Breus war Ji Yeroboam

1Y'n termyn na Abia mab Yeroboam eth yn klav. 2Yeroboam a leveris dh'y wreg, ‘Ke, omdoellwisk, ma na vydh godhvedhys dha vos gwreg Yeroboam, ha mos dhe Shilo; rag yma an profoes Ahiya ena, a leveris dhymm y koetthiv bos myghtern war an bobel ma. 3Kemmer genes deg torth, tesennow, ha pott a vel, ha ke dhodho; ev a lever dhis pandr'a vydh tenkys an maw.’

4Gwreg Yeroboam a wrug yndellma; hi eth yn-rag dhe Shilo, ha dos dhe ji Ahiya. Ny ylli Ahiya gweles, drefenn bos y dhewlagas gwann dre gothni. 5Mes an Arloedh a leveris dhe Ahiya, ‘Yma gwreg Yeroboam ow tos rag govynn orthis a-dro dh'y mab; rag klav yw ev. Yndellma hag yndellma y leverydh dhodho.’

Pan dheuth hi, hi a omwrug bos ken benyn. 6Mes pan glewas Ahiya son hy threys, dell dheuth a-ji dhe'n daras, ev a leveris, ‘Deus a-ji, ty wreg Yeroboam; prag yth esos owth omdoellwiska? Rag dannvenys ov gans yeyn nowodhow ragos. 7Ke, lavar dhe Yeroboam. “Yndellma y lever an Arloedh, Duw Ysrael: My a'th ughelhas a-dhiworth an bobel, ha'th apoyntya rewler war ow fobel Ysrael. 8My a droghas an vyghterneth dhiworth chi Davydh, ha'y ri dhis. Mes ny veus kepar ha'm gwas Davydh, a withas ow gorhemmynnow ha'm holya a leun golonn, ow kul marnas an pyth o ewn y'm dewlagas, 9mes ty re wrug drog a-ugh oll dha ragresegydhyon; ty re wrug duwow erell ragos, ha delowyow teudh, orth ow frovokya dhe sorr, orth ow thewlel a-dryv dha geyn. 10Rakhemma my a dhre drog war ji Yeroboam. My a dregh dhiworth Yeroboam neb a bis erbynn fos, ha keth ha rydh yn Ysrael, ha kowlleski chi Yeroboam, par dell leskir kawgh, bys pan vydh gyllys. 11An keun a dheber an re a deylu Yeroboam a verow y'n sita; hag ydhyn an ayr a dheber an re a verow y'n pow; rag an Arloedh re gewsis.” 12Ke ytho, ke dhe'th chi dha honan. Pan dheu dha dhewdroes y'n sita, an flogh a verow. 13Ysrael oll a gyn ragdho ha'y ynkleudhyas; rag a deylu Yeroboam ny vydh saw unnsel ev ynkleudhys yn ewn y'n bedh, drefenn ynno yw kevys neppyth plegadow dhe'n Arloedh, Duw Ysrael, yn chi Yeroboam. 14Kekeffrys an Arloedh a dhrehav dh'y honan myghtern war Ysrael, a dregh chi Yeroboam; hwath lemmyn hemma a hwer.

15‘An Arloedh a wysk Ysrael, par dell yw broennenn kryghyllys y'n dowr; ev a dhiwreydh Ysrael yn-mes a'n tir da ma a ros dh'aga thasow, ha'ga skattra dres an Ewfrates, drefenn i dhe wul aga Asherim, ow provokya an Arloedh dhe sorr. 16Ev a eskas Ysrael drefenn peghosow Yeroboam, a beghas ha gul Ysrael dhe begha.’

17Ena gwreg Yeroboam a sevis ha diberth, ha dos dhe Tirsa. Kettell dheuth dres treudhow an chi, an flogh a verwis. 18Ysrael oll a'n ynkleudhyas ha kyni ragdho, herwydh ger an Arloedh, a gewsis der y was Ahiya an profoes.

Mernans Yeroboam

19Gwriansow erell Yeroboam, fatell werryas ha fatell reynyas, yw skrifys yn lyver kovadhow myghternedh Ysrael. 20An termyn may reynyas Yeroboam o diw vlydhen warn ugens; ena ev a goskas gans y dasow, ha'y vab Nadab a dheuth war y lergh.

Rehoboam a Reyn war Yuda

21Rehoboam mab Solomon a reynyas yn Yuda. Rehoboam o unn bloedh ha dew-ugens pan dhallathas reynya, hag ev a reynyas seytek blydhen yn Yerusalem, an sita a dhewisis an Arloedh yn-mes a oll loethow Ysrael, dhe worra y hanow ena. Hanow y vamm o Naama an Ammonyades. 22Yuda a wrug an pyth o drog yn golok an Arloedh; i a'n brovokyas dhe avi gans an peghosow a wrussons, moy ages pup-tra re wrussa aga thasow. 23Rag i a dhrehevis dh'aga honan ynwedh tylleryow ughel, peulveyn hag Asherim war bub bre ughel hag yn-dann bub gwydhenn las; 24yth esa ynwedh horys-tempel worow y'n tir. I a wrug oll taklow kasadow an kenedhlow a dhiseritas an Arloedh a-rag pobel Ysrael.

25Y'n pympes blydhen a vyghtern Rehoboam, Shishak myghtern Ejyp a dheuth yn-bann erbynn Yerusalem; 26ev a gemmeras dhe-ves tresoryow chi an Arloedh ha chi an myghtern; ev a gemmeras pup-tra. Ev a gemmeras dhe-ves ynwedh oll an skoesow a owr re wrussa Solomon. 27Ytho myghtern Rehoboam a wrug skoesow a vrons yn aga le, ha'ga ri yn leuv soedhogyon an gorfwithysi, a witha daras chi an myghtern. 28Peskweyth mayth e an myghtern yn chi an Arloedh, an korfwithysi a's degi, hag a-wosa aga dri arta dhe stevell an gorfwithysi.

29Gwriansow erell Rehoboam ha pup-tra a wrug ev, a nyns yns i skrifys yn lyver kovadhow myghternedh Yuda? 30Yth esa bresel yntra Rehoboam ha Yeroboam oll aga dydhyow. 31Rehoboam a goskas gans y dasow hag a veu ynkleudhys gans y dasow yn sita Davydh. Hanow y vamm o Naama an Ammonyades. Y vab Abiyam a dheuth war y lergh.