Dadhel an Tri Horfwithyas

1Lemmyn myghtern Darius a wrug kevewi bras rag oll esa yn-danno, oll re bia genys yn y ji, hag oll an ugheloryon a Media hag a Persia, 2hag oll an wahalyethow ha'n gaslewydhyon ha'n wovernours esa yn-danno y'n kans rannvro ha seyth warn ugens a Eynda dhe Ethiopia. 3I a dhybris hag eva ha pan ens lenwys yth ethons dhe-ves, ha Darius an myghtern eth dh'y jambour dhe goska, mes ev a dhifunas arta.

4Ena an tri gour yowynk esa ow kwitha korf an myghtern a leveris, an eyl dh'y gila, 5‘Derives peub ahanan pana dra yw an kreffa; ha dhe neb mayth hevel y dherivas bos an furra, Darius an myghtern a re rohow bras hag enors bras a drygh. 6Ev a vydh gwiskys yn purpur hag a yv dhiworth hanafow a owr ha koska war weli a owr, hag ev a'n jevydh charett gans daffar a owr ha tulyfant a sendal ha torgh a-dro dh'y gonna; 7ha drefenn y furneth ev a esedh ryb Darius, hag ev a vydh gelwys Kar Darius.’

8Ena peub a skrifas y dherivas y honan, hag i a's selyas ha'ga gorra yn-dann bluvek Darius an myghtern, 9ow leverel, ‘Pan dhifun an myghtern, an skrif a vydh res dhodho; ha dhe neb may freus an myghtern ha'n tri ughelor a Persiabos y dherivas an furra, an trygh a vydh res herwydh an pyth a veu skrifys.’ 10An kynsa a skrifas, ‘Gwin yw an kreffa.’ 11An nessa a skrifas, ‘An myghtern yw an kreffa.’ 12An tressa a skrifas, ‘Benynes yw an kreffa, mes an gwiryonedh yw an trygher dres pup-tra.’

13Pan dhifunas an myghtern, i a ros an skrif dhodho, hag ev a'n redyas. 14Ena ev a dhannvonas ha gelwel oll ugheloryon Persia ha Media ha'n wahalyethow ha'n gaslewydhyon ha'n wovernours ha'n bennternedh, 15hag ev a esedhas yn chambour an konsel, ha'n skrif a veu lennys yn aga mysk. 16Yn-medh ev, ‘Galw an wer yowynk hag i a dhiskwedh aga derivas.’ Yndella i a veu gelwys, hag yth entersons. 17I a leveris dhedha, ‘Diskwedhewgh dhyn an pyth re skrifsowgh.’

An Areth a-dro dhe Win

Ena an kynsa, neb re gowssa a-dro dhe grevder gwin, a dhallathas hag a leveris, 18‘Syrrys, fatell yw gwin an kreffa? Ev a led yn stray brys pubonan a'n yv. 19Ev a wra parow brys an myghtern ha'n omdhivas, an gwas, ha'n den rydh, an boghosek ha'n den rych. 20Ev a dreyl pub tybyans dhe gevewya ha lowender, hag a ankev oll ahwer ha kendon. 21Ev a wra dhe bub kolonn omglewes golusek, hag a ankev myghternedh ha gwahalyethow, hag a wra dhe bub onan kewsel a-dro dhe bup-tra kepar dell ve talens. 22Pan wra tus eva, i a ankev bos kowethek gans kowetha ha breder, ha kyns nep-pell i a denn kledhedhyow. 23Ha pan omwellhons dhiworth an gwin i a ankev an pyth re wrussons. 24A syrrys, a nyns yw gwin an kreffa, rag ev a wra dhe dus gul an taklow ma?’ Wosa leverel hemma, ev a dewis.