Rol an Dhivresow a Dhehwelis

1Wosa hemma pennow chiow an tasow a veu dewisys dhe vos yn-bann herwydh aga loethow, gans aga gwragedh ha'ga mebyon ha'ga myrghes, ha'ga gwesyon ha'ga maghtethyon, ha'ga chatel. 2Ha Darius a dhannvonas gansa mil a'n marghoglu rag aga dri tre yn saw, gans menestrouthi tabouryow ha tollgern; 3hag oll aga breder a lowenhas. Hag ev a wrug dhedha mos yn-bann gansa.

4Otta omma henwyn an wer eth yn-bann, herwydh chiow aga thasow y'n loethow, war-lergh aga rannow: 5an oferysi mebyon Finehas mab Aron: Yeshua mab Yosedek mab Seraya ha Yoakim mab Zerubbabel mab Shealtiel, a ji Davydh, a linyeth Fares a loeth Yuda, 6neb a gewsis geryow fur a-rag Darius myghtern Persia, yn nessa blydhen y reyn, yn mis Nisan, an kynsa mis.

7An re ma yw an tus a Yudi a dheuth a gethneth y'n divroedh, an re a dhegsa Nebukadnessar myghtern Babylon dhe Babylon, 8hag a dhehwelis dhe Yerusalem ha ranndiryow erell a Yudi, pub onan dh'y dre y honan. I a dheuth gans Zerubbabel ha Yeshua, Nehemia, Seraya, Resaia, Bigvai, Mordekay, Bilshan, Mispar, Reelia, Rehum, ha Baana, aga ledyoryon.

9Niver an re a'n genedhel ha'ga ledyoryon: mebyon Parosh dew vil, kans, ha dewdhek ha tri ugens. Mebyon Shefatia, peswar kans, dewdhek ha tri ugens. 10Mebyon Ara, seyth kans, hwetek ha dew-ugens. 11Mebyon Pahath-moab, a vebyon Yeshua ha Yoab, dew vil eth kans ha dewdhek. 12Mebyon Elam, unn mil, dew kans ha peswardhek ha dew-ugens. Mebyon Zattu, naw kans, pymp ha dew-ugens. Mebyon Korbe, seyth kans, ha pymp. Mebyon Bani, hwegh kans, eth ha dew-ugens. 13Mebyon Bebay, hwegh kans, tri warn ugens. Mebyon Azgad, unn mil, tri hans, dew warn ugens. 14Mebyon Adonikam, hwegh kans, seyth ha tri ugens. Mebyon Bigvay, dew vil, hwegh ha tri ugens. Mebyon Adin, peswar kans, peswardhek ha dew-ugens. 15Mebyon Ater, hemm yw a Hezekia, dewdhek ha peswar ugens. Mebyon Kilan hag Azetas, seyth ha tri ugens. Mebyon Azaru, peswar kans, dewdhek ha dew-ugens. 16Mebyon Annias, unn kans hag onan. Mebyon Arom. Mebyon Bezay, tri hans, tri warn ugens. Mebyon Arsifurith, unn kans ha dhewdhek. 17Mebyon Bayterus, tri mil, pymp. Mebyon Bethlomon, unn kans, tri warn ugens. 18An re a Netofa, pymthek ha dew-ugens. An re a Anathoth, unn kans, etek ha dew-ugens. An re a Bethasmoth, dew ha dew-ugens. 19An re a Kiryatharim, pymp warn ugens. An re a Kefira ha Beeroth, seyth kans, tri ha dew-ugens. 20An Kadiasysi hag Ammidysi, peswar kans, dew warn ugens, An re a Kirama ha Geba, hwegh kans, onan warn ugens. 21An re a Makalon, unn kans, dew warn ugens. An re a Bethel, dewdhek ha dew-ugens. Mebyon Nifish, kans, hwetek ha dew-ugens. 22Mebyon an Elam arall hag Ono, seyth kans ha pymp warn ugens. Mebyon Yeriko, tri hans, pymp ha dew-ugens. 23Mebyon Senaa, tri mil, tri hans, deg warn ugens.

24An oferysi: mebyon Yedaya mab Yeshua, a vebyon Anasib, naw kans, dewdhek ha tri ugens. Mebyon Immer, unn mil, dewdhek ha dew-ugens. 25Mebyon Pashhur, unn mil, dew kans, ha seyth ha dew-ugens. Mebyon Karme, unn mil ha seytek.

26An Levysi; mebyon Yeshua ha Kadmiel ha Bannas ha Sudias, peswardhek ha tri ugens. 27Kanoryon an tempel; mebyon Asaf, kans, eth warn ugens. 28An borthoryon, mebyon Shallum, mebyon Ater, mebyon Talmon, mebyon Akkub, mebyon Hatita, mebyon Shobay, yn tien kans, nownsek warn ugens.

29Servysi an tempel: mebyon Esaw, mebyon Hasufa, mebyon Tabbaoth, mebyon Keros, mebyon Sua, mebyon Padon, mebyon Lebana, mebyon Hagaba, 30mebyon Akkub, mebyon Uthay, mebyon Ketab, mebyon Hagab, mebyon Subay, mebyon Hana, mebyon Kathua, mebyon Geddur, 31mebyon Yairus, mebyon Daysan, mebyon Noeba, mebyon Kezib, mebyon Gazera, mebyon Uzza, mebyon Finoe, mebyon Hasra, mebyon Basthay, mebyon Asna, mebyon Maani, mebyon Nefisim, mebyon Akuf, mebyon Hakufa, mebyon Asur, mebyon Farakim, mebyon Bazluth, 32mebyon Mehida, mebyon Kutha, mebyon Karea, mebyon Barkos, mebyon Serar, mebyon Tema, mebyon Nezia, mebyon Hatifa.

33Mebyon servysi Solomon, mebyon Assafioth, mebyon Peruda, mebyon Yaala, mebyon Lozon, mebyon Isdael, mebyon Shefatia, 34mebyon Agia, mebyon Pokereth-hazzebaym, mebyon Sarothie, mebyon Masia, mebyon Gas, mebyon Addus, mebyon Subas, mebyon Aferra, mebyon Barodis, mebyon Shafat, mebyon Allon.

35Oll servysi an tempel ha mebyon servysi Solomon o tri hans, dewdhek ha tri ugens.

36An re a hol yw an re a dheuth dhiworth Tel-melagh ha Tel-harsha, yn-dann ledyans Kerub, Addan hag Immer. 37Kyn na's tevo previ dre chiow aga thasow na der aga linyeth aga bos dhe Ysrael: mebyon Delaya mab Tobia, mebyon Nekoda, hwegh kans, dewdhek ha dew-ugens.

38A'n oferysi an re a hol re gemmersa soedh an oferyas mes nyns ens kevys rekordys: mebyon Habaia, mebyon Hakkoz, ha mebyon Yaddus re dhemmedhsa Agia, onan a vyrghes Barzillay, hag a veu henwys war-lergh y hanow. 39Pan veu hwilys yn kovlyver ha ny veu kevys linyeth an re ma, i a veu defendys dhe-ves a'n gonis avel oferysi. 40Ha Nehemia hag Attharias a leveris dhedha na gevrennens y'n taklow sans bys pan saffa arghoferyas ow kwiska Urim ha Thummim.

41Oll an re a Ysrael, dewdhek bloedh ha moy, war-barth ha gwesyon ha maghtethyon o dew vil ha dew-ugens, tri hans ha tri ugens; 42aga gwesyon ha'ga maghtethyon o seyth mil, tri hans, seytek warn ugens; yth esa dew kans, pymp ha dew-ugens gwarier daffar ha kaner. 43Yth esa peswar kans, pymthek warn ugens a gowrvergh, ha seyth mil, hwetek warn ugens a vergh, dew kans, pymp ha dew-ugens a vulyon, ha pymp mil, pymp kans, pymp warn ugens a asenes.

44Re a bennow teyluyow, pan dheuthons dhe dempel Duw usi yn Yerusalem, a dos, dhe dhrehevel an chi war y le, gwella gyllens, 45ha ri dhe'n dresorva sans rag an ober, mil vina5:45 vina: An mina o poes po mona, 100 draghma, po 50 shekel. a owr, pymp mil vina a arghans, ha kans dillasenn rag oferysi.

46Yth esa an oferysi, an Levysi, ha rann a'n bobel trigys yn Yerusalem hag y'n pow yn hy hyrghynn; ha kanoryon an tempel, an borthoryon, hag oll Ysrael yn aga threvow.

Gordhyans a Dhastalleth

47Pan dheuth an seythves mis, ha mebyon Ysrael oll yn aga threvow aga honan, i a omguntellas gans unn akord y'n plen a-rag an kynsa yet war-tu ha'n howldrevel. 48Ena Yeshua mab Yosadak, gans y vreder an oferysi, ha Zerubbabel mab Shealtiel, gans y vreder, a sevis yn aga tyller hag a bareusis alter Duw Ysrael, 49rag profya offrynnow leskys warnodho, dell yw skrifys yn lyver Moyses, den Duw. 50Hag yth omguntellas gansa re dhiworth poblow arall a'n tir. Hag i a dhrehevis an alter yn hy thyller, rag oll poblow an tir o eskarek orta, hag i o kreffa agessa; hag i a brofya offrynnow dhe'n euryow gwiw, hag offrynnow leskys dhe'n Arloedh myttinweyth ha gorthugherweyth. 51I a woelyas goel an skovvaow, dell yw gorhemmynnys y'n lagha, hag i a offrynnas an sakrifisow gwiw pub dydh, 52ha wosa henna an offrynnow gwiw ha sakrifisow dhe'n sabotys ha dhe'n loeryow nowydh ha dhe oll an goelyow sanshes. 53Hag oll an re re dossa ti vyth dhe Dhuw a dhallethi profya sakrifisow dhe Dhuw a-dhia'n loer nowydh a'n seythves mis, kyn nag o tempel Duw drehevys. 54I a ros mona dhe'n seri men ha dhe'n seri prenn, ha boes ha diwes, 55ha kertys dhe'n Sidonysi ha'n Tyrysi rag dri prennyer keder a Lebanon ha'ga doen dhedha yn skathow-kloes dhe borth Yoppa, herwydh gorhemmynn a's tevo yn skrif gans Kyrus myghtern Persia.

Selyow an Tempel yw Gorrys yn aga Le

56Y'n nessa blydhen wosa aga dos dhe dempel Duw yn Yerusalem, y'n nessa mis, Zerubbabel mab Shealtiel ha Yeshua mab Yosedek a dhallathas, war-barth ha'ga breder ha'n oferysi an Levysi hag oll a dhothyens a'n divroedh dhe Yerusalem, 57hag i a worras selyow tempel Duw yn loer nowydh an nessa mis y'n nessa blydhen wosa i dhe dhos dhe Yudi ha Yerusalem. 58I a settyas an Levysi o ugens bloedh po moy war ober an Arloedh. Ha Yeshua a sevis ha'y vebyon ha'y vreder ha'y vroder Kadmiel ha mebyon Yeshua Emadabun ha mebyon Yoda mab Iliadun, gans aga mebyon ha'ga breder, oll an Levysi owth herdhya an ober yn-rag yn fen war ji Duw gans unn akord. Yndella an weythoryon a dhrehevis tempel an Arloedh.

Pan esa an weythoryon ow trehevel tempel an Arloedh, 59an oferysi a sevis, gwiskys yn aga dillasow, gans daffar menestrouthi ha hirgern, ha'n Levysi, mebyon Asaf, a sevis ena gans symbalys, 60ow kormel an Arloedh hag orth y benniga, herwydh kevarwoedh Davydh myghtern Ysrael. 61I a ganas hymnys, ow ri grasow dhe'n Arloedh, ‘Rag y dhader ha'y wolewder a dhur bys vykken war Ysrael.’ 62Hag oll an bobel a sonas hirgern hag a armas gans garm veur rag drehevel chi an Arloedh. 63Re a oferysi an Levysi ha pennow chiow an tasow, gwer goth re welsens an kynsa chi, a dheuth dhe dhrehevel an chi ma gans kriow ughel, hag oelva ughel, 64ha lies a dheuth gans hirgern ha tros lowenek, 65bys ma na yllens klewes an hirgern rag oelva an dus.

Rag an routh a sonas an hirgern yn ughel, bys mayth o an son klewys a-bell, 66ha pan y'n klewas eskerens loeth Yuda ha Benyamin, i a dheuth rag hwilas pyth o styr son an hirgern. 67I a dhyskas bos an re re dhehwelsa a dhivroedh ow trehevel an tempel rag an Arloedh, Duw Ysrael. 68Ytho i eth dhe Zerubbabel ha Yeshua ha pennow chiow an tasow hag yn-medhons dhedha, ‘Ni a dhrehav genowgh. 69Rag ni yw gostydh dhe'n Arloedh par dell owgh hwi, ha ni re beu ow sakrifia dhodho a-dhia dhydhyow Esarhaddon myghtern Assyria a'gan dros omma.’ 70Mes Zerubbabel ha Yeshua ha pennow chiow an tasow yn Ysrael a leveris dhedha. ‘Ny'gan deur ahanowgh a-dro dhe dhrehevel an chi rag an Arloedh agan Duw, 71rag ni agan honan a'n drehav rag Arloedh Ysrael, par dell worhemmynnis Kyrus, myghtern an Persianys.’ 72Mes poblow an tir a herdhyas tynn war an re yn Yudi, hag a's arvedhas, ha lettya rag drehevel; 73ha gans brasow ha demagogieth hag omsavow, i a wrug na ve gorfennys oll an termyn a vewnans myghtern Kyrus. Lettys ens a dhrehevel diw vlydhen, bys reyn Darius.