Elias war Venydh Horeb

1Ahab a leveris dhe Yezebel pup-tra re wrussa Elias, ha fatell ladhsa oll an brofoesi gans an kledha. 2Ena Yezebel a dhannvonas kannas dhe Elias, ow leverel, ‘Yndellma re wrello an duwow dhymm, ha moy keffrys, mar ny wrav dha vewnans avel bewnans onan anedha erbynn an termyn ma a-vorow.’ 3Ena ev a borthas own; ev a sevis ha fia a-barth y vewnans, ha dos dhe Beer-sheba yn Yuda, hag ev a asas y was ena.

4Mes ev y honan eth y'n gwylvos, vyaj unn jydh, ha dos hag esedha yn-dann brenn banadhel. Ev a bysis may farwa: ‘Lowr yw; lemmyn, A Arloedh, kemmer ow bewnans, rag nyns ov gwell ages ow thasow.’ 5Ena ev a wrowedhas yn-dann an vanadhel ha koska. Distowgh el a'n tochyas ha leverel dhodho, ‘Sav yn-bann ha dybri.’ 6Ev a viras, hag ena orth y benn yth esa tesenn pebys war veyn poeth, ha seth a dhowr. Ev a evas ha dybri, ha growedha arta. 7El an Arloedh a dheuth an eylweyth, y dochya, ha leverel, ‘Sav yn-bann ha dybri, poken dha vyaj a vydh re ragos.’ 8Ev a sevis, ha dybri hag eva; ena ev eth yn nerth an boes na dew-ugens dydh ha dew-ugens nos dhe Horeb, menydh Duw. 9Ena ev a dheuth dhe vogow, ha spena an nos ena. Ena ger an Arloedh a dheuth dhodho, ow leverel, ‘Pandr'a wredh omma Elias?’ 10Ev a worthybis, ‘My re beu pur dhiwysyk rag an Arloedh, Duw an luyow, rag an Ysraelysi re eskasas dha gevambos, terri dha alteryow, ha ladha dha brofoesi gans an kledha. Nyns eus nagonan gesys marnas my, hag ymons ow hwilas ow bewnans, dh'y gemmeres dhe-ves.’

Elias a Dheu Erbynn Duw yn Horeb

11Ev a leveris, ‘Ke ha sevel war an menydh a-rag an Arloedh, rag yma an Arloedh ow tremena.’ Gwyns krev a dheuth, ow folsa menydhyow ha terri kerrek dhe demmyn a-rag an Arloedh, mes nyns esa an Arloedh y'n gwyns; ha wosa an gwyns yth esa dorgrys, mes nyns esa an Arloedh y'n dorgrys; 12ha wosa an dorgrys tan, mes nyns esa an Arloedh y'n tan; ha wosa an tan son taw pur. 13Pan y'n klewas Elias, ev a vaylyas y fas yn y vantell ha mos ha sevel yn entrans an vogow. Ena y teuth lev dhodho a leveris, ‘Pandr'a wredh omma Elias?’ 14Ev a worthybis, ‘My re beu pur dhiwysyk rag an Arloedh, Duw an luyow; rag an Ysraelysi re eskasas dha gevambos, terri dha alteryow, ha ladha dha brofoesi gans an kledha. Nyns eus nagonan gesys marnas my, hag ymons ow hwilas ow bewnans, dh'y gemmeres dhe-ves.’ 15Ena an Arloedh a leveris dhodho, ‘Ke, dehwel war dha fordh dhe wylvos Damaskus, ke a-ji dhe'n sita; hag untya Hazael avel myghtern war Aram, 16hag ynwedh untya Yehu mab Nimshi avel myghtern war Ysrael, hag untya Elisha mab Shafat a Abel-mehola avel profoes yn dha le. 17Piw pynag a dhienk kledha Hazael, Yehu a ladh; ha piw pynag a dhienk kledha Yehu, Elisha a ladh. 18Mes my a as seyth mil yn Ysrael, oll an re na blegyas dewlin dhe Baal na amma dhodho.’

Galow Elisha

19Ytho ev a dhibarthas alena, ha kavoes Elisha mab Shafat, esa owth aras. Yth esa dewdhek yew a oghen a-ragdho, hag yth esa ev gans an dewdhegves. Elias a'n tremenas ha tewlel y vantell warnodho. 20Ev a asas an oghen, poenya war-lergh Elias, ha leverel, ‘Gas vy dhe amma dhe'm tas ha dhe'm mamm, hag ena my a'th siw.’ Ena Elias a leveris dhodho, ‘Dehwel arta; rag pandr'a wrug vy dhis?’ 21Ev a dhehwelis a'y siwya, kemmeres yew a'n oghen, ha'ga ladha; ev a vrojyas aga hig gans daffar an oghen, ha'y ri dhe'n bobel, hag i a dhybris. Ena ev a sevis ha mos wosa Elias, ha menystra dhodho.