Elias a Dhargan Syghor

1Lemmyn Elias an Tishbeyas, a Tishbe yn Gilead, a leveris dhe Ahab, ‘Dell vew an Arloedh, Duw Ysrael, mayth esov ow sevel a-dheragdho, ny vydh na gluth na glaw an blydhynyow ma, marnas my a re an ger’ 2Ger an Arloedh a dheuth dhodho, ow leverel, 3‘Ke alemma ha treylya dhe'n duryen, hag omgudh ryb nans Kerith, usi a'n duryen dhe'n Yordan. 4Ty a yv dhiworth an gover, ha my re worhemmynnis dhe'n brini-bras dha sostena ena.’ 5Ytho ev eth ha gul herwydh ger an Arloedh; ev eth ha triga ryb gover Kerith, usi a'n duryen dhe'n Yordan. 6An brini-bras a dhug bara ha kig dhodho myttinweyth, ha bara ha kig gorthugherweyth hag ev a evas dhiworth an gover. 7Mes wosa termyn an gover a dhesyghas, drefenn nag esa glaw y'n tir.

Gwedhwes Sarefath

8Ena ger an Arloedh a dheuth dhodho, ow leverel, 9‘Ke lemmyn dhe Sarefath, usi dhe Sidon, ha triga ena; rag my re worhemmynnis dhe wedhwes ena dha sostena.’ 10Ytho ev eth yn-kerdh ha mos dhe Sarefath. Pan dheuth dhe borth an dre, yth esa gwedhwes ena ow keunyssa. Ev a elwis dhedhi ha leverel, ‘Doro dhymm banna dowr mayth yffiv.’ 11Dell esa hi ow mos dh'y gyrghes, ev a elwis dhedhi ha leverel, ‘Doro dhymm temmik bara y'th leuv.’ 12Mes hi a leveris, ‘Dell vew an Arloedh dha Dhuw, ny'm beus torth, marnas dornas a vleus yn seth ha nebes oyl yn podik; my a guntell y'n eur ma nebes keunys mayth ylliv dhe dre ha'ga fareusi ragov ow honan ha rag ow mab, may typpryn anodho, ha merwel.’ 13Elias a leveris dhedhi, ‘Na borth own; ke ha gwra dell leversys; mes gwra dhymm kynsa tesenn vyghan ha'y dri dhymm, hag a-wosa gwra neppyth ragos ha rag dha vab. 14Rag yndellma y lever an Arloedh, Duw Ysrael: Ny vydh gwag an seth a vleus ha ny fyll an podik a oyl bys y'n jydh may tannvon an Arloedh glaw war an nor.’ 15Hi eth ha gul herwydh geryow Elias, ha hi, hag ev, ha'y mayni a dhybris lies dydh. 16Ny veu gwakhes an seth a vleus, na ny fyllis an podik a oyl, herwydh ger an Arloedh a gewsis der Elias.

Elias a selow Mab an Wedhwes

17Wosa hemma mab an venyn, mestres an chi, a dheuth ha bos klav; y gleves o mar sevur ma nag esa anall gesys ynno. 18Hi a leveris dhe Elias, ‘Pyth eus yntredhon ni, A wour Duw? Ty re dheuth dhymm rag dri ow hammweyth dhe gov, ha ladha ow mab!’ 19Mes ev a leveris dhedhi, ‘Ro dhymm dha vab.’ Ev a'n kemmeras a'y askra, ha'y dhoen dhe'n soler mayth esa trigys ha'y worra war y weli y honan. 20Ev a grias war an Arloedh, ‘A Arloedh ow Duw, a dhresys terroes hwath war an wedhwes esov trigys gensi dre ladha hy mab?’ 21Ena ev a omystynnas teyrgweyth war an flogh, ha kria war an Arloedh, ‘A Arloedh ow Duw, gas bewnans an flogh ma dhe dhos ynno arta.’ 22An Arloedh a woslowas orth lev Elias; bewnans an flogh a dheuth arta ynno, hag ev a dhasvewas. 23Elias a gemmeras an flogh, ha'y dhri yn-nans a'n soler a-berth y'n chi, ha'y ri dh'y vamm; ena Elias a leveris, ‘Mir, yma dha vab yn few.’ 24Ytho an venyn a leveris dhe Elias, ‘Lemmyn my a woer dha vos gour Duw, ha bos gwiryonedh ger an ARLOEDH y'th hanow.’