Menystrans an Abesteli

1Yndella y koedh dhe dus agan akontya avel gwesyon Krist ha rennysi kevrinyow Duw. 2Dres henna, hwilys yw yn rennysi, aga bos prevys lel. 3Byttegyns ny'm deur mann ow bos breusys genowgh hwi po gans breuslys vytholl a vab-den; ha my ynwedh, ny ombreusav, 4rag ny wonn travyth er ow fynn ow honan, mes nyns ov vy akwitys dre henna. An Arloedh yw, neb a'm breus. 5Na vreusewgh travyth, ytho, kyns an ewn-dermyn may teffo an Arloedh, neb a wra golowi traow kudhys y'n tewlder keffrys diskwedhes kusulyow an golonn; hag y'n eur na kettep onan a wra kavoes y wormola dhiworth Duw.

6My re gewsis an taklow ma, breder, a-dro dhymmo vy hag a-dro dhe Apollos rag agas les, dredhon may tyskowgh styr an lavar ‘Travyth dres an pyth yw skrifys’, ma na vowgh hwi omhwythys a-barth an eyl erbynn y gila. 7Rag piw a wel dha vos arbennik? Ha pandra a'th eus na dhegemmersys? Ha mara'n degemmersys, prag y fostydh, kepar ha pan na dhegemmersys?

8Y'n eur ma lenwys owgh hwi! Y'n eur ma deuvewgh ha bos rych! A-der ni, hwi re dheuth ha bos myghternedh! Hag unnweyth a pewgh hwi myghternedh yn hwir, may kesreynnyen ni genowgh! 9Dell dybav, Duw re'gan diskwedhas, an abesteli, avel an re dhiwettha, dampnys dhe'n mernans, drefenn ni dhe dhos ha bos ges dhe'n bys, keffrys dhe eledh ha dhe dus. 10Fellyon rag Krist yth on ni, mes skentel yn Krist yth owgh hwi; gwann yth on ni, mes krev yth owgh hwi; yn enor yth owgh hwi synsys, mes disenorys yth on ni. 11Bys y'n eur ma ha nown ha syghes ni a'm beus, ha noeth on ni, ha skorjys, ha diannedh, 12ha ni a lavur ow konis gans agan diwleuv agan honan; tebeldhyghtys, ni a vennik; helghys, ni a wodhev: 13sklandrys, ni a gews yn kuv; ni re dheuth ha bos atal an bys, skubyon a bup-tra, bys y'n jydh ma.

14Ny skrifav dhywgh an traow ma rag gul dhywgh bos methek, mes rag agas keski avel ow fleghes veurgerys. 15Rag kyn fo dhywgh deg mil a dhyskadoryon yn Krist, nyns eus dhywgh nameur a dasow; yn tevri my a dheuth ha bos agas tas yn Krist der an aweyl. 16Rakhenna my a'gas pys a wul war ow lergh. 17Hemm yw an pur skila my dhe dhannvon dhywgh Timothi, neb yw ow flogh meurgerys ha lel y'n Arloedh, ha neb a wra dri dh'agas kov ow fordhow yn Krist Yesu, kepar dell dhyskav yn pub tyller, yn pub eglos. 18Lemmyn, re ahanowgh deuva ha bos goethus, kepar ha pan na ven ow tos dhywgh. 19Byttegyns my a wra dos dhywgh yn skon, mar mynn an Arloedh, ha diskudha an galloes, a-der an kows, a'n dus woethus ma; 20rag nyns yw gwlaskor Duw yn kows mes yn galloes. 21Pandr'a vynnowgh? A wrav vy dos dhywgh ha genev gwelenn, poken gans kerensa hag yn spyrys a glorder?