Solomon a Dhrehav an Tempel

1Y'n peswar kans ha peswar-ugensves blydhen wosa fleghes Ysrael dhe dhos yn-mes a Ejyp, y'n peswora blydhen a reyn Solomon war Ysrael, yn mis Ziv, an eyl mis, ev a dhallathas drehevel chi an Arloedh. 2An chi a dhrehevis Solomon rag an Arloedh o tri-ugens kevelin y hys, ugens kevelin y les, ha deg kevelin warn ugens y ughelder. 3An portal a-rag sentri an chi o ugens kevelin hy les, a-dreus les an chi, ha deg kevelin o hy les a-rag an chi. 4Ha rag an chi ev a wrug fenestri kul gans lattis. 5Hag erbynn fosow an chi ev a dhrehevis ystynnans a-dro dhe'n chi ha'n sentri pervedhel; hag ev a wrug chambouryow oll a-dro. 6An isella leur o pymp kevelin y les; an leur kres o hwegh kevelin y les ha'n tressa o seyth kevelin y les; rag tu a-ves an chi ev a wrug estyll kul war an fos ma na ve gorrys an kebrow yn fosow an chi.

7An chi a veu drehevys a veyn pareusys y'n mengleudh, ma na veu klewys morthol na boel na toul horn vyth y'n tempel pan esa ow pos drehevys.

8Yth esa daras an leur isella war denewen dyghow an chi: yth esa grisyow ow ledya dhe'n leur kres, hag a'n leur kres dhe'n tressa. 9Ytho ev a dhrehevis an chi ha'y worfenna; ev a worheras an chi gans kebrow hag estyll a gederwydh. 10Ev a dhrehevis an chambouryow erbynn an chi, pymp kevelin aga ughelder, hag i a veu stegys dhe'n chi gans prenn keder.

11Ger an Arloedh a dheuth dhe Solomon, ow leverel, 12‘A-dro dhe'n chi ma a dhrehevydh, mar kerdhydh yn ow ordenansow, ha bos gostydh dhe'm breusow ha gwitha oll ow gorhemmynnow ha kerdhes ynna, ena my a fast ow ambos genes, a wrug vy dhe'th tas Davydh. 13My a vydh trigys yn mysk fleghes Ysrael ha ny eskasav ow fobel Ysrael.’

14Ytho Solomon a dhrehevis an chi ha'y worfenna. 15Ev a bannellyas parosyow pervedhel an chi gans estyll prenn keder; a leur an chi dhe gebrow an nen, ev a's gorheras a-ji gans prenn; hag ev a worheras leur an chi gans plenkys a veryw. 16Ev a dhrehevis spas a ugens kevelin rynnys dhiworth delergh an chi gans estyll prenn keder a'n leur dhe'n kebrow, hag ev a dhrehevis hemma avel sentri pervedhel, avel an tyller an moyha sans. 17An chi, henn yw an tempel a-ragdho, o dew-ugens kevelin y hys. 18An prenn keder a-ji dhe'n chi a'n jevo kervyansow pompyons ha bleujennow igor; pup-tra o prenn keder, nyns esa men dhe vos gwelys. 19Ev a bareusis an sentri pervedhel a-ji dhe'n chi, rag gorra ena argh kevambos an Arloedh. 20Pervedh an sentri pervedhel o ugens kevelin y hys, ugens kevelin y les, hag ugens kevelin yn ughelder; ev a'n gorowras gans owr pur. Ev a worlownyas an alter ynwedh gans prenn keder. 21Solomon a worlownas pervedh an chi gans owr pur, ena ev a dennas kadonyow owr a-dreus, a-rag an sentri pervedhel, a veu gorlownys gans owr. 22Ev a worlownas gans owr oll an chi bys pan worfennsa oll an chi; hwath an alter esa y'n sentri pervedhel ev a worlownas gans owr.

Meblans an Tempel

23Y'n sentri pervedhel ev a wrug dew jerub a brenn oliv, pubonan deg kevelin yn ughelder. 24Pymp kevelin o hys unn askell a'n cherub, ha pymp kevelin o hys askell arall an cherub; deg kevelin o a vleyn unn askell dhe vleyn hy ben. 25Ha'n cherub arall o deg kevelin; an dhew jerub a's tevo an keth myns ha'n keth furv. 26Ughelder an unn cherub o deg kevelin, ha'n keth o ughelder an cherub arall. 27Ev a worras an cherubim a-ji dhe'n sentri pervedhel; eseli an cherubim o lesys may tochyas askell onan anedha an eyl fos, hag askell y gila a dochyas an fos arall; aga eskelli erell tu ha kres an chi a dochyas askell dhe askell. 28Ev a worlownas an cherubim ynwedh gans owr.

29A-dro dhe barosyow an chi ev a gervyas cherubim, palmwydh, ha bleujennow igor, a-ji hag a-ves. 30Leur an chi ev a worlownas gans owr y'n stevellow a-ji hag a-ves.

31Rag porth an sentri pervedhel ev a wrug darasow a brenn oliv; penn an daras ha'n postow o pympkornek. 32Ev a gudhas an darasow a brenn oliv gans kervyansow a jerubim, palmwydh, ha bleujennow igor; ev a's gorlownas gans owr, ha mortholya owr war an cherubim ha war an palmwydh.

33Ha rag porth an sentri ev a wrug darasow a brenn oliv, pubonan peswar-kornek, 34ha dew dharas a brenn meryw, ha'n dhiw rann an eyl daras a blegya, ha'n dhiw rann an daras arall a blegya. 35Ev a gervyas cherubim, palmwydh, ha bleujennow igor, orth aga gorowra gans owr desedhys war an ober kervys. 36Ev a dhrehevis an klos pervedhel gans teyr res a veyn treghys hag unn res a gebrow keder.

37Y'n peswora blydhen selveyn chi an Arloedh a veu gorrys, y'n mis Ziv. 38Y'n unnegves blydhen, y'n mis Bul, hag yw an ethves mis, an chi a veu gorfennys yn oll y rannow, ha herwydh oll y dhesinyow. Ytho ev a spenas seyth blydhen orth y dhrehevel.