Fydh a Feth an Bys

1Pub huni a grys Yesu dhe vos an Krist yw genys a Dhuw; ha pub huni a gar dineythor a gar ynwedh an flogh dineythys ganso. 2Dre hemma y hwodhon y keryn fleghes Duw, pan geryn Duw ha gwitha y worhemmynnow. 3Rag hemm yw kerensa Duw, may hwitthyn ni y worhemmynnow: ha nyns yw y worhemmynnow ankensi. 4Rag piwpynag a vo genys a Dhuw a feth an bys. Ha hemm yw an budhogoleth a fethas an bys: agan fydh. 5Piw yw ev a feth an bys saw neb a grys Yesu dhe vos Mab Duw?

An Dustuni a-dro dhe'n Mab

6Hemm yw neb a dheuth dre dhowr ha dre woes, Yesu Krist; ha nyns o unnsel dre dhowr, mes dre dhowr ha dre woes. Ha'n Spyrys yw an dustunier, rag an Spyrys yw gwirder. 7Rag yma tri a dheg dustuni:5:7 War-lergh re a'n dornskrifow Rag yma tri a dheg dustuni yn nev, an Tas, an Ger ha'n Spyrys Sans, ha'n tri ma yw onan. 8an Spyrys, an dowr, ha'n goes: ha'n tri ma yw unnver.5:8 War-lergh re a'n dornskrifow hag yma tri a dheg dustuni y'n nor: an Spyrys, an dowr ha'n goes, ha'n tri ma yw unnver. 9Mar kevyn an dustuni a dus, dustuni Duw yw brassa: rag hemm yw dustuni Duw a dustunias a-dro dh'y Vab. 10Neb a grys yn Mab Duw a'n jeves an dustuni ynno y honan. Neb na grys yn Duw, re'n gwrug gowleveryas; rag na grysis an dustuni re ros a-dro dh'y Vab. 11Ha hemm yw an dustuni, Duw dhe ri dhyn bewnans heb diwedh, ha bos an bewnans ma yn y Vab. 12Neb a'n jeves an Mab a'n jeves bewnans; neb na'n jeves Mab Duw, ny'n jeves ev bewnans.

Godhvos an Bewnans heb Diwedh

13My re skrifas an re ma dhywgh a grys yn hanow Mab Duw, rag may hwodhvowgh bos dhywgh bewnans heb diwedh. 14Ha hemm yw an fydhyans a'gan beus ynno: mar pysyn neppyth dhiworto herwydh y vodh, ev dh'agan klewes. 15Ha mar kodhon ev dh'agan klewes yn pypynag a byssyn, ni a woer ni dhe gavoes an pyth a wovynnsyn orto. 16Den mar kwel y vroder ow pegha peghes nag eus bys yn mernans, ev a wra pysi, ha Duw a re dhodho bewnans rag an re na beghons bys yn mernans. Yma peghes yw peghes bys yn mernans; ny lavarav y tylir pysi rakhenna. 17Oll kammwrians yw peghes, mes yma peghes nag yw bys yn mernans.

18Ni a woer na begh piwpynag a vo genys a Dhuw, mes Neb a veu genys a Dhuw a'n gwith, ha na'n toch an tebel el. 19Ni a woer ni dhe vos a Dhuw, ha bos oll an bys yn nerth an tebel el. 20Ha ni a woer re dheuth Mab Duw ha re ros dhyn konvedhes, dhe aswonn neb yw gwiryon; hag yth eson ynno ev yw gwiryon, yn y Vab Yesu Krist. Hemm yw an gwir Dhuw ha bewnans heb diwedh.

21A fleghigyow, omwithewgh rag idolys.