Kesoberoryon rag Duw

1Ha my, breder, ny yllis vy kewsel orthowgh hwi kepar ha pan vewgh tus spyrysel, mes avel tus a'n kig, avel fleghesigow yn Krist. 2Leth my a ros dhywgh; ny res vy boes, rag nag ewgh hwi parys ragdho. Yn hwir, hwath nyns owgh parys, 3rag hwath a'n kig yth owgh. Rag a-ban eus avi ha kedrynn yn agas mysk, a nyns owgh hwi a'n kig, hag a nyns esowgh hwi owth omdhegi kepar ha tus kemmyn? 4Yndella nebonan pan lever ‘Dhe Powl yth ov evy’, ha den arall ‘Dhe Apollos yth ov evy’, a nyns owgh hwi marnas denel?

5Ytho, pyth yw Apollos? Pyth yw Powl? Gwesyon dredha may kryssowgh par dell ros an Arloedh dhe gettep onan. 6My a blansas, Apollos a dhowras, mes Duw a wrug dhe devi. 7Rakhenna naneyl neb a blans na neb a dhowr ny vern, saw unnsel Duw neb a wra dhe devi. 8Neb a blans ha neb a dhowr yw parow, ha kettep onan a wra degemmeres y wober herwydh y wonis y honan. 9Rag ni yw kesoberoryon Duw; hwi yw park gonedhys Duw, drehevyans Duw.

10Herwydh gras Duw res dhymm, avel pennser sleygh my a worras sel, hag yma nebonan arall ow trehevel warnedhi. Mes y koedh dhe gettep onan bos war fatell dhrehav ev warnedhi, 11rag denvyth ny yll gorra sel marnas an sel re beu gorrys, hag yw Yesu Krist. 12Mar trehav nebonan, ytho, war an sel gans owr, arghans, meyn drudh, prenn, goera, kala, 13ober kettep penn a wra dos ha bos apert, rag an jydh a wra y dhiskwedhes, rag y fydh diskwedhys gans tan, ha'n tan a wra previ py par ober re beu gwrys gans kettep penn. 14Mar tur an ober a veu drehevys gans nebonan, ev a dhegemmer y bewas. 15Mars yw leskys ober nebonan, ev a wra perthi koll, mes ev y honan a vydh selwys, byttegyns par dell vo gans tan.

16A ny wodhowgh hwi agas bos tempel Duw ha bos Spyrys Duw trigys ynnowgh? 17Mar tistru nebonan tempel Duw, Duw a dhistru an den na; rag sans yw tempel Duw, ha'n tempel na yth owgh hwi.

18Na omdoelles denvyth; nebonan ahanowgh mar tesev y vos skentel y'n oes ma, des ha bos foll, may teffo ha bos skentel. 19Rag skentoleth an bys ma yw follneth gans Duw. Rag skrifys yw,

‘Ev a vagel an dus skentel yn aga felder’,

20hag arta,

‘An Arloedh a woer prederow an dus skentel,

i dhe vos euver.’

21Ytho, nagonan na vostyes a-dro dhe dus. Pup-tra yw dhywgh hwi: 22kyn fo Powl po Apollos po Kefas po an bys po bewnans po ankow po taklow y'n dydhyow ma po traow a dheu – oll an re ma yw dhywgh hwi, 23ha hwi yw dhe Grist, ha Krist yw dhe Dhuw.