Taklow Offrynnys dhe Idolys

1A nyns ov vy livrys? A nyns ov vy abostol? A ny wrug vy gweles Yesu agan Arloedh? A nyns owgh hwi ow obereth y'n Arloedh? 2Mar nyns ov abostol dhe re erell, devri dhywgh hwyhwi yth ov; rag yth owgh hwi sel ow abostolieth y'n Arloedh.

3Hemm yw ow klem dhe'n re a vynnsa ow apposya. 4A nyns eus dhyn gwir a dhybri hag a eva? 5A nyns eus dhyn gwir a gemmeres genen gwreg gryjyk, kepar dell wra an abesteli erell ha breder an Arloedh ha Kefas? 6Po a nyns yw marnas Barnabas ha my heb gwir a omwitha rag gonis? 7Py souder a serv yn y gost y honan? Piw a blans gwinlann heb dybri rann a'y frut? Po py bugel deves a with para heb kavoes rann a'n leth?

8A lavarav an traow ma herwydh awtorita mab-den? A ny lever an lagha an keth traow? 9Rag yn lagha Moyses skrifys yw, ‘Na wra kelmi ojyon hag ev ow trushya.’ Yw oghen mayth yw Duw prederus a-dro dhedha? 10A ny gews ev yn tevri a-barth dhyn ni? Skrifys veu a-barth dhyn ni, a-ban goedh dhe'n aradror aras gans govenek ha dhe'n drushyer drushya gans govenek, a gavoes rann a'n drevas. 11Mar konedhsyn ni has a daklow spyrysel yntredhowgh, yw tra veur mar mysyn agas dader a'n bys ma? 12Mar kevrenn re erell an gwir ma warnowgh, a ny wren ni hwath dhe voy?

Byttegyns, ny wrussyn devnydh a'n gwir ma, mes ni a berth pup-tra kyns es gorra lett yn fordh aweyl Krist. 13A ny wodhowgh hwi an re arvethys y'n tempel dhe gavoes aga boes dhiworth an tempel, ha'n re ow servya orth an alter dhe gevrenna an pyth re beu offrynnys? 14Y'n keth vaner, an Arloedh a worhemmynnis y koedh dhe'n re neb a bregoth an aweyl kavoes aga fygans der an aweyl.

15Mes ny wrug vy devnydh a dravyth a'n gwiryow ma, na ny skrifis vy rag gwaynya traow a'n par na. Merwel a vynnsen kyns es dell gemmerro nebonan dhiworthiv ow skila dhe vostya! 16Rag mar pregowthav an aweyl, ny'm beus skila dhe vostya, rag dever yw gorrys warnav: go-vy mar ny bregowthav an aweyl! 17Rag mar kwrav hemma a'm bodh ow honan, gober a'm beus; mes mara'n gwrav a'm anvodh, charj re beu res dhymm. 18Pyth, ytho, yw ow gober? Hemma: ha my ow pregoth, my a yll gul dhe'n aweyl bos heb kost vyth, ha my heb gul devnydh kowal a'm gwir y'n aweyl.

19Rag kynth ov kwit a dus oll, my a omwrug keth dhe bubonan, may hwaynnyen tus voy. 20Dhe'n Yedhewon my eth ha bos avel Yedhow, may hwaynnyen Yedhewon; dhe'n re yn-dann an lagha, my eth ha bos avel onan yn-dann lagha – kyn nag esov evy yn-dann an lagha – may hwaynnyen an re yn-dann an lagha. 21Dhe'n re a-ves dhe'n lagha my eth ha bos avel onan a-ves dhe'n lagha – kyn nag esov evy a-ves dhe lagha Duw, mes yn-dann lagha Krist – may hwaynnyen an re a-ves dhe'n lagha. 22Dhe'n re wann my eth ha bos gwann, may hwaynnyen an re wann. My res eth ha bos pup-tra dhe dus oll may salwen awos eghenn rann anedha. 23My a wra pup-tra a-barth an aweyl may kevrenniv y vennathow.

24A ny wodhowgh hwi bos an resoryon oll yn resegva ow kesstrivya, mes ny dhendil an gober marnas onan? Y'n for' ma gwrewgh ma'n kyffowgh. 25Pub striver y'n gwariow a omrewl yn traow oll. I a'n gwra rag kavoes kurun a wedher, mes ni rag kavoes onan na wedher nevra. 26Ytho, ny resav heb towl, ny voksusav avel onan ow kweskel ayr; 27mes my a gronk ow horf ha'y wul gostydh, ma na viv evy, wosa pregoth dhe re erell, gelwys anwiw.