Kevambos Duw gans Solomon

1Pan worfennas Solomon drehevel chi an Arloedh ha chi an myghtern ha pup-tra a dhesiryas Solomon y dhrehevel, 2an Arloedh a omdhiskwedhas dhodho an eyl termyn dell omdhiskwedhsa dhodho yn Gibeon. 3An Arloedh a leveris dhodho, ‘My re glewas dha bysadow ha'th pledyans a wrussys a-ragov; my re sakras an chi ma re dhrehevsys, ha gorra ow hanow ena bys vykken; ow lagasow ha'm kolonn a vydh ena bys vykken. 4Ha ty, mar kerdhydh a-ragov, par dell gerdhi dha das Davydh, gans kolonn lan hag ewnhynseth, ow kul herwydh pup-tra a worhemmynnis dhis, hag ow kwitha ow ordenansow ha'm breusow, 5ena my a fast tron dha vyghterneth war Ysrael bys vykken, dell ambosis dhe'th tas Davydh, ow leverel, “Ny fyll dhis gour war dron Ysrael.”

6‘Mar treylyowgh dhiworthiv, hwi po agas mebyon, ha mar ny withowgh ow gorhemmynnow ha'm ordenansow re settis a-ragowgh, mes mos ha servya duwow erell ha'ga gordhya, 7ena my a dregh Ysrael dhiworth an tir re res vy dhedha; ha my a dewl yn-mes a'm golok an chi re sakris rag ow hanow; hag Ysrael a vydh henlavar ha parabolenn yn mysk poblow oll. 8An chi ma a vydh bern a vagoryow;9:8 bern a vagoryow: Amendys, ow siwya an Syriek. peub a'n tremen a gemmer skruth ha hwibana; hag i a lever, “Prag y hwrug an Arloedh tra a'n par ma dhe'n tir ma ha dhe'n chi ma?” 9I a worthyp, “Drefenn i dhe eskasa an Arloedh aga Duw, a dhros aga thasow yn-mes a bow Ejyp, ha kemmeres duwow erell, orth aga gordhya ha'ga servya; rakhenna an Arloedh re dhros terroes warnedha.” ’

10Dhe benn ugens blydhen, may trehevis Solomon an dhew ji ynna, chi an Arloedh ha chi an myghtern, 11wosa Hiram myghtern Tyr dhe brovia dhe Solomon prenn keder ha prenn meryw hag owr, kemmys dell vynna, myghtern Solomon a ros dhe Hiram ugens sita yn pow Galile. 12Mes pan dheuth Hiram a-dhiworth Tyr rag gweles an sitys a ros Solomon dhodho, ny blegsons dhodho. 13Ytho ev a leveris, ‘Py par sitys yw an re ma re resys dhymm, ow broder?’ Ytho gelwys yns tir Kabul bys y'n jydh ma. 14Hiram re dhannvonsa dhe'n myghtern hwegh-ugens talent a owr.

Gwriansow Pella Solomon

15Hemm yw derivadow a'n lavur konstrynys a elwis Solomon yn-bann rag drehevel chi an Arloedh ha'y ji y honan, ha'n Millo,9:15 Millo: Martesen an styr yw tirlanow, po terrasow. ha fos Yerusalem, ha Hasor, Megiddo ha Gezer 16(galsa Faro myghtern Ejyp ha kemmeres Gezer ha'y leski gans tan, ha ladha an Kananysi esa trigys y'n sita ha'y ri yn argovrow dh'y vyrgh, gwreg Solomon; 17ytho Solomon a dhastrehevis Gezer), ha Beth-horon isel, 18Baalath, Tamar y'n gwylvos, a-ji dhe'n tir, 19keffrys ha sitys-gwithva Solomon, ha'n sitys rag y jarettow, an sitys rag y vergh, ha pup-tra a dhesiryas Solomon y dhrehevel yn Yerusalem, yn Lebanon, hag yn oll tiredh y vestrynses. 20Oll an bobel o gesys a'n Amorysi, an Hittysi, an Perizzysi, an Hivysi, ha'n Yebusysi, nag o Ysraelysi – 21aga diyskynnysi o gesys hwath y'n tir, an re na ylli Ysrael aga howlladha – an re ma a veu konstrynys rag lavur kethneth, hag yndella yth yns bys y'n jydh ma. 22Mes ny gethhas Solomon nagonan a'n Ysraelysi; yth ens y soudoryon, y soedhogyon, y gaslewydhyon, y gaptenyon ha hembrenkysi y jarettow ha'y varghoglu.

23Niver an benn-soedhogyon war weyth Solomon o pymp kans ha hanter-kans ow korweles an bobel a wre an gweyth.

24Wosa myrgh Faro dhe dhos yn-mes a sita Davydh dh'y chi hy honan re dhrehavsa Solomon rygdhi, ev a dhrehevis an Millo.

25Teyrgweyth y'n vlydhen Solomon a offrynna offrynnow leskys hag offrynnow kres war an alter a dhrehevis rag an Arloedh, ow leski an offrynnow9:25 ow leski an offrynnow: Styr an Ebrow yw ankler. a-rag an Arloedh. Yndella ev a worfennas an chi.

Kenwerth Solomon

26Myghtern Solomon a dhrehevis lu lestri yn Esyon-geber usi ogas dhe Eloth war lann an Mor Rudh, yn pow Edom. 27Hiram a dhannvonas y wesyon gans an lu, war-barth gans wesyon Solomon. 28I eth dhe Ofir, ha kyrghes alena peswar kans hag ugens talent a owr, ha'ga dri dhe Solomon.