Taklow Offrynnys dhe Idolys

1Lemmyn a-dro dhe offrynnow dhe idolys, dell wodhon, ‘ni oll a'gan beus godhvos.’ Godhvos a dheg hwythfians, mes kerensa a dhrehav. 2Nebonan mar tyb ev dhe wodhvos neptra, ny woer na hwath kepar dell goedh dhodho godhvos; 3mes nebonan mar kar Duw, aswonnys ganso yth ywa.

4Rakhenna, a-dro dhe dhybri offrynnow dhe idolys, ni a woer ‘idol y'n bys ma dhe vos travyth’, ha ‘nag eus Duw vyth saw onan.’ 5Rag kynth eus duwow, dell yns gelwys, po yn nev po yn nor – dell yn hwir yma meur a dhuwow ha meur a arlydhi – 6hwath ragon nyni yma unn Duw, an Tas, dhiworth neb yw pup-tra, ha rag neb yth on ni, hag unn Arloedh, Yesu Krist, dre neb yw pup-tra ha dre neb yth on ni.

7Byttegyns, nyns yw peub a'n jeves an godhvos ma, mes re, drefenn aga howethyans kyns-lemmyn gans idolys, a dheber an boes avel boes offrynnys dhe idol, ha'ga howses, ow pos gwann, defolys yw. 8Boes ny wra agan kommendya dhe Dhuw; nyns on ni gweth mar ny dhybryn na gwell mar tybryn. 9Mes kemmerewgh with, dha livreson ma na dheffo ha bos war neb kor ken a drebuchya dhe'n re wann. 10Rag nebonan mara'th wel, ty dhen a wodhvos, owth esedha orth moes yn tempel idol, a ny vydh ev dynys, gwann y gowses, dhe dhybri offrynnow dhe idolys? 11Ytho, dre dha wodhvos, distruys yw an den gwann, an broder may ferwis Krist ragdho. 12Yndellma, ow pegha erbynn an vreder hag ow shyndya aga howses pan yw gwann, ty a begh erbynn Krist. 13Rakhenna, boes mar lett ow broder, nevra ny wrav vy dybri kig rag dout my dhe wul dhodho trebuchya.