Menystoryon Solomon

1Myghtern Solomon o myghtern war oll Ysrael, 2ha'n re ma o y soedhogyon: Azaria mab Sadok o an oferyas; 3Elihoref hag Ahiya mebyon Shisha o skrifennysi; Yehoshafat mab Ahilud o kovadhor; 4Benaya mab Yehoyada o kaslewydh an lu; Sadok hag Abiathar o oferysi; 5Azaria mab Nathan esa a-ugh an governours; Zabud mab Nathan o oferyas ha koweth an myghtern; 6Ahishar a'n jeva charj a'n lys; hag Adoniram mab Abda a'n jeva charj a'n lavur konstrynys.

7Solomon a'n jevo dewdhek governour war oll Ysrael, neb a brovia boes dhe'n myghtern ha'y ji; res o dhe beub gul provians rag unn mis y'n vlydhen. 8Ottomma aga henwyn: Ben-hur yn bro venydhyek Efraym; 9Ben-deker yn Makaz, Shaalbim, Beth-shemesh, hag Elon-beth-hanan; 10Ben-hesed yn Arubboth – ev a bewo Soko hag oll tiredh Hefer; 11Ben-abinadab yn oll Nafath-dor – Tafath myrgh Solomon o y wreg; 12Baana mab Ahilud yn Taanak ha Megiddo, oll Beth-shean ryb Sarethan yn-dann Yezreel, a Beth-shean dhe Abel-mehola, bys y'n tu arall dhe Yokmeam; 13Ben-geber yn Ramoth-gilead – dhodho ev yth esa trevow Yair mab Manasse yn Gilead, hag ev a'n jevo ranndir Argob yn Bashan, tri-ugens sita veur gans fosow ha barrys a vrons; 14Ahinadab mab Iddo yn Mahanaym; 15Ahimaas yn Naftali – ev re gemmersa Basemath myrgh Solomon avel gwreg; 16Baana mab Hushay yn Asher hag yn Bealoth; 17Yehoshafat mab Paruagh yn Yssakar; 18Shimei mab Ela yn Benyamin; 19Geber mab Uri yn pow Gilead, pow Sihon myghtern an Amorysi hag Og myghtern Bashan. Ev o an unn governour y'n tir.

Splannder Rewl Solomon

20Yuda hag Ysrael o diniver avel tewes an vorlann; i a dhybri hag eva ha lowen ens. 214:21 4:21 bys 4:34 yw niverys 5:1 bys 5:14 y'n tekst ebrow. Yth esa Solomon ow rewlya war oll an gwlaskordhow dhiworth an avon Ewfrates bys pow an Filistysi, ha bys yn or Ejyp; i a dhros trubyt ha servya Solomon dydhyow oll y vewnans.

22Provians Solomon rag unn jydh o deg kor4:22 kor: Musur sygh po linyel a-dro dhe 220 liter. warn ugens a vleus fin, ha tri-ugens kor a vrunyon, 23deg ojyon tew, hag ugens ojyon a'n beurva, ha kans davas, keffrys ha gavrewiges, ewigow, yergh ha yer tewhes. 24Rag ev a'n jevo mestrynses war oll an ranndir a'n gorlewin dhe'n avon a Tifsagh bys yn Gaza, war oll an vyghternedh a'n gorlewin dhe'n avon; hag ev a'n jevo kres a bub tu. 25Hag yth esa Yuda hag Ysrael trigys yn sawder dydhyow oll Solomon, peub yn-dann y winbrenn hag yn-dann y figbrenn, dhiworth Dan bys yn Beer-sheba. 26Solomon a'n jevo ynwedh dew-ugens mil stall a vergh rag y jarettow ha dewdhek mil varghek. 27Ha'n wovernours a brovias sosten rag myghtern Solomon ha rag pubonan a dho dh'y voes, peub yn y vis; ny fylli travyth dhedha. 28I a dhre heydh ha kalav ynwedh rag an vergh ha vergh an charettow dhe'n tyller ewn, peub herwydh y jarj.

Furneth Solomon

29Duw a ros dhe Solomon furneth veur, konvedhes ha helder kolonn, kepar ha'n tewes war an vorlann, 30may feu furneth Solomon moy es furneth oll pobel an duryen hag oll furneth Ejyp. 31Ev o furra ages oll mab-den, furra ages Ethan an Ezraghyas, ha Heman, Kalkol, ha Darda, mebyon Mahol; y vri a lesas der an kenedhlow y'n kyrghynn. 32Ev a gewsis tri mil henlavar, ha skrifa mil ha pymp kan. 33Ev a gewsi a wydh, dhiworth an keder usi yn Lebanon bys y'n hyssop a dyv y'n fos; ev a gewsi a enyvales, hag ydhyn, ha kramviles, ha puskes. 34Tus a dho a'n kenedhlow oll rag klewes furneth Solomon; i a dho a vyghternedh oll an nor re glewsa a'y furneth.