Abiyam a Reyn war Yuda

1Y'n etegves blydhen a vyghtern Yeroboam mab Nebat, Abiyam a dhallathas reynya war Yuda. 2Ev a reynyas teyr blydhen yn Yerusalem. Hanow y vamm o Maaka myrgh Abishalom. 3Ev a gerdhas yn oll an peghosow re wrussa y das kyns; nyns o y golonn perfydh gans an Arloedh y Dhuw, par dell o kolonn y das Davydh. 4Byttegyns a-barth Davydh an Arloedh y Dhuw a ros dhodho lugarn yn Yerusalem, ow trehevel y vab war y lergh, ha fondya Yerusalem; 5drefenn Davydh dhe wul an pyth o ewn yn golok an Arloedh ha ny dreylyas a-denewen a dravyth a worhemmynnis dydhyow oll y vewnans, marnas yn mater Uria an Hittyas. 6Yth esa bresel yntra Rehoboam ha Yeroboam dydhyow oll y vewnans. 7Gwriansow erell Abiyam, ha pup-tra a wrug, a nyns yns i skrifys yn lyver kovadhow myghternedh Ysrael? 8Abiyam a goskas gans y thasow, hag i a'n ynkleudhyas yn sita Davydh. Ena y vab Asa a dheuth war y lergh.

Asa a Reyn war Yuda

9Y'n ugensves blydhen a Yeroboam myghtern Ysrael, Asa a dhallathas reynya war Yuda; 10ev a reynyas unn vlydhen ha dew-ugens yn Yerusalem. Hanow y vamm o Maaka myrgh Abishalom. 11Asa a wrug an pyth o ewn yn golok an Arloedh, par dell wrussa y das Davydh. 12Ev a worras dhe-ves an horys-tempel worow yn-mes a'n tir, ha dilea oll an idolys re wrussa y dasow. 13Ev a wordhellos ynwedh y vamm Maaka dhiworth hy soedh avel mamm-vyghternes, drefenn hi dhe wruthyl imaj kasadow a Ashera; Asa a droghas dhe'n dor hy thra gasadow ha'y leski yn nans Kidron. 14Mes ny veu an tylleryow ughel kemmerys dhe-ves. Byttegyns kolonn Asa o perfydh gans an Arloedh oll y dhydhyow. 15Ev a dhug a-berth yn chi an Arloedh rohow sakrys y das ha'y rohow sakrys y honan, arghans, owr, ha lestri.

Kevambos gans Aram erbynn Ysrael

16Yth esa bresel ynter Asa ha Baasha myghtern Ysrael oll aga dydhyow. 17Baasha myghtern Ysrael eth yn-bann erbynn Yuda, ha drehevel Rama, may lestta nebonan rag mos yn-mes po dos a-ji dhe diredh Asa myghtern Yuda. 18Ena Asa a gemmeras oll an arghans ha'n owr hag o gesys yn tresorvaow chi an Arloedh ha tresorvaow chi an myghtern, ha'ga ri yn leuv y wesyon. Myghtern Asa a's dannvonas dhe vyghtern Ben-hadad mab Tabrimmon mab Hezyon, myghtern Aram, esa trigys yn Damaskus, ow leverel, 19‘Bedhes kevambos yntra my ha ty, kepar dell veu ynter ow thas ha'th tas jy. Yth esov ow tannvon dhis ro a arghans hag owr; ke, torr dha gevambos gans Baasha myghtern Ysrael, mayth omdenno a-dhiworthiv.’ 20Ben-hadad a woslowas orth myghtern Asa, ha dannvon kaslewydhyon y luyow erbynn sitys Ysrael. Ev a fethas Iyon, Dan, Abel-beth-maaka, hag oll Kinneroth, gans tiredh oll Naftali. 21Pan glewas Baasha hemma, ev a astelas drehevel Rama ha kildenna dhe Tirsa. 22Ena myghtern Asa a worhemmynnis dhe Yuda oll, nagonan o gesys yn-mes: i a dhug dhe-ves meyn ha prenn Rama, gansa may fia Baasha ow trehevel ena. Gansa myghtern Asa a dhrehevis Geba yn Benyamin ha Mispa. 23Oll gweythresow erell Asa, oll y nerth, pup-tra a wrug, ha'n sitys a dhrehevis, a nyns yns i skrifys yn lyver kovadhow myghternedh Yuda? Mes yn y gothni ev a'n jevo kleves yn y dhewdroes. 24Ena Asa a goskas gans y dasow, hag a veu ynkleudhys gans y dasow yn sita y das Davydh. Y vab Yehoshafat a dheuth war y lergh.

Nadab a Reyn war Ysrael

25Nadab mab Yeroboam a dhallathas reynya war Ysrael y'n nessa blydhen a Asa myghtern Yuda; ev a reynyas war Ysrael diw vlydhen. 26Ev a wrug an pyth o drog yn golok an Arloedh, ow kerdhes yn fordh y das hag y'n pegh a wrug ev dhe Ysrael y wul.

27Baasha mab Ahiya, a ji Yssakar, a vrasas er y bynn; ha Baasha a'n gweskis yn Gibbethon, o perghennys gans an Filistysi; rag yth esa Nadab hag Ysrael oll ow kul esedhva war Gibbethon 28Ytho Baasha a ladhas Nadab y'n tressa blydhen a Asa myghtern Yuda, ha reynya yn y le. 29Pan dheuth ha bos myghtern, ev a ladhas oll teylu Yeroboam; ny asas dhe ji Yeroboam nagonan owth anella, bys pan y'n distrusa, herwydh ger an Arloedh a gewsis der y was Ahiya an Shilonyas. 30Hemma a hwarva drefenn an peghosow a wrug Yeroboam hag a wrug dhe Ysrael aga gul, ha drefenn an sorr may frosas an Arloedh, Duw Ysrael, dhodho.

31Lemmyn gwriansow erell Nadab, ha pup-tra a wrug, a nyns yns i skrifys yn lyver kovadhow myghternedh Ysrael? 32Yth esa bresel ynter Asa ha myghtern Baasha oll aga dydhyow.

Reyn Baasha

33Y'n tressa blydhen a Asa myghtern Yuda, Baasha mab Ahiya a dhallathas reynya war Ysrael oll yn Tirsa; ev a reynyas peder blydhen warn ugens. 34Ev a wrug an pyth o drog yn golok an Arloedh, ow kerdhes yn fordh Yeroboam hag y'n pegh a wrug dhe Ysrael y wul.