Breus erbynn Dijastita

1Yn tevri, derivys yw bos fornikasyon yn agas mysk, fornikasyon nag yw kevys y bar yn mysk jentilys; henn yw, yma gour ow kesvewa gans gwreg y das. 2Ha goethus yth owgh hwi. A ny goedhvia dhywgh oela, ha tewlel yn-mes a-dhiworthowgh ev neb re wrug an drogober ma?

3Kyn nag esov vy yn agas lok y'n korf, hwath yth esov vy genowgh y'n spyrys, ha kepar ha pan ven ena, my re'n breusis neb a wrug an dra ma. 4Ha hwi, pan vowgh kuntellys war-barth yn hanow an Arloedh Yesu, ha genowgh hwi ow spyrys gans nerth agan Arloedh Yesu, 5res yw dhywgh daskorr an gour ma dhe Satnas rag terroes an kig may fo selwys y spyrys yn dydh an Arloedh.

6Agas bostyans nyns yw da. A ny wodhowgh hwi y hwra tamm goell dhe oll a'n toes sevel? 7Kerthewgh dhe-ves an goell koth may fowgh hwi bagasik nowydh a does, dell owgh hwi heb goell yn hwir. Rag Krist agan pask re beu offrynnys.5:7 offrynnys: War-lergh re a'n dornskrifow offrynnys ragon. 8Na wren ni goelya, ytho, naneyl gans goell koth na gans goell a spit hag a dhrog, mes gans bara heb goell, a lelder hag a wiryonedh.

9Y'm epystyl my a skrifas dhywgh na goedh dhywgh kowethya gans tus dhijast, 10– kammenn nag yw ow styr an re dhijast y'n bys ma, po tus pith ha ladron wyls, po gordhyoryon idolys, rag y'n kas na res via dhywgh mos mes a'n bys. 11Mes lemmyn my re skrifas dhywgh na gowetthyowgh gans nagonan, hag ev gelwys broder, yw den dijast, po den pith, po gordhyer idolys, po sklandrer, po medhow, po lader gwyls; byth na dhybrewgh gans den a'n par na. 12Pyth eus dhymmo vy dhe wul, ow preusi an re usi a-ves? A ny vreusowgh hwi an re usi a-bervedh? 13Duw a vreus an re a-ves. ‘Tewlewgh an tebelwas yn-mes ahanowgh agas honan.’