Sakrans an Tempel

1Ena Sisinnes governour Kelesyria ha Fenikia, ha Sathrabuzanes ha'ga howetha, owth holya gorhemmynnow myghtern Darius, 2a worweli an ober sans gans rach meur, ow kesoberi gans henavogyon an Yedhewon ha soedhogyon an tempel. 3An ober sans a seweni, ha'n brofoesi Haggay ha Zekaria ow profoesa; 4hag i a'n gorfennas herwydh gorhemmynn an Arloedh, Duw Ysrael. Yndella herwydh arghadow Kyrus ha Darius hag Artakserkses, myghternedh an Persianys, 5an chi sans a veu gorfennys erbynn an tressa warn ugens a'n mis Adar, y'n hweghves blydhen a vyghtern Darius. 6Ha pobel Ysrael, an oferysi, an Levysi ha'n re erell a'n divroedh a omguntellas gansa, a wrug herwydh an pyth o skrifys yn lyver Moyses. 7I a offrynnas yn sakrans tempel an Arloedh kans tarow, dew kans hordh, peswar kans oen, 8ha dewdhek bogh yowynk rag pegh oll Ysrael, herwydh niver dewdhek ledyer loethow Ysrael; 9ha'n oferysi ha'n Levysi a sevis gwiskys yn aga dillas, herwydh aga theyluyow, rag servisyow an Arloedh, Duw Ysrael, herwydh lyver Moyses, ha'n borthoryon orth pub yet.

An Pask

10Mebyon Ysrael a dheuth a'n gethneth a woelyas an pask y'n peswardhegves dydh a'n kynsa mis wosa an oferysi dhe vos glanhes war-barth. 11Ny veu glanhes oll mebyon an divroedh, mes oll an Levysi a veu glanhes war-barth, 12hag i a sakrifias oen an pask rag oll mebyon an divroedh ha rag aga breder aga honan an oferysi, hag ragdha i aga honan. 13Oll mebyon Ysrael re dhehwelsa a'n divroedh a'n dybris, oll an re re dhibarthsa dhiworth taklow kasadow poblow an tir ha re hwilsa an Arloedh. 14Seyth dydh i a woelyas goel an bara heb goell, ow lowenhe dherag an Arloedh, 15rag ev dhe janjya bodh myghtern Asshur a-dro dhedha, ha krevhe aga diwleuv rag servis an Arloedh, Duw Ysrael.