Hwel war an Tempel a Dhastalleth

1Lemmyn y'n nessa blydhen a reyn Darius, an brofoesi Haggay ha Zekaria mab Iddo a brofoesas dhe'n Yedhewon esa yn Yudi ha Yerusalem; i a brofoesas dhedha yn hanow an Arloedh, Duw Ysrael. 2Ena Zerubbabel mab Shealtiel ha Yeshua mab Yosadak a dhallathas drehevel chi an Arloedh usi yn Yerusalem, gans gweres profoesi an Arloedh esa gansa.

3Yn kettermyn Sisinnes governour Syria ha Fenikia ha Sathrabuzanes ha'ga howetha a dheuth dhedha ha leverel, 4‘Piw a ros an gorhemmynn ganso mayth esowgh hwi ow trehevel an chi ma ha'n to ma hag ow korfenna oll an taklow erell? Ha piw yw an weythoryon usi ow korfenna an taklow ma?’ 5Byttegyns dyghtys yn hegar o henavogyon an Yedhewon, rag yth esa gwith an Arloedh war an kethneth. 6Ny vons lettys rag dhrehevel bys pan veu ger dannvenys dhe Darius a-dro dhedha, ha'y gorthyp degemmerys.

7Dasskrif an lyther a skrifas Sisinnes governour Syria ha Fenikia, ha Sathrabuzanes, ha'ga howetha, hembrenkysi Syria ha Fenikia ha'y dhannvon dhe Darius:

8‘Dhe vyghtern Darius, salusyans. Bedhes godhvedhys yn ta dh'agan arloedh an myghtern, pan ethen dhe bow Yudi hag entra y'n sita Yerusalem, y kevsyn henavogyon an Yedhewon, re bia yn kethneth, 9ow trehevel y'n sita Yerusalem chi bras rag an Arloedh, a ven treghys gans prennyer kostek gorrys y'n fosow. 10Yma an oberennow ma ow mos yn-rag fest yn skav, ha'n ober a sewen yn aga diwdhorn, hag yma ev ow pos gorfennys gans oll splannder ha rach. 11Ena ni a wovynnas orth an henavogyon ma, “Piw a ros an gorhemmynn ganso mayth esowgh hwi ow trehevel an chi ma ha gorra selyow an drehevyans ma?” 12Rag may hyllyn derivas dhis yn skrif, piw yw an ledyoryon, ni a wovynnas orta, ha govynn dhiworta rol henwyn aga ledyoryon. 13I a worthybis, “Ni yw gwesyon an Arloedh a wrug an nev ha'n norvys. 14An chi a veu drehevys nans yw lies blydhen gans myghtern a Ysrael o meur y vri ha krev, ha gorfennys o. 15Mes pan beghas agan tasow orth Arloedh Ysrael, usi y'n nev, ha'y brosa, ev a'n ros yn diwdhorn Nebukadnessar myghtern Babylon, myghtern an Kaldeanys; 16hag i a dennas an chi dhe'n dor ha'y leski, ha doen an bobel dhe-ves yn kethneth dhe Babylon. 17Mes yn kynsa blydhen may reynya Kyrus war wlaskor Babylon, myghtern Kyrus a skrifas may fe an chi ma dastrehevys. 18Ha'n lestri sans a owr hag a arghans, re gemmmersa Nebukadnessar a'n chi yn Yerusalem ha'ga gwitha yn y dempel y honan, Kyrus an myghtern a's kemmeras yn-mes arta a dempel Babylon, hag i a veu daskorrys dhe Zerubbabel ha Sheshbassar, an governour 19gans an gorhemmynn may trollo oll an lestri ma tre ha'ga gorra y'n tempel yn Yerusalem, ha may fo an tempel ma a'n Arloedh dastrehevys yn y dyller. 20Ena an Sheshbassar ma, wosa ev dhe dhos omma, a worras selyow chi an Arloedh usi yn Yerusalem. Kynth usi y dhrehevel ow mos yn-rag a'n termyn na bys y'n jydh ma, ny veu gorfennys hwath.” 21Ytho lemmyn, A vyghtern, mar hevel fur y wul, bedhes hwithrans gwrys yn kovlyvrow ryel agan arloedh an myghtern, an re usi yn Babylon; 22mara pydh kevys dastrehevel chi an Arloedh dhe vos gans kummyas myghtern Kyrus, ha mara pydh da gans agan arloedh an myghtern, dannvenes ev kevarwoedhyans a-dro dhe'n taklow ma.’

Pysi Kummyas Soedhogel

23Ena Darius a worhemmynnis may fe hwithrans gwrys y'n kovlyvrow ryel esa ow krowedha yn Babylon. Hag yn Ekbatana an kastell usi yn pow Media, kevys veu rol mayth esa hemma kovadhys ynno: 24‘Yn kynsa blydhen reyn Kyrus, myghtern Kyrus a worhemmynnis may fo drehevys chi an Arloedh yn Yerusalem, may sakrifir gans tan heb hedhi; 25yma y ughelder dhe vos tri ugens kevelin ha'y les tri ugens kevelin, gans tri gweli a ven treghys hag unn gweli a brenn nowydh, a'n pow na, ha'n kost dhe vos tylys a dresorva Kyrus an myghtern, 26ha'n lestri sans a ji an Arloedh keffrys a owr hag a arghans re bia kemmerys dhiworth an chi yn Yerusalem gans Nebukadnessar ha degys dhe Babylon, y tegoedh aga bos daskorrys dhe'n chi yn Yerusalem ha'ga gorra y'n tyller may fiens kyns.’

27Yndella Darius a worhemmynnis dhe Sisinnes, governour Syria ha Fenikia, ha dhe Sathrabuzanes, ha'ga howetha, ha'n re apoyntys avel hembrenkysi yn Syria ha Fenikia, may fens a-ves a'n tyller, ha may rollens kummyas dhe Zerubbabel, gwas an Arloedh ha governour Yudi, ha henavogyon an Yedhewon a dhrehevel chi an Arloedh war y dyller. 28‘Ha my a worhemmynn may fo kowldhrehevys, ha may fons diwysyk rag gweres an re a gethneth Yudi bys pan vo chi an Arloedh gorfennys. 29Ha may roller gans rach rann a drubyt Kelesyria ha Fenikia dhe'n dus ma, henn yw dhe Zerubbabel an governour, rag sakrifia dhe'n Arloedh rag terewi ha hordhes hag eyn, 30hag ynwedh ys ha hoelan ha gwin hag oyl, prest pub blydhen heb hokya, rag us pub-dydhyek dell dhiskwettho an oferysi yn Yerusalem, 31rag may fo offrynnow diwes gwrys dhe'n ughella Duw rag an myghtern ha'y fleghes, ha may pyssons rag aga bewnans.’

32Ev a worhemmynnis, mar kwrella nebonan kammdremena po mannhe an taklow yw skrifys omma, may fo keber kemmerys dhiworth y ji ha'n gwrier kregys warnedhi, ha ma fo oll y pythow daskorrys dhe'n myghtern.

33Rakhenna re dhiswrello an Arloedh, may helwir war y hanow ena, pub myghtern ha kenedhel hag a ystynn aga diwleuv rag lettya po shyndya chi an Arloedh usi yn Yerusalem.

34‘My, myghtern Darius, re ordenas may fo gwrys gans rach, dell yw ragsettys omma.’