Kudynnow a-dro dhe Dhemmedhyans

1Lemmyn a-dro dhe'n traow may skrifsowgh: ‘Da yw dhe wour na docchyo benyn.’ 2Mes drefenn fornikasyon y koedh dhe bub gour kavoes y wreg y honan, ha pub benyn hy gour hy honan. 3Y koedh dhe'n gour ri dh'y wreg hy gwiryow priosel, keffrys an wreg dh'y gour. 4Rag an wreg ny rewl hy horf hy honan, mes hy gour a'n rewl; y'n keth vaner an gour ny rewl y gorf y honan, mes an wreg a'n rewl. 5Na skonyewgh an eyl orth y gila, marnas, martesen, der akordyans rag termyn, mayth omryllowgh hwi dhe bysadow; mes ena dewgh war-barth arta ma na'gas dynnyo Satnas der agas fowt omrewl. 6Hemma my a lever avel kummyas, a-der gorhemmynn. 7Hwans a'm beus pub den oll dhe vos avelov vy ow honan; mes yma gans peub y ro arbennik y honan dhiworth Duw; an eyl a'n jeves hemma, y gila henna.

8My a lever dhe'n re dhibries ha dhe'n gwedhwesow bos da dhedha gortos avelov vy. 9Mes mar ny yllons i omrewlya, gwrens demmedhi; gwell yw demmedhi ages dewi dre hwans.

10Dhe'n re bries my a worhemmynn (nyns yw my, mes an Arloedh), ma na goedhvo dhe'n wreg diberth dhiworth hy gour, 11mes mar kwra diberth, gortes dibries poken bedhes unnverhes gans hy gour; ha ni goedh dhe'n gour didhemmedhi y wreg.

12Dhe'n re erell y lavarav evy (nyns yw an Arloedh): broder mara'n jeves gwreg dhiskryjyk ha hy owth assentya triga ganso, ny goedh dhodho diberth dhiworti; 13ha benyn mara's teves gour diskryjyk hag ev owth assentya triga gensi, ny goedh dhedhi diberth dhiworto. 14Rag an gour diskryjyk re beu sakrys der an wreg, ha'n wreg dhiskryjyk re beu sakrys der an gour. Poken, avlan via agas fleghes, mes lemmyn sans yns i. 15Mes mar omdhiberth an diskryjyk, bedhes diberthys; yn kas a'n par na nyns yw kelmys na'n broder na'n hwoer. Rag yn kres Duw re'gas gelwis. 16A wreg, fatell wodhesta mar kwredh selwel dha wour? A wour, fatell wodhesta mar kwredh selwel dha wreg?

An Bewnans Ordenys gans an Arloedh

17Byttegyns, kerdhes pubonan kepar dell ordenas dhodho an Arloedh, par dell elwis Duw pubonan. Hemma my a worhemmynn y'n eglosyow oll. 18O trodreghys nebonan pan veu gelwys? Na hwiles defendya dhe-ves merkyow trodreghyans. A veu gelwys nebonan antrodreghys? Na bedhes trodreghys. 19Trodreghyans nyns yw travyth, hag antrodreghyans nyns yw travyth; mes gwitha arghadowyow an Arloedh yw dres pup-tra. 20Gortes pub huni y'n studh may feu gelwys.

21A veusta keth pan veus gelwys? Ny vern; mes mar kyllydh dos ha bos livrys, gwell yw gul yndella. 22Rag neb a veu gelwys y'n Arloedh, hag ev keth, den livrys an Arloedh yth yw; keffrys neb o den livrys pan veu gelwys, keth Krist yth yw. 23Prenys a bris vewgh; na dhewgh ha bos kethyon tus. 24Ytho, breder, yn py studh pynag y feu pub huni gelwys, gortes yndella gans Duw.

An Re Andhemmedhys ha'n Gwedhwesow

25Lemmyn a-dro dhe wyrghesow, nyns eus dhymm gorhemmynn a'n Arloedh, mes ow brys a rov avel onan neb yw lel, dre dregeredh an Arloedh. 26Dell dybav, drefenn an poenvotter y'n jydh hedhyw, da yw dhe dhen gortos dell ywa. 27Kelmys dhe wreg osta? Na hwila livreson. Livrys dhiworth gwreg osta? Na hwila gwreg. 28Mes mar temmedhydh, ny beghydh, ha gwyrghes mar temmedh, ny begh. Byttegyns an re a dhemmedh a's teves poenvos y'n kig, ha'gas gwitha rakhenna a vynnsen. 29Ow styr yw hemma, breder: devedhys ha bos pur verr yw an termyn; alemma rag, an re neb a's teves gwragedh, bedhens kepar ha pan vens i hebdha, 30ha'n re a gyn kepar ha pan na vens ow kyni, ha'n re neb a lowenha kepar ha pan na vens ow lowenhe, ha'n re neb a bren kepar ha pan vens i heb pythow, 31ha'n re neb a wra devnydh a'n bys kepar ha pan na wrens i leun dhevnydh anodho. Rag yma furv an bys ma ow tremena dhe-ves.

32My a vynn orthowgh bos heb fienasow. An gour dibries yw prederus a-dro dhe negys an Arloedh, fatell blekkyo dhe'n Arloedh; 33mes an gour pries yw prederus a-dro dhe negys an bys, fatell blekkyo dh'y wreg, 34ha rynnys yw y vrys. Ha'n venyn dhibries po an wyrghes yw prederus7:34 ha rynnys yw y vrys. Ha'n venyn dhibries po an wyrghes yw prederus: War-lergh re a'n dornskrifow Hag yma dihevelepter ynter an wreg ha'n wyrghes. An myrgh dhibries yw prederus. a-dro dhe negys an Arloedh, fatell vo sans hag y'n korf hag yn spyrys; mes an venyn bries yw prederus a-dro dhe negys an bys, fatell blekkyo dh'y gour. 35My a lever hemma rag agas les agas honan, heb gorra fronn vydh warnowgh, mes rag onester ha rag may hwonetthowgh an Arloedh heb lett.

36Mar tyb nebonan y vos owth omdhegi heb onester dh'y wyrghes, mars yw hi dres hy yowynkneth,7:36 mars yw hi dres hy yowynkneth: Po mars yw ev krev y hwansow. ha mar tegoedh, gwres a vynno: nyns yw peghes, i demmedhens. 37Mes mars yw nebonan ha'y brys ow sevel yn fast, heb bos yn-dann dravyth a res, neb a rewl y vodh y honan, ha neb yw ervirys ev dh'y gwitha gwyrghes,7:37 yw ervirys ev dh'y gwitha gwyrghes: Greka, yw ervirys dhe witha y wyrghes. ev a wra yn ta. 38Ytho, neb a dhemmedh y wyrghes a wra yn ta, ha neb na dhemmedh a wra gwell.7:38 neb a dhemmedh y wyrghes a wra yn ta, ha neb na dhemmedh a wra gwell: Po neb a re y wyrghes yn demmedhyans a wra yn ta, ha neb na re yn demmedhyans a wra gwell.

39Kelmys dh'y gour yw an wreg hedre vo ev bew; mes mar kosk ev, livrys yw hi dhe dhemmedhi neb a vynno hi, mar kwra hi henna y'n Arloedh. 40Mes dhe'm brys vy moy gwynn hy bys yw mar korta kepar dell yw hi; ha my a dyb y'm beus ynwedh spyrys Duw.