Profoes a Yuda

1Dre er an Arloedh gour Duw a dheuth yn-mes a Yuda dhe Bethel, ha Yeroboam a'y sav ryb an alter rag leski offrynn. 2Ev a grias erbynn an alter dre er an Arloedh, ha leverel. ‘A alter, alter, yndellma y lever an Arloedh: “Mab a vydh genys dhe ji Davydh, Yosia y hanow; hag ev a sakrifi warnas oferysi an tylleryow ughel a lesk offrynnow warnas, hag eskern denel a vydh leskys warnas.” ’ 3Ev a ros tokyn an keth jydh, ow leverel, ‘Homm yw an tokyn a gewsis an Arloedh: “An alter a vydh skwardys, ha'n lusu usi warnedhi a vydh diverys yn-mes.” ’ 4Pan glewas an myghtern an pyth a grias gour Duw erbynn an alter yn Bethel, ev a ystynnas y leuv a-dhiworth an alter, ow leverel, ‘Dalghennewgh ynno!’ Mes an leuv a ystynnas er y bynn a wedhras ma na ylli hy thenna war-dhelergh. 5An alter ynwedh a veu skwardys, ha'n lusu a veu diverys yn-mes a'n alter, herwydh an tokyn re rosa gour Duw gans ger an Arloedh. 6An myghtern a leveris dhe wour Duw, ‘Pys lemmyn favour an Arloedh dha Dhuw, ha pys ragov, may fydh daskorrys ow leuv dhymm.’ Ytho gour Duw a bysis war an Arloedh; ha leuv an myghtern a veu daskorrys dhodho hag a dheuth ha bos par dell o kyns. 7Ena an myghtern a leveris dhe wour Duw, ‘Deus tre genev ha kav sosten, ha my a re dhis ro.’ 8Mes gour Duw a leveris dhe'n myghtern, ‘Mar redh dhymm hanter dha wlaskor, nyns av a-ji genes; na ny dhebrav boes po eva dowr y'n tyller ma. 9Rag yndellma y feu gorhemmynnys dhymm gans ger an Arloedh: Ny dhybrydh boes, na eva dowr, na dehweles der an fordh may teuthys.’ 10Ytho ev eth dre fordh arall, ha ny dhehwelis der an fordh may tothya dhe Bethel.

11Yth esa trigys profoes koth yn Bethel. Onan a'y vebyon a dheuth ha leverel pup-tra re wrussa gour Duw an jydh na yn Bethel; ha'n geryow ynwedh re lavarsa dhe'n myghtern i a leveris dh'aga thas. 12Aga thas a leveris dhedha, ‘Py fordh yth eth?’ Ha'y vebyon a dhiskwedhas dhodho an fordh mayth eth gour Duw re dhothya a Yuda. 13Ena ev a leveris dh'y vebyon, ‘Dibrewgh an asen dhymm.’ Ytho i a dhibras an asen ragdho, hag ev a yskynnas warnodho. 14Ev eth war-lergh gour Duw, ha'y gavoes owth esedha yn-dann derebinthenn. Ev a leveris dhodho, ‘Osta gour Duw a dheuth a Yuda?’ Ev a worthybis, ‘Ov.’ 15Ena ev a leveris dhodho, ‘Deus tre genev ha dybri boes.’ 16Mes ev a leveris, ‘Ny allav dehweles genes; na ny dhebrav boes po eva dowr genes y'n tyller ma; 17rag y feu leverys dhymm dre er an Arloedh: Ny dhybrydh boes na eva dowr ena, na dehweles der an fordh may teuthys.’ 18Ena ev a leveris dhodho, ‘My yw profoes ynwedh kepar dell os, hag el a gewsis dhymm dre er an Arloedh: Doro ev genes dhe'th chi may teppro boes hag eva dowr.’ Mes yth esa ow kowleverel. 19Ena gour Duw a dhehwelis ganso, ha dybri boes hag eva dowr yn y ji.

20Dell esens a'ga esedh orth an voes, ger an Arloedh a dheuth dhe'n profoes re'n dros tre. 21Ev a grias erbynn wour Duw a dheuth a Yuda, ‘Yndellma y lever an Arloedh: drefenn ty dhe rebellya erbynn ger an Arloedh, ha ny withsys an gorhemmynn a worhemmynnis an Arloedh dha Dhuw dhis, 22mes dehweles ha dybri boes hag eva dowr y'n tyller may leveris dhis, “Na dheber boes vyth na eva dowr vyth”, ny dheu dha gorf dhe vedh dha dasow.’ 23Wosa gour Duw dhe dhybri boes hag eva, i a dhibras asen dhodho esa dhe'n profoes re'n dros dhe dre. 24Ena dell eth yn-mes, lew a'n metyas war an fordh ha'y ladha. Y gorf a veu tewlys y'n fordh, ha'n asen a sevis rybdho; ha'n lew ynwedh a sevis ryb an korf. 25Tus a dremenas ha gweles an korf tewlys y'n fordh, ha'n lew a'y sav ryb an korf. Hag i a dheuth ha'y leverel dhe'n dre mayth esa trigys an profoes koth.

26Pan glewas hemma an profoes neb a'n drosa tre dhiworth an fordh, ev a leveris, ‘Gour Duw yw neb a rebellyas erbynn ger an Arloedh. An Arloedh re'n ros dhe lew, hag ev a'n skwardyas ha'y ladha herwydh an ger a gewsis an Arloedh dhodho.’ 27Ena ev a leveris dh'y vebyon, ‘Dibrewgh an asen dhymm.’ Ytho i a'n dibras. 28Ev eth ha kavoes an korf tewlys y'n fordh, ha'n asen ha'n lew a'ga sav ryb an korf. Ny dhyb'sa an lew an korf na terri an asen. 29An profoes a gemmeras korf gour Duw yn-bann, ha'y worra war an asen, ha'y dhri arta dhe sita an profoes koth, dhe gyni ha dh'y ynkleudhyas. 30Ev a worras an korf yn y vedh; hag i a gynis warnodho, ow leverel, ‘Ellas, ow broder!’ 31Wosa ev dh'y ynkleudhyas, ev a leveris dh'y vebyon, ‘Pan vydhav marow, ynkleudhyewgh vy y'n bedh may ma ynkleudhys gour Duw; gorrewgh ow eskern ryb y eskern ev. 32Rag an lavar a grias dre er an Arloedh erbynn an alter yn Bethel hag erbynn oll chiow an tylleryow ughel usi yn sitys Samaria, yn sur a dheu ha hwarvos.’

33Wosa hemma ny dreylyas Yeroboam a'y dhrog fordh, mes arta ev a wrug oferysi rag an tylleryow ughel a-dhiworth oll renkasow an bobel. Piwpynag a vynna bos oferyas ev a sakras dhe'n tylleryow ughel. 34An dra ma a dheuth ha bos pegh dhe ji Yeroboam, dh'y dhilea ha'y dhistrui a-dhiworth enep an nor.