre Makedonia, 6ha martesen my a wra triga genowgh po devri spena an gwav, ma'm dannvennowgh y'm hyns plepynag yth ylliv. 7Rag ny vynnav agas gweles pan nag esov marnas ow tremena; my a wayt spena hirneth genowgh, mar re an Arloedh kummyas. 8Mes my a wra gortos yn Efesus bys yn Penkost, 9rag daras efan hag effeythus yw igerys dhymm rag gonis meur y les, hag yma meur a dus usi ow sevel er agan pynn.

10Mar teu Timothi, gwaytyewgh ma'n gwryllowgh bos heb own yntredhowgh, rag ow kul gonis an Arloedh ymava, kepar ha my. 11Ytho, na'n dispresys denvyth. Dannvenewgh ev yn y hyns yn kres, may teffo dhymm; rag my a'n gorta gans an vreder.

12A-dro dh'agan broder Apollos, meur my a ynnias warnodho may teffa dhywgh gans an vreder, mes nyns o y vodh mann dhe dhos lemmyn. Ev a wra dos pan vo dhodho spas.

13Bedhewgh hewoel, sevewgh fast y'n fydh, bedhewgh hardh, bedhewgh krev. 14Pup-tra hag a wrewgh, bedhes gwrys yn kerensa.

15Tra arall a vynnav, breder: hwi a woer bos mayni Stefanas an kynsa frut yn Aghaia, hag i re omros dhe wonis dhe'n syns; 16my a'gas ynni may fowgh gostydh dhe dus a'n par na, ha dhe bub kesoberer ha lavuryer. 17Heudhhes ov orth devedhyans Stefanas ha Fortunatus hag Aghaikus, rag i a astiveras dhymm a-ban nag esowgh hwi omma. 18Rag i a dhiskwithas ow spyrys vy ha'gas spyrys hwi keffrys. Ytho, aswonnewgh tus a'n par na.

19An eglosyow a Asia a'gas salus. Akwila ha Priska, ha gansa an eglos yn aga chi, a'gas salus yn kolonnek y'n Arloedh. 20An vreder oll a'gas salus. Salusewgh an eyl y gila gans bay sans.

21An salusyans yw gans ow leuv ow honan, Powl. 22Neb na gar an Arloedh, bedhes milliges. Re dheffo agan Arloedh! 16:22 Re dheffo agan Arloedh: Aramaek maranatha. 23Gras agan Arloedh Yesu re bo genowgh. 24Ow herensa re bo genowgh hwi oll yn Krist Yesu. Amen.16:24 War-lergh re a'n dornskrifow nyns usi omma an ger Amen.