Spyrys Duw ha Spyrys an Antekrist

1Hwi garadowyon, na grysewgh dhe bub spyrys, mes prevewgh an spyrysyon, mars esons i a Dhuw: rag gallas fals profoesi bals yn-mes dhe'n bys. 2Dredhi yth aswonnowgh Spyrys Duw: pub spyrys a avow Yesu Krist dhe vos devedhys y'n kig, yma ev a Dhuw. 3Ha pub spyrys na gonfess Yesu Krist dhe vos y'n kig, nyns usi ev a Dhuw: ha hemm yw an keth spyrys a Antekrist, may klewsowgh anodho y to; ha bys omma yma ev y'n bys. 4A Dhuw yth esowgh hwi, A fleghigyow, ha hwi re's fethas: drefenn bos ynnowgh neb yw brassa ages neb usi y'n bys. 5A'n bys ymons, yndella y kewsons a'n bys, ha'n bys a's klew. 6A Dhuw yth eson: neb a aswonn Duw a'gan klew; neb nag usi a Dhuw, ev ny'gan klew ni. Yndella yth aswonnyn an spyrys a wirder, ha'n spyrys a gammdybyans.

Duw yw Kerensa

7Hwi garadowyon, keryn an eyl y gila: rag yma kerensa a Dhuw; ha pubonan a gar yw genys a Dhuw, hag a aswonn Duw. 8Neb na gar ny aswonn ev Duw; rag Duw yw kerensa. 9Dre hemma y feu diskwedhys kerensa Duw orthyn, drefenn Duw dhe dhannvon y unn Vab dineythys y'n bys, rag may fewen dredho. 10Yn hemma yw kerensa, nyns yw ni dhe gara Duw, mes ev dhe dhannvon y Vab dhe vos an dehwelyans rag agan peghosow. 11Hwi garadowyon, kemmys mara'gan kara Duw, ni a dal kara an eyl y gila. 12Bythkweth ny welas denvyth Duw. Mar keryn an eyl y gila, Duw a drig ynnon, ha'y gerensa yw perfydhhes ynnon.

13Dredhi y hwodhon ni dhe driga ynno, hag ynnon ni ev dhe driga, drefenn ev dhe ri dhyn a'y Spyrys. 14Ha ni re welas ha ni a deg dustuni, y hwrug an Tas dannvon an Mab dhe vos Selwador an bys. 15Piwpynag a gonfessyo Yesu dhe vos Mab Duw, Duw a drig ynno, hag ev a drig yn Duw. 16Ha ni re aswonnis, ha krysi an gerensa a'n jeves Duw orthyn. Duw yw kerensa; ha neb a drig yn kerensa a drig yn Duw, ha Duw a drig ynno ev. 17Dre hemma yth yw agan kerensa perfydhhes, rag ma'gan bo fydhyans dydh breus; rag dell yw ev, yndella yth on y'n bys ma. 18Nyns eus own vyth yn kerensa; mes kerensa berfydh a dewl own yn-mes; rag own a'n jeves torment. Neb a'n jeves own, nyns yw ev perfydhhes yn kerensa. 19Ni a gar drefenn ev dh'agan kara kynsa. 20Mar lever nebonan, ‘My a gar Duw’, ha kasa y vroder, gowleveryas yw: rag neb na gar y vroder a welas ev, ny woer ev kara Duw na welas ev. 21Ha'n gorhemmynn ma a'gan beus ganso: Neb a gar Duw, kares y vroder ynwedh.