Adoniya a Assay Dalghenna an Tron

1Myghtern Davydh o gyllys koth yn y dhydhyow; hag i a'n kudhas gans dillasow, mes ny ylli omdoemma. 2Y wesyon a leveris dhodho, ‘Bedhes gwyrghes yowynk hwilys rag ow arloedh an myghtern; ha gas hi dhe sevel a-rag an myghtern ha bos gwithyadores; ha gas hi dhe wrowedha y'th askra, may kaffo ow arloedh an myghtern toemmder.’ 3I a hwilas mowes teg ytho der oll pow Ysrael, ha kavoes Abishag an Shunammyades, hag i a's dros dhe'n myghtern. 4An vowes o pur deg, ha hi a veu gwithyades dhe'n myghtern, ha menystra dhodho: mes ny wrug an myghtern hy aswonn.

5Adoniya mab Haggith a omdhrehevis, ow leverel, ‘My a vydh myghtern’: hag ev a bareusis ragdho charettow ha marghogyon, ha deg korfwithyas ha dew-ugens rag poenya a-ragdho. 6Ny wrug y das y geredhi bythkweth ow leverel. ‘Prag re wruss'ta yndella?’ Hag ynwedh ev o pur deg y semlans; hag ev a veu dineythys nessa wosa Absalom. 7Ev a geskusulyas gans Yoab mab Seruya, ha gans Abiathar an oferyas: hag i a ros skoedhyans dhe Adoniya. 8Mes Sadok an oferyas, ha Benaya mab Yehoyada, ha Nathan an profoes, ha Shimei, ha Rei, ha kasoryon Davydh, nyns esens gans Adoniya.

9Adoniya a sakrifias deves hag oghen ha bualyon peskys ryb men Zoheleth, usi ryb En-rogel, hag ev a elwis oll y vreder, mebyon an myghtern, hag oll soedhogyon ryel Yuda. 10Mes ny elwis Nathan an profoes, na Benaya, na'n gasoryon, na Solomon y vroder.

11Ena Nathan a leveris dhe Bathsheba mamm Solomon, ‘A ny glewsys Adoniya mab Haggith dhe reynya, ha ny woer henna Davydh agan arloedh? 12Lemmyn ytho deus, gas my dhe ri dhis kusul, may hylli sawya dha vewnans dha honan, ha bewnans dha vab Solomon. 13Ke ha mos a-ji dhe'n myghtern Davydh ha lavar dhodho, “Ow arloedh an myghtern, a ny desys dhe'th vaghteth ow leverel: Solomon dha vab a reyn war ow lergh, hag ev a wra esedha war ow thron? Prag y reyn Adoniya ytho?” 14Ena my a dheu a-ji ynwedh war dha lergh, ha ty hwath ow kewsel gans an myghtern, hag afydhya dha eryow.’

15Ytho Bathsheba eth a-berth y'n chambour dhe'n myghtern: ha'n myghtern o pur goth. Yth esa Abishag an Shunammyades ow menystra dhe'n myghtern. 16Bathsheba eth war benn-dewlin, hag omblegya a-rag an myghtern. Ha'n myghtern a leveris, ‘Pandr'a vynnydh?’ 17Ha hi a leveris dhodho, ‘Ow arloedh, ty a dos dhe'th vaghteth re'n Arloedh dha Dhuw, ow leverel: Dha vab Solomon a reyn war ow lergh, hag ev a wra esedha war ow thron. 18Mes lemmyn Adoniya re dheuth ha bos myghtern; ha ty, ow arloedh an myghtern, ny'n goer. 19Hag ev re ladhas oghen ha bualyon peskys ha deves pals, ha re elwis oll mebyon an myghtern, hag Abiathar an oferyas, ha Yoab kapten an lu: mes ny elwis Solomon dha was. 20Ha ty, ow arloedh an myghtern, yma lagasow oll Ysrael warnas, dhe leverel dhedha piw a esedh war dron ow arloedh an myghtern war y lergh. 21Poken y hwyrvydh, pan gosk ow arloedh an myghtern gans y dasow, my ha'm mab Solomon dhe vos reknys avel drogoberoryon.’

22Pan esa hi hwath ow kewsel gans an myghtern, Nathan an profoes a dheuth a-ji. 23Y feu leverys dhe'n myghtern, ‘Awotta Nathan an profoes.’ Ha pan dheuth a-rag an myghtern, ev a omblegyas dhe'n myghtern gans y fas dhe'n leur. 24Nathan a leveris, ‘Ow arloedh an myghtern, a wruss'ta leverel, “Adoniya a reyn war ow lergh, hag ev a wra esedha war ow thron”? 25Rag ev yw gyllys yn-nans hedhyw, ha re ladhas oghen ha bualyon peskys ha deves pals, ha re elwis oll mebyon an myghtern, ha kaptenyon an lu, hag Abiathar an oferyas; hag, otta, i a dheber hag eva a-ragdho, ha leverel, “Re vewo myghtern Adoniya.” 26Mes my, my dha was, ha Sadok an oferyas, ha Benaya mab Yehoyada, ha'th was Solomon, ny wrug ev agan gelwel. 27Yw an dra ma gwrys gans ow arloedh an myghtern, heb y dhiskwedhes dhe'th wesyon, piw a esedh war dron ow arloedh an myghtern war y lergh?’

Solomon a Hol Davydh avel Myghtern

28Myghtern Davydh a worthybis, ‘Gelwewgh Bathsheba dhymm.’ Ha hi a dheuth yn lok a'n myghtern, hag a sevis a-rag an myghtern. 29Ha'n myghtern a dos, ha leverel, ‘Dell vew an Arloedh, neb re dhasprenas ow enev a bub ahwer, 30kepar dell des re'n Arloedh, Duw Ysrael, ow leverel, “Solomon dha vab a reyn war ow lergh, hag ev a esedh war ow thron y'm le”, yndella my a wra an jydh ma.’ 31Ena Bathsheba a goedhas war benn-dewlin gans hy fas dhe'n leur, hag omblegya dhe'n myghtern, ha leverel, ‘Re vewo ow arloedh myghtern Davydh bys vykken.’

32Myghtern Davydh a leveris, ‘Gelwewgh dhymm Sadok an oferyas, ha Nathan an profoes, ha Benaya mab Yehoyada.’ Hag i a dheuth a-rag an myghtern. 33An myghtern a leveris dhedha, ‘Kemmerewgh genowgh gwesyon agas arloedh, ha settyewgh Solomon ow mab dhe varghogeth war ow mul, ha'y dhri yn-nans dhe Gihon. 34Ha gesewgh Sadok an oferyas ha Nathan an profoes dh'y untya ena avel myghtern dres Ysrael. Ena hwythewgh an hirgorn, ha leverel, “Re vewo myghtern Solomon!” 35Hag ena ewgh yn-bann war y lergh, may teffo ev hag esedha war ow thron; rag ev a vydh myghtern y'm le: ha my re'n ordenas avel rewler dres Ysrael ha dres Yuda.’ 36Ha Benaya mab Yehoyada a worthybis dhe'n myghtern, ‘Amen! Re lavarro yndella an Arloedh, Duw ow arloedh an myghtern. 37Kepar dell veu an Arloedh gans ow arloedh an myghtern, yndella re bo gans Solomon, ha gul y dron brassa ages tron ow arloedh myghtern Davydh.’

38Ytho Sadok an oferyas, ha Nathan an profoes, ha Benaya mab Yehoyada, ha'n Kerethysi, ha'n Pelethysi, eth yn-nans, hag a settyas Solomon dhe varghogeth war vul myghtern Davydh, hag i a'n dros dhe Gihon. 39Sadok an oferyas a gemmeras korn an oyl yn-mes a'n tylda hag a untyas Solomon. Ena i a hwythas an hirgorn; hag oll an bobel a leveris, ‘Re vewo myghtern Solomon!’ 40Hag oll an bobel eth yn-bann war y lergh, ha'n bobel a hwythas an pibow, hag a lowenhas gans joy bras, may feu folsys an dor gans an son anedha.

41Adoniya hag oll an westoryon esa ganso a'n klewas hag i ow korfenna dybri. Pan glewas Yoab son an hirgorn, yn-medh ev, ‘Prag yma tros a dervans y'n sita?’ 42Ha pan esa hwath ow kewsel, Yonathan mab Abiathar an oferyas a dheuth. Yn-medh Adoniya dhodho. ‘Deus a-ji rag gour a vri osta, ha ty a dhre nowodhow da.’ 43Yonathan a worthybis ha leverel dhe Adoniya, ‘Na dhrov; agan arloedh myghtern Davydh re wrug Solomon myghtern. 44Ha'n myghtern re dhannvonas ganso Sadok an oferyas, ha Nathan an profoes, ha Benaya mab Yehoyada, ha'n Kerethysi, ha'n Pelethysi, hag i a'n settyas dhe varghogeth war vul an myghtern. 45Ha Sadok an oferyas ha Nathan an profoes re'n untyas avel myghtern yn Gihon; hag i res eth yn-bann alena ow lowenhe, may ma an sita yn tervans. Hemm yw an tros a glewsowgh. 46Hag ynwedh Solomon a esedh war an tron ryel. 47Kekeffrys gwesyon an myghtern a dheuth rag benniga agan arloedh myghtern Davydh, ow leverel, “Re wrello Duw hanow Solomon gwell ages dha hanow jy, ha'y dron brassa ages dha dron jy.” Ena an myghtern a omblegyas yn gordhyans war an gweli. 48Hag ynwedh an myghtern a leveris, “Benniges yw an Arloedh, Duw Ysrael, neb re ros nebonan dhe esedha war ow thron hedhyw, ha'm dewlagas ynwedh dh'y weles.” ’

49Ena own a's tevo oll gwestoryon Adoniya; i a sevis, ha pubonan eth war y fordh y honan. 50Adoniya y honan a'n jevo own drefenn Solomon; ytho ev a sevis, hag eth, hag a dhalghennas kern an alter. 51Ena derivys veu dhe Solomon, ‘Adoniya a'n jeves own a vyghtern Solomon, rag ev re dhalghennas kern an alter, ow leverel “Gas myghtern Solomon dhe di orthiv hedhyw, na ladh ev y was gans an kledha.” ’ 52Ha Solomon a leveris, ‘Mar pydh ev den wordhi, ny goedh blewenn vyth a'y benn dhe'n dor; mes mar pydh droktra kevys ynno, ev a verow.’ 53Ena myghtern Solomon a dhannvonas, hag i a'n gemmeras yn-nans dhiworth an alter. Hag ev a dheuth hag omblegya dhe vyghtern Solomon; ha Solomon a leveris dhodho, ‘Ke dhe'th chi.’