Krist Agan Pledyas

1Ow fleghigyow, an re ma a skrifav dhywgh, rag na begghowgh. Ha mar pegh denvyth, yma dhyn pledyas gans an Tas, Yesu Krist, an gwiryon. 2Hag ev yw dehwelyans rag agan peghosow: ha nyns yw unnsel rag agan peghosow ni, mes ynwedh rag peghosow an bys oll. 3Ha dredhi y hyllyn bos sur y'n aswonnyn, mar kwithyn y worhemmynnow. 4Neb a lever, ‘My a'n aswonn’, mes ny with y worhemmynnow, gowleveryas yth yw ev, ha nyns usi an gwirder ynno. 5Mes piwpynag a synso y er, ynno yth yw kerensa Duw perfydhhes: dredhi y hwodhon, ni dhe vos ynno. 6Neb a lever ev dhe driga ynno, y tegoedh dhodho ynwedh kerdhes par dell gerdhi ev.

An Gorhemmynn Nowydh

7Hwi garadowyon, ny skrifav dhywgh gorhemmynn nowydh, mes gorhemmynn koth a'gas bo a-dhia'n dalleth. An gorhemmynn koth yw an ger re glewsowgh. 8Arta, gorhemmynnow nowydh a skrifav dhywgh, an pyth yw gwir ynno ev hag ynnowgh hwi: rag tremenys yw an tewlder ha'n gwir wolow lemmyn a splann. 9Neb a lever y vos y'n golewder, hag a gas y vroder, yma ev y'n tewlder bys omma. 10Neb a gar y vroder a drig y'n golewder ha nyns eus ynno ken a drebuchya. 11Mes neb a gas y vroder yma ev yn tewlder, hag a gerdh yn tewlder, ha ny wonn ev ple'th a, rag tewlder dhe dhalla y dhewlagas.

12My a skrif dhywgh hwi, fleghigyow,

drefenn bos gevys dhywgh agas peghosow a-barth y hanow ev.

13My a skrif dhywgh hwi, tasow,

drefenn hwi dh'y aswonn neb usi a-dhia'n dalleth.

My a skrif dhywgh, gwer yowynk,

drefenn hwi dhe fetha an tebel el. My a skrif dhywgh hwi, fleghigyow, drefenn hwi dhe aswonn an Tas.

14My re skrifas dhywgh, tasow,

drefenn hwi dhe aswonn neb usi a-dhia'n dalleth.

My re skrifas dhywgh, gwer yowynk,

drefenn hwi dhe vos krev ha ger Duw dhe driga ynnowgh ha hwi dhe fetha an tebel el.

15Na gerewgh an bys, na'n traow usi y'n bys. Mar kar nebonan an bys, nyns usi ynno kerensa Duw. 16Rag pup-tra eus y'n bys, lust an kig ha lust an lagasow ha goeth bewnans, nyns esons a'n Tas mes a'n bys. 17Ha'n bys a dremen, ha'y lust: mes neb a wra bodh Duw a vew bys vykken.

An Antekrist

18A fleghigyow, yth yw an diwettha eur: ha dell re glewsowgh y teu Antekrist, y'n eur ma yma ynwedh lies Antekrist; dredhi y hwodhon hy bos an diwettha eur. 19I eth yn-mes a-dhiworthyn, mes ahanan nyns esens; rag mar pens i ahanan, y pessens genen; mes i eth yn-mes, rag may fo diskwedhys nag esens i oll dhiworthyn ni. 20Mes hwi a'gas beus untyans gans an Sans, ha hwi a woer pup-tra.2:20 hwi a woer pup-tra: War-lergh re a'n dornskrifow hwi oll a woer. 21Ny skrifis dhywgh drefenn na wodhowgh an gwirder, mes drefenn hwi dh'y wodhvos, ha godhvos nag eus gow a-dhiworth an gwir. 22Piw yw an gowleveryas marnas neb a nagh Yesu dhe vos an Krist? Hemm yw an Antekrist neb a nagh an Tas ha'n Mab. 23Pub huni neb a nagh an Mab, na byth moy ny'n jeves an Tas; neb a aswonn an Mab a'n jeves an Tas ynwedh. 24Triges ynnowgh, an pyth re glewsowgh a-dhia'n dalleth. Mar trig ynnowgh an pyth re glewsowgh a-dhia'n dalleth, hwi ynwedh a wra triga y'n Mab hag y'n Tas. 25Ha hemm yw an ambos re ambosas dhyn,2:25 dhyn: War-lergh re a'n dornskrifow dhywgh. bewnans heb diwedh.

26An re ma re skrifis dhywgh a-dro dhe'n re a vynnsa agas toella. 27Mes an untyans re gevsowgh ganso a drig ynnowgh ha ny'gas beus edhomm a dhyskans gans denvyth: mes par dell wra an keth untyans ma agas dyski a-dro dhe bup-tra, ha'n untyans yw gwir, ha nyns yw gow, trigewgh ynno, dell re'gas dyskas.

Fleghes Duw

28Ha lemmyn, fleghigyow, trigewgh ynno rag ma'gan bo fydhyans ynno pan omdhiskwettho, ha ma na'gan bo meth a-ragdho orth y dhevedhyans. 29Mar kodhowgh y vos ewn, y hwodhowgh pubonan a wra ewnder dhe vos dineythys anodho.