Mos a-rag Breusysi Dhiskryjyk

1Pan eus dhe nebonan ahanowgh grevons erbynn den arall, a vedh ev bos breusys a-rag tus kammhynsek, kyns es a-rag an syns? 2A ny wodhowgh hwi y hwra an syns breusi an bys? Ha mars yw an bys dhe vos breusys genowgh hwi, owgh hwi anwiw dhe vreusi maters byghan? 3A ny wodhowgh hwi y hwren ni breusi eledh? Pygemmys moy traow an bewnans ma! 4Rakhenna mars eus dhywgh devri traow an bys dhe vos breusys, a wrewgh hwi aga dri a-rag an re yw dispresys y'n eglos? 5Hemma a lavarav rag gorra meth ynnowgh! A nyns eus yn agas mysk unn den skentel lowr neb a yll breusi ynter an vreder? 6Mes broder yw breusys erbynn broder, ha hemma dherag diskryjygyon!

7Lemmyn yn tevri, ha hwi ow mos dhe lagha, an eyl erbynn y gila, fethys owgh hwi yn tien. Prag nag yw gwell genowgh godhevel drokoleth? Prag nag yw gwell genowgh bos toellys? 8Mes hwi agas honan a wra drokoleth ha toell, ha hemma erbynn agas breder hwi.

9A ny wodhowgh hwi na wra drogoberoryon erita gwlaskor Duw? Na vedhewgh toellys! Na tus dhijast, na gordhyoryon idolys, nag avoutroryon, na'n re vedhel, na kethreydhelogyon, 10na ladron, na tus pith, na medhewon, na sklandroryon, na'n re graf, ny wrons i erita gwlaskor Duw. 11Hag yndella y fedha re ahanowgh hwi; mes golghys vewgh, sanshes vewgh, akwitys vewgh yn hanow an Arloedh Yesu Krist ha gans Spyrys agan Duw.

Gordhyewgh Duw yn agas Korf

12‘Lafyl yw pup-tra dhymm’, mes nyns yw pup-tra hag yw dhe les. ‘Lafyl yw pup-tra dhymm’, mes ny vynnav bos dres yn-dann vaystri travyth. 13‘Boes rag an benn-gasenn, ha'n benn-gasenn rag boes’, ha Duw a dhistru ha'n eyl ha'y gila. Nyns yw an korf rag fornikasyon mes rag an Arloedh, ha'n Arloedh rag an korf. 14Ha Duw a dhrehevis an Arloedh, hag ynwedh ev a wra agan drehevel ni der y alloes. 15A ny wodhowgh bos agas korfow eseli Krist? Ytho, a wrav vy kemmeres eseli Krist ha gul dhedha bos eseli hora? Bynner re hwarvo! 16A ny wodhowgh, neb a gesun gans hora dhe dhos ha bos gensi unn korf? Rag dell yw skrifys, ‘An dhew a wra dos ha bos unn kig.’ 17Mes neb yw kesunys dhe'n Arloedh a dheu ha bos ganso unn spyrys. 18Gohelewgh fornikasyon. Py pegh arall pynag a wrello den, yn-mes a'n korf yma; mes neb yw dijast a begh erbynn y gorf y honan. 19A ny wodhowgh hwi bos agas korf tempel an Spyrys Sans a-bervedh ynnowgh, hag a'gas beus dhiworth Duw? Ny berghennowgh agas honan; 20rag prenys a bris vewgh. Gordhyewgh Duw, ytho, yn agas korf.