Tewlel an Gwragedh Estren dhe-ves

1Ena Ezra eth yn-mes hag yth eth dhiworth klos an tempel dhe jambour Yehohanan mab Elyashib, 2hag a spenas an nos ena; ha ny dhybris bara nag eva dowr, rag yth esa ev ow kyni war anewnderyow meur an routh. 3Ha gwarnyans a veu gwrys dre Yudi ha Yerusalem dhe oll re dhehwelsa a dhivroedh, dhe omguntell yn Yerusalem, 4ha seul na omguntellas ena a-ji dhe dhew dhydh potri, herwydh ervirans ledyoryon an henavogyon, y fia synsys aga chatel rag sakrifia ha'n wer aga honan a via tewlys yn-mes a routh an re re dhehwelsa a gethneth.

5Ena gwer loeth Yuda ha Benyamin a omguntellas yn Yerusalem a-ji dhe dri dydh, hemm o an nawves mis, yn ugensves dydh an mis. 6Oll an routh a esedhas y'n plen efan dherag an tempel, ow tegrena drefenn an hager-awel y'n eur na. 7Ena Ezra a sevis hag a leveris dhedha, ‘Hwi re dorras an lagha ha re dhemmedhis benynes estren, hag yndella hwi re voghhas pegh Ysrael. 8Ytho konfessewgh lemmyn ha rewgh glori dhe'n Arloedh, Duw agan tasow, 9Ha gwrewgh herwydh y vodh; gwrewgh dibarth yntredhowgh hwi ha poblow an tir ha'gas gwragedh estren.’

10Ena oll an routh a armas hag a leveris gans lev ughel, ‘Ni a wra dell leversys. 11Mes an routh yw bras ha gwav yw hi, ha ny yllyn ni sevel a-ves. Nyns yw hemma ober a yllyn y wul a-ji dhe unn jydh po dew, rag ni re beghas kemmys y'n taklow ma. 12Yndella trigens omma ledyoryon an routh; ha'n re usi yn agan trevow hag a's teves gwragedh estren, dens i y'n termyn apoyntys, 13gans an henavogyon ha breusysi a bub le, bys pan vyn ni rydhhes a gonnar an Arloedh y'n mater ma.’

14Yonathan mab Asahel ha Yahzia mab Tikva, a omgemmeras an dra herwydh an ambosow ma, ha Meshullam ha Levi ha Shabbethay a servyas gansa avel breusysi. 15Ha'n re dehwelys a dhivroedh a wre herwydh oll hemma.

16Ezra an oferyas a dhewisas ragdho y honan pennow chiow aga thasow, oll anedha orth aga hanow; hag yn loer nowydh an degves mis i a dhallathas hwithra an dra. 17Ha kenyow an wer a's tevo gwragedh estren a veu degys dhe dhiwedh yn loer nowydh an kynsa mis.

An Re a Dhemmedhsa Gwragedh Estren

18A'n oferysi, an re a veu kuntellys war-barth hag a's tevo gwragedh estren, y feu: 19a mebyon Yeshua mab Yosedek ha'y vreder, Maaseya, Eliezar, ha Yodan. 20I a ambosas may hworrens dhe-ves aga gwragedh estren, ha dhe offrynna hordhes avel prenedh a'ga hammwrians. 21A vebyon Immer: Hanani ha Zebadia ha Maaseya ha Shemaia ha Yehiel hag Azaria. 22A vebyon Pashhur: Elyoenay, Maaseya, Yshmael, ha Nathanael, ha Gedalia, ha Salthas.

23Hag a'n Levysi: Yozabad ha Shimei ha Kelita, ha Pethahia ha Yuda ha Yona. 24A ganoryon an tempel: Elyashib ha Zakkur. 25A'n borthoryon: Shallum ha Telem.

26A Ysrael, a vebyon Parosh: Ramia, Yzzia, Malkia, Miyamin, hag Eleazar, hag Asibias, ha Benaya. 27A vebyon Elam: Mattania ha Zekaria, Yezrielus hag Abdi, ha Yeremoth hag Elias. 28A vebyon Zamoth: Elyadas Elyashib, Othonia, Yeremoth, ha Zabad ha Zerdaya. 29A vebyon Bebay: Yehohanan ha Hanania ha Zabbay hag Emathis. 30A vebyon Mani: Olamus, Mamuchus, Yedayos, Yashub, ha Sheal ha Yeremoth. 31A vebyon Addi: Naathus ha Moossias, Lakkunus ha Naydus, ha Beskaspasmys ha Sesthel, ha Balnuus ha Manasseas. 32A vebyon Annan, Elionas hag Asayas ha Melkias ha Sabbayas ha Simon Kosameus. 33A vebyon Hashum: Mattenay ha Mattatta ha Zabad hag Elifelet ha Manasse ha Shimei. 34A vebyon Bani: Yeremias, Momdius, Maerus, Yoel, Mamday ha Pedias hag Anos, Karabasion hag Elyashib ha Mamnitanemus, Eliasis, Binnuy, Elialis, Shimei, Shelemia, Nethania. A vebyon Ezora: Shashay, Azarel, Azael, Samatus, Zambris, Yosep. 35A vebyon Nooma: Mazitias, Zabad, Iddo, Yoel, Benaya, 36Oll an re ma re dhemmedhsa gwragedh estren, hag i a's gorras dhe-ves war-barth ha'ga fleghes.

Ezra a Lenn an Lagha dhe'n Bobel

37Yth esa an oferysi ha'n Levysi ha pobel Ysrael trigys yn Yerusalem hag y'n pow. Yn loer nowydh an seythves mis, pan esa pobel Ysrael yn aga threvesigethow, 38ha'n routh oll o omguntellys gans unn akord y'n plen ledan dherag yet an howlsedhes a'n tempel, 39i a leveris dhe Ezra an arghoferyas ha lenner may trolla lagha Moyses re beu res gans an Arloedh, Duw Ysrael. 40Yndella an arghoferyas a dhros an lagha, rag oll an routh, gwer, benynes, hag oll an oferysi may klewens an lagha, yn loer nowydh an seythves mis. 41Ev a lennas y'n plen ledan dherag yet an tempel a-dhia'n bora bys hanter-dydh yn mysk keffrys gwer ha benynes; hag oll an routh a attendyas an lagha. 42Ezra an oferyas ha lenner an lagha a sevis war an vynk a brenn re bia pareusys, 43ha rybdho y sevis Mattathia, Shema, Anania, Azaria, Uria, Hezekia ha Baalsamus a-dhyghowbarth, 44hag a-gledhbarth Pedaya, Mishael, Malkiya, Lothasubus, Nabaria, ha Zekaria. 45Ena Ezra a gemmeras lyver an lagha yn golok an routh, rag ev a'n jevo an tyller a enor a-ragdha i oll. 46Pan igoras an lagha i oll a sevis a'ga sav, hag Ezra a vennigas an Arloedh, ughella Duw, Duw an luyow, an Ollgalloesek, 47ha'n routh oll a worthybis, ‘Amen.’ I a dhrehevis aga diwleuv, hag a goedhas dhe'n dor hag a wormolas an Arloedh. 48Yeshua hag Anniuth ha Sherabia, Yadinus, Akkub, Shabbethay, Hodia, Mayannas ha Kelita, Azaria ha Yozabad, Hanan, Pelaya, an Levysi, a dhyskas lagha an Arloedh, yn kettermyn ow tisplegya an pyth a veu lennys.

49Ena Attharates a leveris dhe Ezra an arghoferyas ha lenner, ha dhe'n Levysi esa ow tyski an routh, ha dhe oll, 50‘An jydh ma yw sans dhe'n Arloedh’ – lemmyn yth esa oll owth oela dell glewens an lagha – 51‘ytho kewgh war agas fordh, dybrewgh an blonek hag evewgh an taklow hweg, ha dannvenewgh rannow dhe'n re na's teves travyth; 52rag an jydh yw sans dhe'n Arloedh; ha na vedhewgh trist, rag an Arloedh a'gas ughelha.’ 53An Levysi a worhemmynnis dhe'n bobel, ow leverel, ‘An jydh ma yw sans, na vedhewgh trist.’ 54Ena oll eth war aga fordh, dhe dhybri hag eva ha lowenhe, ha dhe ri rannow dhe'n re na's tevo travyth, ha dhe wul lowender meur; 55rag ynspirys vons gans an geryow re bia dyskys dhedha. Hag i a omguntellas war-barth.