1Otta, py par kerensa re ros an Tas dhyn, bys ma'gan henwir fleghes Duw. Ytho ny'gan aswonn an bys drefenn na'n aswonni ev. 2Hwi garadowyon, lemmyn yth on fleghes Duw, ha ny welir hwath pandr'a vydhyn: mes ni a woer y fydhyn haval dhodho pan omdhiskwettho; rag ni a wra y weles dell yw ev. 3Ha pub den a'n jeves an govenek ma ynno a omlanha, poran dell yw ev glan.

4Piwpynag a beggho a dremen dres an lagha: rag peghadow yw fara anlaghel. 5Ha hwi a woer y feu diskwedhys rag doen agan peghosow dhe-ves; hag ynno nyns eus peghes. 6Ny begh neb a drig ynno: neb a begh, ny'n gwelas na'n aswonnis. 7Fleghigow, na esewgh denvyth dh'agas toella; neb a wra ewnder yw ewn, par dell yw ev ewn. 8Neb a begh, a'n jowl yma; rag an jowl a begh a-dhia'n dalleth. Dhe'n porpos ma y feu diskwedhys Mab Duw, rag may tistrua oberow an jowl. 9Neb yw dineythys a Dhuw, ny begh ev; rag y has a bes ynno: ha ny yll ev pegha, drefenn y vos dineythys a Dhuw. 10Yn homma yth yw diskwedhys fleghes Duw, ha fleghes an jowl: neb na wra ewnder, nyns usi ev a Dhuw, na'n den na gar y vroder.

Kerewgh an Eyl y Gila

11Rag hemm yw an messaj re glewsowgh a-dhia'n dalleth, may karren an eyl y gila. 12Nyns yw avel Kayn, esa a'n tebel el, hag a voldras y vroder. Ha prag y'n moldras? Drefenn bos y oberow y honan drog, ha bos re y vroder da. 13Na vedhewgh sowdhenys, A vreder, mara'gas kas an bys. 14Ni a woer ni dhe dremena a'n mernans dhe'n bewnans, drefenn ni dhe gara an vreder. Neb na gar y vroder, a drig yn mernans. 15Neb a gas y vroder, moldrer yw: hag y hwodhowgh na'n jeves moldrer vyth bewnans heb diwedh ow triga ynno. 16Dredhi ni a wel kerensa, drefenn ev dhe hepkorr y vewnans ragon: ha ni a dal hepkorr agan bewnans rag an brederedh. 17Mes neb a'n jeves pyth an bys ma, hag a wel bos dh'y vroder edhomm hag a dhege y golonn orto, fatell drig ynno kerensa Duw?

Omfydhyans a-rag Duw

18A fleghigyow, na geryn yn ger nag yn taves, mes yn ober hag yn gwirder. 19Ha dredhi y hwodhon ni dhe vos a'n gwir, ha ni a hebaskha agan kolonn a-dheragdho. 20Rag mara'gan kuhudh agan kolonn ni, Duw yw brassa ages agan kolonn, hag a woer pup-tra. 21Hwi garadowyon, mar ny'gan kuhudh agan kolonn, ytho ni agan beus fydhyans a-rag Duw. 22Ha ni a'gan beus ganso pypynag a pysyn, drefenn ni dhe witha y worhemmynnow ha ni dhe wul an pyth yw plegadow a-ragdho.

23Ha hemm yw y worhemmynn, may kryssyn yn hanow y Vab Yesu Krist, ha may kyrryn an eyl y gila, dell ros gorhemmynn dhyn. 24Ha'n re a with y worhemmynnow, a drig ynno, hag ynna ev a drig. Ha dredhi y hwodhon y trig ev ynnon, der an spyrys re ros dhyn.