Elias a Dhehwel dhe Ahab

1Wosa lies dydh ger an Arloedh a dheuth dhe Elias, yn tressa blydhen an syghor, ow leverel, ‘Ke, omdhiskwedh dhe Ahab, ha my a dhannvon glaw war an nor.’ 2Ytho Elias eth hag omdhiskwedhes dhe Ahab. An divoetter o sevur yn Samaria. 3Ahab a elwis Obadia, governour y ji. Yth esa Obadia owt perthi own a'n Arloedh yn feur; 4pan esa Yezebel ow ladha profoesi an Arloedh, Obadia a gemmersa kans profoes, aga hudha yn mogowyow, hanter kans yn pubonan, ha'ga sostena gans bara ha dowr. 5Ahab a leveris dhe Obadia, ‘Ke der an tir, bys yn pub fenten a dhowr hag pub nans: martesen ni a gyv gwels rag gwitha an vergh ha'n mulyon yn few, ma na gellyn oll an enyvales.’ 6Ytho i a rannas an tir yntredha rag tremena dredho: Ahab eth yn unn fordh y honan, hag Obadia eth yn ken fordh y honan.

7Pan esa Obadia war an fordh, Elias a dheuth er y bynn; Obadia a'n aswonnis, koedha war y fas, ha leverel, ‘Yw ty, ow arloedh Elias?’ 8Ev a worthybis dhodho, ‘Yth yw my. Ke, lavar dhe'th arloedh bos Elias omma.’ 9Hag ev a leveris, ‘Fatell beghis may teliffri dha was yn leuv Ahab, dhe'm ladha? 10Dell vew an Arloedh dha Dhuw, nyns eus kenedhel na gwlaskor ma na dhannvonas ow arloedh dhe'th hwilas; ha pan leverens, “Nyns, usi ev omma,” ev a wrug dhe'n genedhel po a'n wlaskor na gul ti, na'th kavsens. 11Mes lemmyn ty a lever, “Ke, lavar dhe'th arloedh bos Elias omma.” 12Kettell vydhav gyllys ahanas, spyrys an Arloedh a'th teg ny wonn py le; ytho pan dhov ha leverel dhe Ahab ha ny yll ev dha gavoes, ev a'm ladh. Dha was re borthas own a'n Arloedh a-dhia'm yowynkneth. 13A ny veu leverys dhe'm arloedh an pyth a wrug pan ladhas Yezebel profoesi an Arloedh, fatell gudhis kans profoes a'n Arloedh yn vogow, hanter-kans yn pubonan, ha'ga sostena gans bara ha dowr? 14Mes lemmyn ty a lever, “Ke, lavar dhe'th arloedh bos Elias omma”: ev a'm ladh yn sur.’ 15Elias a leveris, ‘Dell vew Arloedh an luyow, mayth esov ow sevel a-ragdho, my a omdhiskwedh dhodho yn sur hedhyw.’ 16Ytho Obadia eth dhe vetya gans Ahab, ha leverel dhodho; hag Ahab eth dhe vetya gans Elias.

17Pan welas Elias, Ahab a leveris dhodho, ‘Yw ty, neb a drobel Ysrael?’ 18Ev a worthybis, ‘Ny droblis Ysrael; mes ty ha chi dha das a'n gwrug, drefenn hwi dhe eskasa gorhemmynnow an Arloedh ha holya an Baalim. 19Lemmyn ytho dannvon ha kuntell oll Ysrael ragov dhe venydh Karmel, gans an peswar kans ha hanter-kans profoes a Baal ha'n peswar kans profoes a Ashera, a dheber orth moes Yezebel.’

Kesstrif Menydh Karmel

20Ytho Ahab a dhannvonas dhe oll an Ysraelysi, ha kuntell an brofoesi dhe venydh Karmel. 21Ena Elias a dheuth ogas dhe oll an bobel, ha leverel, ‘Pes termyn a vynnowgh kloppya yntra dew dybyans? Mars yw an Arloedh Duw, holyewgh ev; mes mars yw Baal, ena holyewgh ev.’ Mes ny worthybis an bobel ger dhodho. 22Ena Elias a leveris dhe'n bobel, ‘My, my ow honan, yw gesys profoes an Arloedh; mes profoesi Baal yw peswar kans ha hanter-kans. 23Gas dhedha ytho ri dhyn dew lodhen; gas dhedha dewis unn lodhen dh'aga honan, y dreghi dhe demmyn, ha'y worra war an prenn, mes heb enowi tan. 24Ena gelwewgh war hanow agas duw ha my a elow war hanow an Arloedh; an duw neb a worthyp dre dan, ev yw Duw.’ Oll an bobel a worthybis, ‘Kewsys yn ta yw!’ 25Ena Elias a leveris dhe brofoesi Baal, ‘Dewisewgh dh'agas honan onan a'n lodhnow ha'y bareusi yn kynsa, rag hwi yw niverus; ena gelwewgh war hanow aga duw, mes na enowewgh tan.’ 26Ytho i a gemmeras an lodhen a veu res dhedha, y bareusi, ha gelwel war hanow Baal a'n myttin bys yn hanter-dydh, ow kria, ‘A Baal, gorthyp dhyn!’ Mes nyns esa lev, ha nyns esa gorthyp. Hag i a lammas a-dro dhe'n alter re wrussons. 27Dhe hanter-dydh Elias a's skornyas, ow leverel, ‘Kriewgh ughella, rag ev yw duw; poken yma ev owth ombrederi, poken ev re omdennas, poken yma ev ow vyajya. Martesen yma ow koska ha res yw gul dhodho difuna.’ 28Ena i a grias ughella, ha dell o aga usadow, i a omdroghas gans kledhedhyow ha guwow bys pan frosas an goes warnedha. 29Pan dremenas hanter-dydh, i a vuskegis bys yn termyn offrynn an greun, mes nyns esa lev, na gorthyp, na nyns esa nagonan ow koslowes.

30Ena Elias a leveris dhe oll an bobel, ‘Dewgh nes dhymm,’ hag oll an bobel a dheuth nes dhodho. Ev a ewnhas alter an Arloedh re bia tewlys dhe'n dor; 31Elias a gemmeras dewdhek men, herwydh niver loethow mebyon Yakob, may teuth dhedha ger an Arloedh, ow leverel, ‘Ysrael a vydh dha hanow’. 32Gans an meyn ev a dhrehevis alter yn hanow an Arloedh. Ena ev a wrug kanel a-dro dhedhi, bras lowr rag synsi dew vusur a has. 33Nessa ev a restras an prenn, treghi an lodhen dhe demmyn, ha'y worra war an prenn. Ev a leveris, ‘Lenwewgh peswar seth a dhowr ha'y dhinewi war an offrynn leskys ha war an prenn.’ 34Ena ev a leveris, ‘Gwrewgh e eylweyth’; hag i a'n gwrug eylweyth. Arta ev a leveris, ‘Gwrewgh e tressa gweyth’; hag i a'n gwrug tressa gweyth, 35may resas an dowr oll a-dro dhe'n alter, ha lenwel an ganel ynwedh gans dowr.

36Pan dheuth termyn offrynn an greun, an profoes Elias a dheuth nes ha leverel, ‘A Arloedh, Duw Abraham, Ysak, hag Ysrael, bedhes godhvedhys an jydh ma dha vos Duw yn Ysrael, hag ow bos dha was, ha my dhe wul oll an taklow ma orth dha arghadow. 37Gorthyp dhymm, A Arloedh, gorthyp dhymm, mayth aswonno an bobel ty, A Arloedh, dhe vos Duw, ha ty dhe dreylya aga holonn arta war dhe lergh.’ 38Ena tan an Arloedh a dhiyskynnas ha kowlleski an offrynn leskys, an prenn, an meyn, ha'n doust, ha hwath a lapyas an dowr esa y'n ganel. 39Pan y'n gwelas oll an bobel, i a goedhas war aga fas ha leverel, ‘An Arloedh, ev yw Duw, an Arloedh, ev yw Duw.’ 40Elias a leveris dhedha, ‘Dalghennewgh profoesi Baal; na esewgh nagonan anedha dhe dhiank.’ Ena i a's dalghennas; hag Elias a's dros dhe nans Kishon, ha'ga ladha ena.

Diwedh an Syghor

41Elias a leveris dhe Ahab, ‘Ke yn-bann, deber hag yv; rag yma son glaw pals.’ 42Ytho Ahab eth yn-bann dhe dhybri hag eva. Elias eth yn-bann dhe benn Karmel; ena ev a omblegyas war an dor ha gorra y fas ynter y dhewlin. 43Ev a leveris dh'y was, ‘Ke yn-bann lemmyn, mir war-tu ha'n mor.’ Ev a yskynnas ha mires, ha leverel, ‘Nyns eus travyth.’ Ena ev a leveris, ‘Ke arta seyth gweyth.’ 44Y'n seythves gweyth ev a leveris, ‘Mir, yma kommolenn vyghan nag yw brassa es leuv den ow tos yn-bann dhiworth an mor.’ Ena ev a leveris, ‘Ke, lavar dhe Ahab, “Herness dha jarett ha diyskynn kyns an glaw dhe'th lettya.” ’ 45Kyns nep-pell an nevow a dhuhas gans kommol ha gwyns, hag yth esa glaw bras. Ahab a varghogas ha mos dhe Yezreel. 46Mes yth esa leuv an Arloedh war Elias; ev a wrogysas y dhiwglun ha poenya a-rag Ahab oll an fordh dhe Yezreel.