Kyrus a wront Dehwelyans dhe'n Dhivresow

1Y'n kynsa blydhen a reyn Kyrus myghtern an Persianys, rag may fe kewerys ger an Arloedh dre anow Yeremia, 2an Arloedh a wrug dhe spyrys Kyrus myghtern an Persianys difuna, hag ev a dhellos gwarnyans der oll y wlaskor, hag ynwedh ev a'n skrifas:

3‘Yndella y lever Kyrus myghtern an Persianys: Arloedh Ysrael, an Ughella Arloedh, re'm gwrug myghtern an norvys, 4hag ev re'm gorhemmynnis may treheffiv chi ragdho yn Yerusalem, usi yn Yudi. 5Ytho mars yw nebonan ahanowgh hwi a'y bobel, re bo y Arloedh genowgh; kewgh yn-bann dhe Yerusalem, usi yn Yudi, ha drehevewgh chi an Arloedh, Duw Ysrael – ev yw an Arloedh trigys yn Yerusalem. 6An re usi trigys yn tylleryow a-dro bedhes gweres res dhedha gans tus a'gas tyller gans owr hag arghans, 7ha gans rohow ha gans mergh ha gans chatel, ha taklow erell keworrys avel offrynnow ambos rag tempel an Arloedh usi yn Yerusalem.’

8Ena pennow teyluyow loethow Yuda ha Benyamin a sevis yn-bann, ha'n oferysi ha'n Levysi, hag oll an re difunys aga spyrys gans an Arloedh rag mayth ellens yn-bann rag drehevel an chi yn Yerusalem rag an Arloedh. 9Aga hentrevogyon a's gweresas gans pup-tra, gans arghans ha gans owr, ha gans mergh ha gans chatel ha gans myns meur a offrynnow ambos a lies difunys aga holonn.

10Myghtern Kyrus a dhug yn-mes lestri sans an Arloedh re bia degys dhe-ves dhiworth Yerusalem gans Nebukadnessar ha ganso gwithys yn y dempel a imajys. 11Pan dhug Kyrus myghtern an Persianys an taklow ma yn-mes, ev a's ros dhe Mithridates, y alhwedhor, 12ha ganso ev i a veu res dhe Sheshbassar, governour Yudi. 13Niver an re ma o mil hanaf a owr, mil hanaf a arghans, naw ynkyslester warn ugens a owr, deg bolla warn ugens, dew vil peswar kans ha deg a vollow a arghans, ha mil lester arall. 14Oll an lestri a veu daskorrys, owr hag arghans, pymp mil peswar kans naw ha tri ugens, 15hag i a veu degys tre gans Sheshbassar gans an dhivresow a dheuth a Babylon dhe Yerusalem.

Enebieth orth Dastrehevyans Yerusalem

16Yn termyn Artakserkses myghtern an Persianys, Bishlam, Mithridates, Tabeel, Rehum, Beltethmus, an skrifwas Shimshay, ha'ga howetha erell trigys yn Samaria hag yn tylleryow erell, a skrifas dhodho an lyther a hol, erbynn an re esa trigys yn Yudi ha Yerusalem:

17‘Dhe vyghtern Artakserkses agan arloedh, dha servysi an kovadhor Rehum ha'n skrifwas Shimshay hag eseli erell a'ga honsel, ha'n vreusysi yn Kelesyria ha Fenikia: 18Bedhes godhvedhys lemmyn dh'agan arloedh an myghtern, bos an Yedhewon a dheuth yn-bann dhiworthis gyllys dhe Yerusalem hag i dhe vos ow trehevel an sita na, gorth ha tebel dell yw hi, owth ewnhe hy marghasvaow ha'y fosow hag ow korra yn aga le an selyow rag tempel. 19Yndella mar pydh an sita ma drehevys ha'n fosow gorfennys, ny naghons hepken a dyli an trubyt mes moy es henna i a sev orth myghternedh. 20A-ban usi drehevel an tempel ow mos yn-rag, ni a dyb na vydh an gwella kusul gasa tra a'n par na, 21mes ni dhe gewsel gans agan arloedh an myghtern rag may hwitthrer yn kovadhow dha dasow. 22Ty a gyv y'n kovlyvrow an pyth re beu skrifys a-dro dhedha, ha ty a wel bos an sita ma diwostydh, ow trobla kekeffrys myghternedh ha sitys erell, 23ha'n Yedhewon dhe vos diwostydh ha prest ow trehevel esedhvaow ynni a-henys. Henn yw an acheson ragdho may feu an sita ma gwastyes. 24Ytho ni a dheriv dhis, A arloedh an myghtern, na vydh fordh na fella rag ty dhe vos dhe Kelesyria ha Fenikia mara pydh an sita ma drehevys, ha'y fosow gorfennys.’

25Ena an myghtern ow korthybi dhe'n kovadhor Rehum, Beltethmus, an skrifwas Shimshay ha'n re erell esa gansa trigys yn Samaria ha Syria ha Fenikia, a skrifas dell siw:

26‘My re redyas an lyther a dhannvensowgh dhymm. Yndella my a worhemmynnis may hwitthrer, ha kevys yw an sita na dhe sevel yn aray erbynn myghternedh a-henys, 27ha bos an bobel ynni ow kul rebellyans ha bresel a'ga usadow, ha myghternedh alloesek ha fell dhe reynya yn Yerusalem, hag i dhe gemmeres trubyt a Kelesyria hag a Fenikia. 28Yndella my re worhemmynnis may fo lett war an dus na rag drehevel an sita, ha dhe waytya na vo travyth moy gwrys, 29ha nag ello pella droktraow a'n par ma, dhe annia myghternedh.’

30Ena pan veu redys an lyther ma a vyghtern Artakserkses, Rehum ha'n skrifwas Shimshay ha'ga howetha eth yn skav dhe Yerusalem gans marghoglu ha myns bras a gasoryon ervys hag i a dhallathas lesta an re esa ow trehevel. Ha drehevel an tempel yn Yerusalem a hedhis bys an nessa blydhen a reyn Darius myghtern an Persianys.